Njelemiya 43 - Livulu lya Shukulu Kalunga

Njelemiya vamusindiya kuya ku Ingito

¹ Njamanesele kuleka vanu majwi oshe aje Shukulu Kalunga Njambi yavo, wanjitumineo kuvaleka.

² Oloni Azaliya muna Hoshaya na Yohanane muna Kaleya, na vanalume vamo va kulyalesa vendekele kuli yange ngwavo, “Ulinakwendeka vya makuli. Shukulu Kalunga Njambi yetu kakutumine ngeci utuleke ngwove kesi tuye ku Ingito.

³ Mbaluke muna Neliya ikeye alinakukushongangeya ngeci utwende vungungu, nakutwana mu mavoko a vaMbambilone ngeci vatutsiye, nambe kututwala vunzinda ku Mbambilone.”

⁴ Ngecivene, Yohanane na mbunga ya vakulunu va mashwalale, na vanu voshe kuvononokele majwi a Shukulu Kalunga ngeci vakale mu lifuti lya Yunda.

⁵ Asinoni Yohanane na mbunga yoshe ya vakulunu va mashwalale vatwalele vanu voshe vaje vasalele mu Yunda ku Ingito, amolika na vanu voshe vaje velukile kutunda ku mafuti kuje vashandokelele,

⁶ vanalume, na vanakazi, na vanike, na vana va vimyene va vanakazi. Vatwalele voshe vaje vasezele Nevuzalandane mukulunu wa vaka-kunyunga mu mavoko a Ngendaliya ngeci avanyunge mwamuvwa, amo na Mbaluke nange.

⁷ Mbunga ya vanu ava vaile ku lifuti lya Ingito omwo kuvononokele mashiko a Shukulu Kalunga, co vaile ku Ingito nakukakala mu nganda ya Tafanehese.

⁸ Co kuje vene ku Tafanehese Shukulu Kalunga wendekele kuli yange ngwendi,

⁹ “Njelemiya, nona mamanya akama, ashitike kulutwe lwa cikolo ca njuvo ya vaka-kushwana muno mu nganda, co tava vaIsalele vamone vije viwulinga.

¹⁰ Asinoni valeke ngwove yange Kalunga Muka-nzili yoshe, Njambi ya Isalele, njikanena ngamba yange Mwene Nevukaneza wa ku Mbambilone ku mutambela uno, co njikaka litanda lyendi akamwa ya mamanya awa unashitika, co akashimbikilao mbalaka yendi ya vumwene.

¹¹ Nevukaneza akaija nakufungulula Ingito. Co vanu vaje vanavindama kutsa ku mushongo, vakatsa ku mushongo vene, co vaje vanavindama kuvatwala ku vunzinda, vakavatwala vene ku vunzinda, co vaje vanavindama kuvatsiila mu nzita, vakavatsiila vene mu nzita.

¹² Akenyeka vinjuvo vya vinjambi va Ingito, akenyeka vinjambi vavo, nambe kuvatwala ku vunzinda. Ngwe kanyungi atwena viina a vuzalo vwendi, ngecivene, mwene wa Mbambilone akajelesa lifuti lya Ingito, co akatundamo mu kwoloka.

¹³ Ikeye akanyongesa tumponya twa ku Helyopolise mu Ingito nakwenyeka lalo vinjuvo vya vinjambi va Ingito.”