Njelemiya 48 - Livulu lya Shukulu Kalunga

Kunyonga kwa Mowavi

¹ Evi vikevyo vyendekele Shukulu Kalunga Muka-nzili yoshe a Mowavi ngwendi, “Luvinda lwa vanu va ku Nembo, omwo nganda yavo inanyongo! Kilyataime vanaifungulula, cimpaka cayo ca nzili cinasiwuka, co vanu vamwo vanazivi shwamwa,

² vanu kuvashangazala lalo Mowavi, vitozi vanafungulula Heshevone, co vayongola kunyongesa muyati wa Mowavi. Nganda ya Mandemene ikoloka kuluu, mbunga ya mashwalale vakailwisa.

³ Vanu va ku Holonaime valinakutambeka mitambi ya kuuya-uya nakunyonga.

⁴ “Mowavi inanyongo, tolilileni vanike omo valinakulila.

⁵ Ziveni muyoyo wakusikoka kwavo, omo valinakuya ku Luhite, vakendeka a tuyando, omo vaya ku nganda ya Holonaime.

⁶ Vendeka ngwavo, ‘Teweni, ameneni myonyo yeni! Shatukeni ngwe ngolo wa mu mambo!’

⁷ “Mowavi, yove wakulaela nzili yove na vufuko vwove, oloni vakakufungulula nakukutwala mu vunzinda, amolika na njambi yove Kemoshe, amolika na vana vendi va vimyene na vaka-kukombelela vendi.

⁸ Kukwesi nganda imo ikasalao ku vukalu ovu, cimbongo na cana vyoshe vikanyonga. Yange Kalunga, njinendekamo.

⁹ Akeni mwongwa a Mowavi omwo vakainyongesa. Vinganda vyamwo vikasala mu ngundu, co naumo wai lalo akakalamo.”

¹⁰ (Apwe wakusinga munu uje kapanga vipangi vya Shukulu Kalunga na mbunge yendi yoshe! Apwe wakusinga munu uje katsii na mukwale wendi!)

Vinganda vya Mowavi vavinyongesa

¹¹ Shukulu Kalunga wendekele ngwendi, “Mowavi simbu yoshe vanakala mwamuvwa, kuvavatwalele ku vunzinda. Vanu vamwo vanafu ngwe vinyu vyakusheketeya mu njava vya kushinga mu njava neyi-neyi. Lwengo lwavyo kulwaviile embwe, vinapu vyakutovala vene ngwe akulivanga.

¹² “Ngecivene, kengeni, simbu ilinakwija omo njikatuma vanu vaketila Mowavi ngwe vinyu. Vakaseza vinjava vya vinyu mupulungwa nakuvitavozola mu vimbazuvwila-vimbazuvwila.

¹³ Co vaMowavi vakaziva shwamwa, na njambi yavo Kemoshe, ngwe muvazivile shwamwa vaIsalele, na Mbetele, njambi uje ivakulaelele.

¹⁴ “Omwo vikajo yeni vanalume va ku Mowavi mulitumbula vingenyenye, mashwalale vakusimpa mu nzita?

¹⁵ Mowavi na vinganda vyamwo vanavinyongesa, vakwenje vamwo vavavwa vanavatsii. Yange njapwa mwene, Kalunga muka-nzili yoshe, njinendekamo.

¹⁶ Luvinda lwa Mowavi lulinakushwena kuyehi, kayando kayo kalinakwija vwasi.

¹⁷ “Lileni muyati wa Mowavi, yeni miyati ya vanu muli kuyehi, yeni voshe mwazivuka lutsimo lwawo. Endekeni ngweni, ‘Vatijo vanapokola nzili ya vushwana vwa Mowavi? Oloni ololo vumpau vwendi na nzili yendi vanavinyongesa.’

¹⁸ Yeni mwakala mu Ndimboni shulukeni mu myela yeni ya kasingimiko, co tumbameni mu livu, muka-kunyongesa ali kuno, nanyongesa vinganda vyeni vya vimpaka.

¹⁹ Yeni mwakala mu Aloele, imaneni kumukulo wa ngila muvandamene, ihuleni vaje valinakutewa na vaje vanovokako, vehuleni ngweni, ‘Vikajo mulinakutewa?’

²⁰ Vakevo vakamikumbulula ngwavo, ‘Mowavi vanaifungulula, lileni amo netu na shwamwa. Lekeniko ava vali ku ngenge ya Ndonga ya Alenone, ngweni Mowavi vanainyongesa!’

²¹ “Kusompa kunaija a vinganda vya mu cana, a nganda ya Holone, na Njaheza, na Mefate,

²² na Ndimboni, na Nembo, na Mbete Ndimbelataime,

²³ na Kilyataime, na Mbetengamule, na Mbetemeone,

²⁴ na Kelyote, na Mbozile. Kusompa kunaija a vinganda vyoshe vya Mowavi, vije vili kulyala na vije vili muyehi.

²⁵ Nzili ya Mowavi vanaimanesa, nakuyinyongesa. Yange Kalunga, njinendekamo.”

Mowavi vakaikeesa

²⁶ Shukulu Kalunga wendekele ngwendi, “Pendeseni Mowavi omwo yanjitengulukila nakunjilwisa. Mowavi akalyalanga a vishanjo vyendi, co vanu vakamujola.

²⁷ Mowavi, anuka muwakele nakushendumuna vanu va Isalele. Wavapangesele ngwe vanu vaje vavakwatele amolika na munga ya vezi.

²⁸ “Yeni vanu muli mu Mowavi, pweni ngwe katela uje atungila lishwa lyendi kumukulo wa linzenzengoma.

²⁹ Tunazivi kulyalesa kwa vanu va ku Mowavi! Vanapu vaka-kulyalesa manene, vaka-kulishasha, vaka-kulilemesa vakevo vavenya.

³⁰ Yange Kalunga, njazivuka kulyalesa kwavo. Co kulishasha kwavo kunapu kwangoco, vyoshe vije vivalinga kuvikeshwala embwe.

³¹ Ngecivene, njikalinyenga a munu woshe ali mu Mowavi na ali vanu vali mu Kile Helese.

³² Njikalinyenga a vanu vali mu Simbema, kutuvakana vanu vali mu Njazele. Nganda ya Simbema, unafu ngwe mukolovozi wa vushuka vwa vinyu uje minango yawo inete ku Lishali lya Kutsa, nakweta ku Njazele. Oloni ololo vushuka vwove vwa ndombo na vushuka vwove vwa vinyu vakavunyongesa.

³³ Kuvwaelela nakujolela kwa kuteja vimbuto kuvyesimo lalo mu vitungu na mu mahya a lifuti lya Mowavi lya vwilo. Yange njikavindika vinyu kwita omo vavikamuna, co naumo wai akajolela akukamuna vinyu.

³⁴ “Vanu va ku Heshevone na Elyale valinakulila, co mutambi wavo vanauzivi ku Njahaze, vanauzivi vanu va ku Zowale, co lalo vanauzivi na ku Holonaime na ku Engelate Shelishiya. Nameme muna ndonga Nimelime nomu cau.

³⁵ Njikavindika vanu va ku Mowavi kukombelela vin̄ombelo vya kwenyeka ku mitambela yavo yakulemesela, nakukombelela vin̄ombelo ku vinjambi vavo. Yange Kalunga, njinendekamo.

³⁶ “Ngecivene, mbunge yange ilinakulinyenga a Mowavi na ali vanu va ku Kile Helese, ngwe munu alinakwimba mwaso wa vusiwa na mbendo, omwo vyuma vyoshe vakele navyo vinanyongo.

³⁷ Voshe vanateula mitwe yavo nakukamba minjezi yavo. Voshe vanalilengula vimbandu a mavoko avo, co munu woshe nazala cikeleya.

³⁸ Akamwa ya vinjuvo vyoshe vya mu Mowavi, na mu vitapalo mwoshe, kumwesi vyeka vyai kuvanga kulila lika, omwo njinatsii Mowavi ngwe njava ije naumo wai lalo aishaka.

³⁹ Mowavi yasanyozoka! Lileni! Mowavi vanaizivisa shwamwa. Inaviya, co miyati yoshe ya vanu vaje vanazengeleka Mowavi vakashendumuna Mowavi. Yange Kalunga, njinendekamo.”

Mowavi kuyikavomboloka

⁴⁰ Shukulu Kalunga nendeka ngwendi citozi akashelumukila a Mowavi ngwe ngonga ajangumuna mambava endi,

⁴¹ co vinganda na vimpaka vakavifungulula. A litangwa lije mashwalale va Mowavi vakalijajela ngwe munakazi ashaka kukita.

⁴² Mowavi ikanyonga, co kakapu lalo muyati wa vanu, omwo nanjitengulukila nakunjilwisa.

⁴³ Lyova, na viteke, na myeto vinavandamena vanu va ku Mowavi. Mwanendeka Shukulu Kalunga.

⁴⁴ Woshe atewa omwo lyova, akawila mu citeke, co woshe uje akatuuka mu citeke, akatsa mu mweto, omwo Shukulu Kalunga nemika simbu ya tuyando twa Mowavi.

⁴⁵ Vaka-kwija vakuzeya vakavanyungila mu Heshevone, nganda ije yashwanene laja Mwene Sihone, oloni inashwama na milangi ya tuhya. Tuhya tuje tunenyeka vimpaka na minkinda yailaja ya vanu va ku Mowavi vaje vazema nzita.

⁴⁶ Luvinda lwa vanu va ku Mowavi! Vanu vaje valemesele Kemoshe vanavanyongesa, co vana vavo va vanalume na ava va vanakazi, vanavatwala ku vunzinda.

⁴⁷ Oloni ku matangwa a kulutwe, Shukulu Kalunga akavwaesa lalo Mowavi. Vyoshe evi vyanendeka Shukulu Kalunga, vikalingiwa ku Mowavi.