Njelemiya 46 - Livulu lya Shukulu Kalunga

Lijwi lya vuka-kwimanena ali vaka-Ingito

¹ Shukulu Kalunga wendekele kuli yange a miyati ya vanu,

² kushangumukila na vaka-Ingito. Evi vikevyo vyendekele Shukulu Kalunga a mbunga ya mashwalale va Mwene Neko wa Ingito, vaje vaafungulwile Mwene Nevukaneza wa Mbambilone ku Kalekemishe kuyehi na Ndonga ya Yufuleti mu mwaka wamuciwana uje Yehoyakime wapwile mwene wa mu Yunda ngwendi,

³ “Vamyata va Ingito vatambekele ngwavo, ‘Vwaeseleni cimweja vintelo vyeni, co yeni ku nzita!

⁴ Lemekeni tuvalu tweni mulondeo! Imaneni mu mitambela yeni ya nzita, nakuzala vitepa vyeni! Otoleni makunga eni! Zaleni vuzalo vweni vwa nzita!’ ”

⁵ Shukulu Kalunga alinakwihula ngwendi, “Vika vije vinjamono? Mashwalale vavo vanavafungulula, lyova linavakwata, co valinakutewa lumbisi manene, kuvasa kukenga kunima lalo.

⁶ Vaka-lumbisi kuvasa kuputumuka, na mashwalale kuvasa kutewa. Ku kunto ku Ndonga ya Yufuleti, vatanozoka nakuwa.

⁷ Iyajo uje nakatuka ngwe Ndonga ya Nailo, ngwe ndonga ijalela mema nakweta ku ngenge yayo?

⁸ Vakevo vaka-Ingito valinakukatuka ngwe Nailo, ngwe ndonga ije inajalela mema nakweta ku ngenge yayo. Ingito yendekele ngwayo, ‘Njikakatuka nakufwika kaye! Njikanyongesa vinganda na vanu vaje vakalamo.’

⁹ Shikeni tuvalu vaye, na matemba vaakoke! Co tumeni mashwalale, vanalume vakutunda ku Sundane na ku Limbiya, vambate vintelo, na vanalume vaka-vutongwe vwa mata a lusipa vakutunda ku Lindiya.”

¹⁰ Eli likelyo litangwa lya Shukulu Kalunga wa Akamwa ya Vyoshe Muka-nzili yoshe, litangwa lya lelo akalinga shambandinga, litangwa lya lelo akanyanyamesa vitozi vendi. Mukwale wendi ukavatapa, nakunwa maninga ngwe munu. Litangwa lya lelo Shukulu Kalunga Muka-nzili yoshe akombelela n̄ombelo ya shambandinga ku kunto, ku Ndonga ya Yufuleti.

¹¹ Vanu vaka-Ingito, yeni ku Ngilyande nakushakezeka vumbanda! Vumbanda vweni vwoshe kuvwesi na seo, nacimo cai casa kumikangwisa.

¹² Miyati ya vanu vanazivi shwamwa yeni, vanu voshe vanazivi kulila kweni. Mashwalale vanatanuka ali umo na mukwavo, co voshe vanawila asi.

Kwija kwa Nevukaneza

¹³ Omo Mwene Nevukaneza wa Mbambilone wezile nakulwisa Ingito, co Shukulu Kalunga wendekele kuli yange ngwendi,

¹⁴ “Ambululeni mu vinganda vya Ingito, na mu Mingendole, na mu Mefise, na mu Tafanehese ngweni, ‘Livwaeseleni cimweja mukulyamena yeni vavenya, vyoshe vije vimuli navyo vikanyongela mu nzita!

¹⁵ Omo vikajo Apise njambi yeni muka-nzili nau? Shukulu Kalunga namuwisila asi!’

¹⁶ Mashwalale veni vanatanuka ali umo na mukwavo ngeci vanau, co valyendekesa umo na mukwavo ngwavo, ‘Induka! Tutewele ku lifuti lyetu, tuputumuke ku mukwale wa citozi!’

¹⁷ “Lukeni mwene wa Ingito lizina lyaliha ngweni, ‘Kujokota manene oloni kesi kupanga.’

¹⁸ Yange Kalunga Muka-nzili yoshe, yange mwene. Yange Njambi wakuyoya. Ngwe kaposhi ka Munkinda wa Tambole kali akamwa ya minkinda, ngwe Munkinda wa Kalemele wemana lwii ku ngenge ya mema a kalunga, mukemwo muyikapwa nzili ya uje akamilwisa.

¹⁹ Yeni vanu vaka-Ingito, livwaeseleni cimweja kupwa vinzinda! Mefise ikapwa mambo, ngundu muje munajeneka munu wakukalamo.

²⁰ Ingito napu ngwe ngombe wa lwavo wamuvwa, oloni limu wa ku kunto namushumu.

²¹ Nameme mashwalale vayo vakukumuna kuvesi na seo yai, vanafu ngwe vana va vingombe. Kuvasele kwimana nakulwa omo litangwa lya tuyando twakama lyetele, voshe vakengeseleko nima nakutewa, simbu yavo yakuvanyanyamesa inete.

²² Ingito ilinakutewa, ilinakulinga muyoyo ngwe linyoka alinakutewa, omo mbunga ya mashwalale vavangi valinakwija. Vamulwise na vinjaviti ngwe vanu valinakushinja miti,

²³ nakuviisa shwata yakuzika. Vanu vavo vavangi manene akuvalava, mashwalale vavo vanatumu kutuvakana vimbimba.

²⁴ Vanu va mu Ingito valinakuvazivisa shwamwa, vanu va ku kunto vanavafungulula, Yange Kalunga, njinendekamo.”

²⁵ Shukulu Kalunga Muka-nzili yoshe, Njambi ya Isalele, nendeka ngwendi, “Njikanyanyamesa Amoni, njambi ya Tevese, amolika na vanu va mu Ingito na vinjambi vavo na vimyene vavo. Njikatwala mwene wa Ingito na voshe vaje vamukulaela,

²⁶ nakuvakundika ku mavoko a vaje vashaka kuvatsiya, kuli Mwene Nevukaneza wa Mbambilone na ku mbunga ya mashwalale vendi. Oloni kulutwe, vanu vakakala lalo mu Ingito, ngwe muje muvakelemo laja ku visimbu vya kunima. Yange Kalunga, njinendekamo.”

Shukulu Kalunga akamena vanu vendi

²⁷ “Vanu vange kesi muzive lyova, vanu va Isalele kesi mujaje embwe. Njikamipatula mu lifuti lije lya kulyala, mu lifuti lije mwakele mu vunzinda. Mukeluka lalo kwimbo nakukala mu kwoloka, mukakala mwamuvwa, co naumo wai akamizivisa lyova.

²⁸ Njikaija kuli yeni nakumyamena, njikanyongesa miyati yoshe ya vanu kuje kunjamishandwelele, oloni yeni kunjikaminyongesa embwe. Njikamyecela ngoco kuminyanyamesa, oloni omo njiminyanyamesa, co njikamizivila mema ku mbunge. Yange Kalunga, njinendekamo.”