Njelemiya 5 - Livulu lya Shukulu Kalunga

Vuvi vwa Yelusalema

¹ Vanu va mu Yelusalema, itanganeni mu vitapalo vyeni! Kengezekeni noku-noku! Shakezekeni mu mitambela yakulandesela! Kengeni nga muwanamo munu umo muka-kulinga vya vushunga na kulongwa kuli Njambi. Nga mumuwana, co Shukulu Kalunga akasambesa Yelusalema.

² Nameme mulemesa Shukulu Kalunga, oloni kumwesi kulinga vije mwendeka.

³ Mwa vushunga Shukulu Kalunga akakenge a kulongwa. Waminyanyamesele, oloni kumwamutolililile, wamisindakanene, oloni kumwalilongesele. Mwakaluwisile vimbunge vyeni, co kumwatengulukile ku vuvi vweni.

⁴ Asinoni njayongwele ngwange, “Vanu ava vapwa tuutu vakujeneka mana. Vakalingi vyuma vya vulema, kuvazivuka vije vyashaka Shukulu Kalunga Njambi yavo ngeci vavilinge.

⁵ Njikaya kuli vaka-kushwana nakukendeka navo. Mwa vushunga vazivuka vije vyashaka Shukulu Kalunga Njambi yavo ngeci vavilinge.”

⁶ Vanu vanatengulukila Njambi visimbu vyavingi, omwo vuvi vwavo vwavungi manene. Ngecivene, vitozi vakavalwisa ngwe vindumba nambe ngwe tungunga va mu mambo, vaje vitozi vakavandamena mu vinganda vya Yunda ngwe viingwe nakusanyozola sanyu-sanyu munu woshe akatuuka anja.

⁷ Co Shukulu Kalunga wehwile ngwendi, “Omwo vikajo njisambesa vuvi vwa vanu vange? Vananjiseze nakulemesa vinjambi vangoco. Njalisile vanu vange noo vakutile, oloni valingile vupangala mu vinjuvo vya vikwizi.

⁸ Valifwile ngwe vingolo va myeha vaka-kulya mwamuvwa, munu na munu wakele na lishungu lya munakazi wa mukwavo.

⁹ Kuma kunjapandele kuvanyanyamesa a vyuma evi, nakulinga shambandinga a muyati wa vanu wa cifwa cangacije ndi?

¹⁰ Njikatuma vitozi vakashinja vitungu vya mikolovozi ya vushuka vwa vinyu ya vanu vange, oloni kuvakainyongesa yoshe, njikavaleka ngeci vajokoleko minango, omwo kesi vanu vange embwe.

¹¹ Vanu va mu Isalele na vanu va mu Yunda mwa vushunga kesi va kulongwa kuli yange. Yange Kalunga, njinendekamo.”

Shukulu Kalunga avyana Isalele

¹² Vanu vanavyana Shukulu Kalunga, co vanendeka ngwavo, “Nacimo cai cakalinga. Shukulu Kalunga kakatunyanyamesa, kukukakala nzita nambe njala ya lyangengela embwe.”

¹³ Vaka-kwimanena vakambulula vuka-kwimanena vwa makuli, na lijwi lya Shukulu Kalunga lyaimo muli vakevo.

¹⁴ Ngecivene, Shukulu Kalunga Njambi Muka-nzili yoshe wendekele kuli yange ngwendi, “Njelemiya, omwo vanu ava vanendeka vyuma evi, lijwi lyange njikalipwisa ngwe tuhya mu kanwa kove. Vanu va mu Isalele na mu Yunda vakapwa ngwe vitale, co tuhya tukavenyeka njwa.”

¹⁵ Vanu va mu Isalele, Shukulu Kalunga akanena muyati wa kulyala mukumilwisa, muyati wa ku san̄ulu wa nzili, uje ndaka yawo kumuyizivuka.

¹⁶ Vanalume va muyati uje voshe vapwa mashwalale va nzili, mikili ya mata avo a lusipa ikanena kutsa.

¹⁷ Vakalya vimbuto vyeni na vyakulya vyeni, co vakatsiya vana veni va vanalume na ava va vanakazi. Vakatsiya matanga a vimanga veni nakunyongesa mikolovozi ya vushuka vwa vinyu, na miti ya mikuyu. Vinganda vyeni vya mu vimpaka vije mwakulaela vakavisiwula kuli mashwalale vavo.

¹⁸ Shukulu Kalunga alinakwendeka ngwendi, “Nameme ngoco, a matangwa aje kunjikanyongeselela muyati wa vanu vange embwe.

¹⁹ Omo vakehula ngwavo omwo vikajo njinalingila vyuma vyoshe evi, Njelemiya, valeke ngwove, omwo vananjikengesa nima nakupangela vinjambi veka vaje vali mu lifuti lyavo, ngecivene, vakapangela vanu veka mu lifuti lije kesi lyavo.”

Njambi anangula vanu vendi

²⁰ Shukulu Kalunga alinakwendeka ngwendi, “Leka vatekulwila va Yakomba, co lalo leka vanu va mu Yunda ngwove,

²¹ ‘Tolilileni yeni vanu vakujeneka mana, muli na mesho, oloni kumona kwai, co muli na matwi, oloni kuziva kwai.

²² Yange njapwa Kalunga, omwo vikajo kumunjilemesela? Omwo vikajo kumunjikomokela? Njaakele lishen̄avu kupwa nginga ya mema a kalunga, nginga yakutaluka ije kuvasa kujomboka. Mema a kalunga asa kungwanjanga, oloni kuwasa kujomboka nginga, mankimba asa kungwanjanga, oloni kuwasa kuyijomboka embwe.

²³ Oloni yeni vanu mwakaluwa vimbunge, mu vaka-kutenguluka, co munanjiseze nakutengulukila kweka.

²⁴ Kumwesi kuyongola mu vimbunge ngweni tukomokeni Shukulu Kalunga nameme ikeye kanyokesa nyonzi a nyangao na a ndombo, nakutwana visimbu vya kuteja vimbuto vyavingi a mwaka na mwaka.

²⁵ Oloni vuvi vweni vunamivindikisa ngeci kesi njimivezikise.

²⁶ “ ‘Vaka-vuvi vali akati ka vanu vange, vanavandamena ngwe vanu vaje vatsiya tuzila a manimbwa, oloni vanate myeto yavo ngeci vanu vatsemo.

²⁷ Ngwe ciyambi ashulisa cishakala cendi na tuzila, mu cifwa eci vene vanu ava vanashulisa vinjuvo vyavo na vyuma vyakupukula. Mukemwo vali na nzili na vufuko,

²⁸ omwo vikajo vananunu nakukala mwamuvwa. Vilinga vyavo vyavivi kuvyesi naa avyasikisila. Kuvesi kwana visiwa vije vinavapande nambe kumwesa vushunga kuli vaka-kuyanda.

²⁹ “ ‘Oloni yange Kalunga, njikaminyanyamesa a vyuma evi, njikalinga shambandinga a muyati ou.

³⁰ Cuma cakukomokesa ca vusiwa cinalingiwa mu lifuti,

³¹ Vaka-kwimanena kuvesi nakwendeka vya vushunga kuvanga vya makuli lika, vaka-kukombelela kuvesi kumba mbunge ku vije njishaka yange, co vanu vange navo lalo valinakukavangeya vyuma evi. Oloni vakalinga vatijo omo litangwa lya vukalu liija?’ ”