Njelemiya 44 - Livulu lya Shukulu Kalunga

Majwi a Shukulu Kalunga kuli vaIsalele vali mu Ingito

¹ Shukulu Kalunga wendekele kuli yange ali vanu va Isalele voshe vaje vakele mu Ingito, mu vinganda vya Mingendole, na Tafanehese, na Mefise, na ku mutambela wa ku mbwela ya lifuti.

² Shukulu Kalunga Muka-nzili yoshe, Njambi ya Isalele, wendekele ngwendi, “Yeni voshe mwamwene vukalu vwoshe vuje njanenele a Yelusalema, na ku vinganda vyoshe mu Yunda. Nameme ololo anga vinapu vingundu, naumo wai wakalamo,

³ omwo vanu vamwo valingile vuvi, co vanjiluvalesele. Vanakombelela vin̄ombelo ku vinjambi veka, nakupangela vinjambi vaje nambe vakevo, nambe yeni, nambe vakukulwila veni kuvavalemesele.

⁴ Njakele nakumitumina vangamba vange vaka-kwimanena, vaje vamilekele ngwavo kesi mulinge cuma cije cakukomokesa cinjazinda.

⁵ Oloni yeni kumwatolililile nambe kumbako mbunge. Yeni kumwombilile vilinga vyeni vyakukombelela ku vinjambi veka.

⁶ Ngecivene, kuluvala kwange na vukalu vwange vwashwamene a vinganda vya mu Yunda na a vitapalo vya mu Yelusalema, co njavyenyekele na tuhya. Ololo vinapu vingundu vyakukomokesa na ku litangwa lya lelo.

⁷ “Ngecivene, yange Kalunga Muka-nzili yoshe, Njambi ya Isalele, njimihula ngwange, omwo vikajo mulinakulinga vuvi vwa cifwa cangacije? Kuma yeni mushaka kunena vukalu ali vanalume, na vanakazi, na vanike, na vimbututu, ngeci naumo wai wa ali vanu veni akasaleo?

⁸ Omwo vikajo mulinakunjiluvalesa akulemesa tumponya, na a kukombelela ku vinjambi va mu Ingito muje mumunaija nakukala? Kuma mulinakulinga evi ngeci mulinyongese yeni vavenya, ngeci miyati ya vanu voshe va ano asi vamishendumune, co lizina lyeni lipwe cisingo ndi?

⁹ Kuma munevala vyuma vya kupenga-penga vyoshe vije vivalingile vakukulwila veni mu vinganda vya mu Yunda, na mu vitapalo vya mu Yelusalema, vije vivalingile vimyene va mu Yunda na mashano vavo, neni, na vanakazi veni?

¹⁰ Oloni na ku litangwa lya lelo kumwalikeesele. Kumwanjisingimikile embwe, nambe kuyoya ngwe ku mashiko oshe aje anjamyanene yeni na vakukulwila veni.

¹¹ “Ngecivene, yange Kalunga Muka-nzili yoshe, Njambi ya Isalele, njikamitengulukila nakunyongesa Yunda yoshe.

¹² Ngwe ali vanu va mu Yunda vaje vanasala, vaje vali na cizango cakuya nakukakala ku Ingito, voshe njikavanyongesa, vanike na vakulunu voshe, vakatsila mu Ingito, mu nzita, nambe ku njala ya lyangengela. Vakapwa vanu va vunyengwe, vanu va mafuti eka vakavashendumuna, co lizina lyavo likapwa cisingo.

¹³ Njikanyanyamesa vaje vali mu Ingito, ngwe munjanyanyamesele Yelusalema na nzita, na njala ya lyangengela, na mushongo.

¹⁴ Naumo wai wa ali vanu va mu Yunda vaje vasaleleo vaile kukakala ku Ingito vakayoya nambe kwiluka ku Yunda, kuje valinakushaka ngeci vakakaleko lalo simbu yakama. Naumo wai akelukako kuvanga vavandondo lika.”

¹⁵ Co vanalume voshe vaje vazivukile ngwavo vanakazi vavo vakombelelele vin̄ombelo ku vinjambi veka, na vanakazi voshe vaje vemanene kuje, amo na vaIsalele vaje vakele mu mbwela ya lifuti lya Ingito, voshe vapwile mbunga yakama, omo vazivile vije vinjendekele, co vakumbulwile ngwavo,

¹⁶ “Yetu twavyana kutolilila ku vije viwutuleka mu lizina lya Shukulu Kalunga.

¹⁷ Tukalinga vyuma vyoshe vije twakulaesele ngwetu tukavilinga. Tukakombelela vin̄ombelo kuli njambi yetu wa munakazi, Lishano lya Mwilu, co tuketila vin̄ombelo vya vinyu kuli ikeye, ngwe yetu na vakukulwila vetu, na vimyene vetu, na vantwama vetu, valingile mu vinganda vya mu Yunda na mu vitapalo vya mu Yelusalema. Twakele na vyakulya vyavingi, co twakele mwamuvwa na vukalu vwai.

¹⁸ Oloni omo twalikelele kukombelela kuli Lishano lya Mwilu nakulikela kwitila vin̄ombelo vya vinyu kuli ikeye, co twajeneka vyuma vyoshe, co vanu vetu vanatsila mu nzita, nakulanduka ku njala ya lyangengela.”

¹⁹ Co vanakazi vendekele ngwavo, “Omo twakele mu Yunda, twakele nakwoca makende akulifwa na Lishano lya Mwilu nakukombelela vin̄ombelo kuli ikeye, nakwitila vin̄ombelo vya vinyu kuli ikeye, vanalume vetu vazivukile, co vatavele vije vitwalingile.”

²⁰ Asinoni njendekele kuli vanu voshe vanalume na vanakazi, vaje vanjikumbulwile mu ngila ya cifwa cangacije ngwange,

²¹ “Ngwe a vin̄ombelo vyeni na vakukulwila veni, na vimyene veni, na vantwama veni, na vanu va mu lifuti na mu vinganda vya mu Yunda na mu vitapalo vya mu Yelusalema, kuma mwayongola ngweni Shukulu Kalunga kavizivukile nambe kuvyanuka ndi?

²² Ku litangwa lya lelo vene, lifuti lyeni linapu vingundu, naumo wai alimo. Linapu lya vunyengwe, vanu vapangesa lizina lyamwo kupwa cisingo, omwo Shukulu Kalunga kasimpile a vilinga vyeni vya vuvi.

²³ Vukalu ovu vunaija ali yeni, omwo mwakombelelele vin̄ombelo ku vinjambi veka, co mwavulumwine ku mesho a Shukulu Kalunga kwononoka mashiko endi oshe.”

²⁴ Njalekele vanu voshe vunene vene vanakazi, vije Shukulu Kalunga Muka-nzili yoshe, Njambi ya Isalele, wendekele kuli vanu va mu Yunda vaje vakele mu Ingito ngwendi,

²⁵ “Yeni, na vanakazi veni, mwalisingile cikulaeso na Lishano lya Mwilu. Mwakulaesele ngeci mukakombelela vin̄ombelo, nakwitila milambu ya vinyu kuli ikeye, co mwanyungu cikulaeso ceni. Mwamuvwa nyungeni vikulaeso vyeni, nakunyunga lalo visingo vyeni!

²⁶ Oloni ololo tolilileni ku cisingo eci. Yange Kalunga, njalisingi mu lizina lyange lya nzili kuli yeni voshe vaIsalele muli mu Ingito ngwange, naumo wai lalo injikatavesa kupangesa lizina lyange akulisinga ngwendi, ‘Njilisinga ali Shukulu Kalunga wakuyoya wa Akamwa ya Vyoshe!’

²⁷ Kunjikamivezikisa embwe, oloni njikaminyongesa. Muvavoshe mukatsa ku nzita, nambe ku mushongo, naumo wai wa ali yeni akasalao.

²⁸ Oloni vavandondo lika vakaputumuka ku kutsa, vakatunda ku Ingito nakwiluka ku Yunda. Asinoni vaje vakayoyao vakazivuka ngwavo majwi eyajo anapu a vushunga, ange ndi avo?

²⁹ Yange Kalunga, njikamyana cizivukiso ngeci njikamiilwisila mu mwela uno, co cikulaeso cange cakunena vukalu ali yeni cikapwa ca vushunga.

³⁰ Njikakundika Mwene Hofela wa Ingito mu mavoko a vitozi vendi vaje vashaka kumutsiya, ngwe munjakundikile Mwene Zendekiya wa mu Yunda mu mavoko a Mwene Nevukaneza wa Mbambilone, uje wapwile citozi cendi, co washakele kumutsiya.”