Njelemiya 50 - Livulu lya Shukulu Kalunga

Mbambilone vaifungulula

¹ Eli likelyo lijwi lije lyanjanene Shukulu Kalunga a nganda ya Mbambilone na vanu vamwo ngwendi,

² “Leka muzimbu ou akati ka miyati ya vanu! Co wambulule! Jundula pandelo nakuwambulula! Kesi uushweke embwe, oloni wambulule ngwove, Mbambilone vakaifungulula, njambi yendi Manduke akaziva shwamwa, akashula na lyova. Tumponya twa Mbambilone tukaziva shwamwa, tumponya twendi twa vunyengwe vakatupujula!

³ “Muyati wa vanu vakutunda ku kunto vanaija nakulwisa Mbambilone, nakuyipwisa mambo. Vanu na tusitu vakatewela kulyala, co naumo wai akakalamo.”

Kwiluka kwa Isalele

⁴ Shukulu Kalunga alinakwendeka ngwendi, “Omo simbu iketa vanu va mu Isalele na vanu va mu Yunda voshe vakaija nakulila, nakunjilemesa yange Njambi yavo.

⁵ Vakehula ngila yakuya ku Siyone, co vakaya ku mutambela uje vene. Vakalikumiiya nange cikumiiyo ca ku myaka yoshe, co kucikapokoka.

⁶ “Vanu vange vanafu ngwe vimanga, vaje tunyungi twavo vanavazimbalesa mu minkinda. Vanendangana ngwe vimanga vaje vatunda ku munkinda umo, nakuya ku munkinda ukwavo, co vanevala limba lyavo.

⁷ Valinakuvalwisa kuli voshe vaje vavawana. Co vitozi vavo vendeka ngwavo, ‘Vanavulumuna ku mesho a Shukulu Kalunga, ngecivene, evi vitunalingi kesi vyavivi embwe. Vakukulwila vavo vakulaelele kuli Shukulu Kalunga, co na vakevo lalo vapandele kukala muli ikeye.’

⁸ “Vanu va Isalele, tundeni mu Mbambilone! Sezeni lifuti lya vaMbambilone! Pweni yeni vakulivanga kutundamo!

⁹ Njikashangumuna mbunga ya miyati ya vanu va nzili vaje vakatunda ku kunto, co vakalwisa Mbambilone. Vakalikwalaleka mu mundando wa nzita mukulwisa lifuti nakulifungulula. Vakevo vapwa vaka-kwasha va ntongo, mikili yavo kuyesi kuloja mu cimango.

¹⁰ Mbambilone vakaipukula, co vaje vakaipukula vakambatamo vyoshe vivashaka. Yange Kalunga, njinendekamo.”

Kuwa kwa Mbambilone

¹¹ Shukulu Kalunga alinakwendeka ngwendi, “Vanu va Mbambilone, yeni mwapukwile vanu vange. Yeni munavwaelela nakujolela, mulinakwendangana ngwe ngombe wa lwavo alinakujungula vimbuto, nambe ngwe kavalu alinakwoya,

¹² oloni nganda yeni yakama ikashauka nakuziva shwamwa. Mbambilone ikapwa muyati wa vanu vakwisi manene kutuvakana miyati yoshe ya vanu, ikapwa mambo yakuma cau ya mema.

¹³ Omwo a vukalu vwange, naumo wai akakala mu Mbambilone, oloni ikapwa ngundu yangoco, co voshe vaketilako vakalisimoka nakulikomokela.

¹⁴ “Yeni voshe vanalume vaka-kwasha mata a lusipa, likwalalekeni mu mundando muzengeleke Mbambilone nakuyilwisa. Asheni mikili yeni a Mbambilone omwo vanu vamwo vanavulumuna ku mesho ange yange Kalunga.

¹⁵ Tambekeni mutambi wa nzita nakuzengeleka nganda! Ololo Mbambilone inaliiti. Vivumbe vyayo vinau. Co vinasanyozokela asi, njilinakulinga shambandinga ali vaMbambilone. Ngecivene, neni lalo velwisileni shambandinga, valingeni ngwe muje vakevo valingile ku vakwavo.

¹⁶ Kesi mutave kukuva vimbuto mu lifuti lije, nambe kuteja vimbuto. Mungenzi woshe uje wakala muje akaziva lyova lya mashwalale vaje vakalwisa nganda, co vakeluka munu na munu kwimbo lyendi.”

VaIsalele veluka

¹⁷ Shukulu Kalunga alinakwendeka ngwendi, “Vanu va Isalele vanafu ngwe vimanga vaje vavanasheke nakuvashandola ku vindumba. Akulivanga vavalwisile kuli Mwene wa Asilya, co lalo Mwene Nevukaneza wa Mbambilone ikeye wambulukutile vitsiya vyavo.

¹⁸ Omwo a vyuma evi, yange Kalunga Muka-nzili yoshe, Njambi ya Isalele, njikahisa Mwene Nevukaneza na lifuti lyendi, ngwe munjahisile Mwene wa Asilya.

¹⁹ Njikelwisila vanu va Isalele ku lifuti lyavo. Co vakalya vyakulya vije vilinakumena a Munkinda wa Kalemele mu lifuti lya Mbashane, co vakalya vyoshe vije vivashaka ku vimbuto vije vilinakumena mu mafuti a Efalime na Ngilyande.

²⁰ Omo simbu ije ikaija, vuvi navumo vwai vukakala mu Isalele, co kupenga-penga nakumo kwai kukakala mu Yunda, omwo njikasambesa vanu vaje vanjasezeo. Yange Kalunga, njinendekamo.”

Kusompa kwa Njambi a Mbambilone

²¹ Shukulu Kalunga alinakwendeka ngwendi, “Lwiseni vanu va ku Melataime na ava va ku Pekonde. Vatsiyeni nakuvanyongesa. Lingeni vyuma vyoshe vinjimishika. Yange Kalunga, njinendekamo.

²² Muyoyo wa nzita vanauzivi mu lifuti, unapu muyoyo wakuviisa kwakama.

²³ Muveto vafulile nawo kaye koshe unavatozoka, nakumunguka! Miyati yoshe ya vanu vanalikomokela omwo Mbambilone inapu ngundu.

²⁴ Mbambilone, yove wanjilwisile, ololo njinakukwata mu mweto uje njakutelelele, nameme kuwauzivukile.

²⁵ Njinashokolola ku mwela kuje kwakutulikila vitwa vyange, co njinatuula vitwa vya vukalu vwange, omwo yange, Kalunga, wa Akamwa ya Vyoshe, njili na vipangi vyakupanga mu Mbambilone.

²⁶ Lwiseni Mbambilone ku mitambela yoshe noku-noku, co tuveni nakushokolola ku mitambela kuje kuvatulikila vimbuto! Lundikeni vije munapukula ngwe mitumbo ya vimbuto! Nyongeseni lifuti! Kesi musezemo cuma cimo.

²⁷ Tsiyeni mashwalale va Mbambilone voshe! Vatsiyeni! Vanu va ku Mbambilone vanavindama! Simbu yavo yakuvanyanyamesa inete!”

²⁸ (Vaka-kwija vanatewe ku Mbambilone vanaija ku Yelusalema, co vanambulula omo Shukulu Kalunga Njambi yetu walingile shambandinga a vije vaMbambilone valingile ku Njuvo yendi.)

²⁹ Saneni vaka-mata a lusipa valwise Mbambilone. Voshe vaje vazivuka kupangesa vuta vwa lusipa na mukili. Zengelekeni nganda, kesi mutave umo aputumukemo, ilingeni mwamuvi ku vije vyoshe vyalingile, co ipangeseni ngwe muyapangesele vakwavo, omwo yalingile na kulyalesa ku mesho ange, muka-kujela wa Isalele.

³⁰ Ngecivene, vakwenje vamwo vakavatsiila mu vitapalo vya mu nganda, na mashwalale vamwo voshe vakavanyongesa a litangwa lije. Yange Kalunga, njinendekamo.

³¹ “Mbambilone, u muka-kulyalesa, ngecivene, yange, Kalunga wa Akamwa ya Vyoshe, Muka-nzili yoshe, njilinakukulwisa! Simbu yange inete yakukunyanyamesa.

³² Muyati wove wa kulyalesa ukatanuka nakuwa, naumo wai akakwindula. Co njikashwameka tuhya a vinganda vyove, co vyuma vyoshe vyazengelekako vikanyonga.”

³³ Shukulu Kalunga Muka-nzili yoshe nendeka ngwendi, “Vanu va mu Isalele na vanu va mu Yunda valinakuvayandesa. Voshe vaje vavafungulwile valinakuvanyunga manene, co kuvavatavesa kwiluka.

³⁴ Oloni uje akavapatula ali na nzili, lizina lyendi ikeye Shukulu Kalunga Muka-nzili yoshe. Ikeye akasompa vyavo, akanena kwoloka ano asi, oloni tuyando kuli vanu va Mbambilone.”

³⁵ Shukulu Kalunga alinakwendeka ngwendi, “Moko ya mukwale ikatapa vaMbambilone na woshe uje alimo. Mukwale ukatapa vamyata vendi, na vanu vavo vaka-mana.

³⁶ Vaka-kwimanena vendi va makuli vakatsa, vapwa vilema! Mashwalale vendi vakatsa nakuvafungulula!

³⁷ Nyongeseni tuvalu twendi na matemba endi! Mashwalale vendi vakukumuna vakatsa, vakevo vapwa vakuzeya! Vufuko vwavo vakavupukula.

³⁸ Lilanga liije mu lifuti lyendi lyumise vindonga vyamwo, Mbambilone lyapwa lifuti lya tumponya twakukomokesa, tuje twalingisa vanu vulema.

³⁹ “Ngecivene, Mbambilone ikapwa mwela wa mishwe na vimbanje, na minguli vakakalamo. Co vanu kuvakakalamo lalo muje, nambe visimbu vije vikaija kulutwe.

⁴⁰ Cuma cimo cikalingiwa ku Mbambilone, ngwe cije calingiwile ku Sondoma na Ngomola, omo njavanyongesele amo na vinganda vije vyakele kuyehi. Naumo wai lalo akakala muje. Yange Kalunga, njinendekamo.

⁴¹ Kengeni vanu valinakutunda ku kunto, muyati wa vanu va nzili, co vimyene vavangi valinakulivwaesela nzita.

⁴² Vanambata mata avo a lusipa na mikwale yavo, vanu vakukaluka mema ku mbunge. Omo valonda a tuvalu twavo, co vimbemba vya tuvalu twavo vicuma ngwe mema a kalunga. Valivwaesela cimweja kulwa nzita, kulwisa yeni vanu va Mbambilone.

⁴³ Mwene wa Mbambilone nazivi muzimbu wavo, co nazeye omwo lyova. Ikeye ali mu vukalu vwakama, nakukemanga ngwe munakazi ashaka kukita.

⁴⁴ “ Yange Kalunga njikashekela vaMbambilone kulyala kutunda mu nganda yavo, ngwe ndumba atunda mu shwata yakuzika, ku ngenge ya Ndonga ya Yondau nakuya ku mwila wauvwa wakutonola mukulwisa vimanga. Co uje ntwama injinaangula akashwana muyati wa vanu. Iyajo nalifu nange? Iyajo asa kulwa nange? Muka-kushwana iyajo asa kunjiyeluwisa?

⁴⁵ Ngecivene, tolilileni ku vutumbe vuje vunjatumbile vwakulwisa nganda ya Mbambilone, na kuli vije njishaka kulinga ku vanu vamwo. Vana vavo vakavakokangeya, co vanu voshe vakalikomokela.

⁴⁶ Omo Mbambilone ikawa, co kukakala muyoyo wakama uje ukajajesa kaye, na muyoyo wakulila vakauziva na ku mafuti eka.”