Njelemiya 49 - Livulu lya Shukulu Kalunga

Kusompa kwa Shukulu Kalunga ali Amoni

¹ Evi vikevyo vyendekele Shukulu Kalunga ali Amoni ngwendi, “Vali kulijo vanalume va Isalele? Kukwesi umo wa ali vakevo wakwimanena lifuti lyavo ndi? Omwo vikajo vatava vanu vaje vaka-kulemesa Moleki kutambula lifuti lya muyati wa Ngande nakutungamo?

² Oloni simbu ilinakwija omo njikatuma vanu va nganda yakama ya Lamba kwakumilwisa, co lifuti lyeni likapwa vingundu na membo amwo oshe akenya njwa. Co Isalele akatambula lalo lifuti lyendi kuli vaje valitambwile.

³ Vanu va ka Heshevone, lileni manene! Nganda ya Ai inanyongo! Vanakazi va mu Lamba, lileni! Zaleni vikeleya nakulila. Shatozokeni mu kuuya-uya, omwo njambi yeni Moleki vakamutwala mu vunzinda amolika na vaka-kukombelela vendi na vamyata.

⁴ Omwo vikajo yeni vanu vakujeneka kulongwa mukalishasha? Nzili yeni ilinakuhwa. Omwo vikajo mwakulaela mu nzili yeni vavenya, nakwendeka ngweni naumo wai akatulwisa?

⁵ Co njikamizivisa lyova kuli vaje voshe vanamizengeleka noku-noku. Muvavoshe mukatewela kulyala. Co munu na munu akatewesa mwonyo wendi, co kukwesi umo lalo wa ali yeni akakungulwila amolika vaje vanaputumukao.

⁶ “Oloni kulutwe njikavezikisa lalo Amoni. Yange Kalunga, njinendekamo.”

Kusompa kwa Shukulu Kalunga ali Endome

⁷ Evi vikevyo vyendekele Shukulu Kalunga Muka-nzili yoshe ali Endome ngwendi, “Kuma vaka-Endome vanazimbalesa kusompa kwavo kwakuvwa ndi? Kuma vaka-kuvanangula vavo kuvasa kuvaleka vije vivanapande kulinga ndi? Kuma mana avo oshe anahu ndi?

⁸ Vanu va mu Ndendane tengulukeni nakutewa. Vandeni! Njikanyongesa vatekulwila va Isau, omwo simbu yange inete yakuvanyanyamesa.

⁹ Omo vanu vavuya mikolovozi ya vushuka vwa vinyu, vakasezako vwavundondo lika, omo vezi vaija ku simbu ya vutsiki nakupukula, vakambatako lika vyuma vije vivashaka.

¹⁰ Oloni yange njinatambula vatekulwila va Isau vyuma vyoshe, nakuvajombolola mu mitambela mwoshe muje vanavanda. Ngecivene, nalumo lwai lalo vakavanda. Vanu voshe vaka-Endome vananyongo. Naumo wai wa ali vakevo nasalao.

¹¹ Sezeni visiwa veni amo nange, yange njikavalela. Co vifwile veni vakayoyela kuli yange.

¹² “Nameme vaje kuvapandele kuvanyanyamesa, oloni kuvanga vanwe mu nganja ya kusompa, kuma mwayongola ngweni mukaya ngoco kuminyanyamesa ndi? Embwe, kuvanga munwe mu nganja ije vene!

¹³ Yange njinalisingi ngwange nganda ya Mbozile ikemuka cimweso ca vunyengwe, nakupwa mambo, co vanu vakalishendumuna na kupwisa lizina lya nganda cisingo. Co mambweli oshe akapwa vingundu ku myaka yoshe. Yange Kalunga, njinendekamo.”

¹⁴ Yange njendekele ngwange, “Endome, yange njatambula majwi kutunda kuli Shukulu Kalunga. Shukulu Kalunga natumu muluwa kuleka miyati yoshe ya vanu vakungulule mbunga ya mashwalale vavo, nakulivwaesela cimweja kumilwisa.

¹⁵ Shukulu Kalunga akanyongesa nzili yeni, co naumo wai akamisingimika.

¹⁶ Kulyalesa kweni kunamikwisa. Naumo wai akamizivila manene lyova ngwe mumunayongola. Yeni mwakala akamwa ya mamanya ashongo-shongo ya minkinda, oloni nameme mwakala akamwa ngwe ngonga, Shukulu Kalunga akamiwisila asi. Mukemwo mwanendeka Shukulu Kalunga.”

¹⁷ Shukulu Kalunga wendekele ngwendi, “Cihiso cije cikaija a Endome, cikapwa cakukomokesa manene, munu woshe uje aketilako akalisimoka nakulikomokela.

¹⁸ Cuma cimolika cikalingiwa ku Endome ngwe cije calingiwile ku Sondoma na Ngomola, omo vakevo na vinganda vyakwatako vavinyongesele. Co naumo wai lalo akakala muje. Yange Kalunga, njinendekamo.

¹⁹ Njikaija kuli va Endome ngwe ndumba atunda mu shwata yakuzika, ku ngenge ya Ndonga ya Yondau nakuya ku mwila wauvwa wakutonola mukulwisa vimanga, nakuvashekela kulyala kutunda mu lifuti lyavo. Co uje ntwama injinaangula akashwana muyati wa vanu. Iyajo nalifu nange? Iyajo asa kulwa nange? Muka-kushwana iyajo asa kunjiyeluwisa?

²⁰ Ngecivene, tolilileni ku vutumbe vuje vunjatumbile vwakulwisa vanu va Endome, na kuli vije njishaka kulinga kuli vanu va mu nganda ya Temane. Vana vavo vakavakokangeya, co vanu voshe vakalikomokela.

²¹ Omo Endome ikawa, co kukakala muyoyo wakama uje ukajajesa kaye, na muyoyo wakulila vakauziva na ku Ndonga ya Mema a Kalunga Akuvenga.

²² Citozi akalwisa Mbozile ngwe ngonga ashelumuka nakujangumuna mambava endi, a litangwa lije mashwalale va Endome vakalijajela ngwe munakazi ashaka kukita.”

Kusompa kwa Shukulu Kalunga a Ndamasiku

²³ Evi vikevyo vyendekele Shukulu Kalunga a Ndamasiku ngwendi, “Vanu va mu vinganda vya Hamate, na vanu va mu Alepande valinakulishoshomwena, omwo vanazivi muzimbu wauvi. Kulishoshomwena kulinakulizenga ali vakevo ngwe mema a kalunga aje kuwasa kulendemana, cinyangavili cavo cinahu.

²⁴ Vanu va ku Ndamasiku vanazeye, co vatewa na lyova. Valinakukemanga nakuziva tuyando ngwe munakazi ashaka kukita.

²⁵ Nganda yakutsimana ije njavwaelelele nayo oloni inapu ngundu.

²⁶ Co a litangwa lije vakwenje vamwo vakavatsiila mu vitapalo vya mu nganda, co mashwalale vamwo voshe vakavanyongesa.

²⁷ Njikashwameka tuhya a vivumbe vya Ndamasiku, nakwenyeka mapela oshe a Mwene Mbenehandande. Yange Kalunga Muka-nzili yoshe, njinendekamo.”

Kusompa a muyati wa Kendale na a nganda ya Hazole

²⁸ Evi vikevyo vyendekele Shukulu Kalunga a muyati wa Kendale na lifuti lije lyakele mu mavoko a Hazole, lije lyafungulwile Mwene Nevukaneza wa Mbambilone ngwendi, “Lwiseni vanu va Kendale nakunyongesa muyati wa mu ngangela!

²⁹ Ambateni vimbalaka vyavo, na matanga avo a vimanga, na mavamba a mbalaka, na vyuma vyoshe vili mu vimbalaka vyavo. Ambateni na tumelo twavo, lekeni vanu ngweni, ‘Cova-ova cinamizengeleka!’

³⁰ “Vanu va Hazole, yange Kalunga njiminangula, teweleni kulyala mukavandeko. Mwene Nevukaneza wa Mbambilone natumbu vutumbe vwakumilwisa, evi vikevyo vyanendeka ngwendi,

³¹ ‘Ijeni tukalwise vanu ava vayongola ngwavo vali mu kwoloka! Nganda yavo kuyesi na vikolo nambe tupateso, co mwa vushunga vene kuvesi kuyinyunga.’

³² “Ambateni tumelo twavo, na vimuna vavo voshe! Njikashandwela mu mitambela mwoshe vanu vaje vanateula vin̄ambu vyavo, njikanena tuyando twakama ali vakevo ku mitambela yoshe.

³³ Co Hazole ikapwa mambo ku myaka yoshe, mutambela uje mukakala lika vimbanje. Naumo wai lalo akakalamo. Yange Kalunga, njinendekamo.”

Kusompa kwa Shukulu Kalunga ali Elame

³⁴ Omo Zendekiya wapwile mwene wa mu Yunda, co Shukulu Kalunga Muka-nzili yoshe, wendekele kuli yange a lifuti lya Elame.

³⁵ Wendekele ngwendi, “Njikatsiya vaka-mata a lusipa voshe vaje vanaana Elame nzili.

³⁶ Njikatuma vitozi kutunda ku mitambela yoshe kulwisa Elame, co njikashandwela vanu vendi ku mitambela yoshe, noo mafuti oshe akashula na vanu vakutunda ku Elame.

³⁷ Njikazivisa vanu va Elame lyova lyakutewa vitozi vavo, vaje vashaka kuvatsiya. Akuluvala kwange kwakama njikanyongesa vanu va Elame, nakutuma mbunga ya mashwalale vakuvalwisa noo njinavamanesa voshe.

³⁸ Njikanyongesa vimyene vavo, na vantwama vavo, co njikashwana mu myela yavo.

³⁹ Oloni kulutwe njikavezikisa lalo vanu va Elame. Yange Kalunga, njinendekamo.”