Njelemiya 42 - Livulu lya Shukulu Kalunga

Vanu vehula Njelemiya ngeci avalombelele

¹ Asinoni mbunga yoshe ya vantwama va mashwalale, kuwezelelako Yohanane muna Kaleya, na Azaliya muna Heshaya, vezile na vanu kushangumuka ku vavandondo nakweta ku vakama,

² co vendekele kuli yange ngwavo, “Mwane tulingile vije vitukulomba. Tulombelele kuli Shukulu Kalunga Njambi yetu. Tulombelele yetu voshe tunasalao na mwonyo. Twapwile tuvavangi, oloni ololo twasalao lika tuvavandondo, ngwe muwamwena.

³ Lombela ngeci Shukulu Kalunga Njambi yetu, atumwese ngila itunapande kuya, na vije vitunapande kulinga.”

⁴ Co njakumbulwile ngwange, “Mwamuvwa manene, njikalombela kuli Shukulu Kalunga Njambi yetu, ngwe mumunalombo, mwoshe mwakendeka, njikamileka, co kunjikamishwekela cuma nacimo cai.”

⁵ Asinoni vendekele kuli yange ngwavo, “Shukulu Kalunga apwe wa vushunga na mukaleo wa kulongwa, mukutulwisa nga kutwononoka mashiko oshe aje Shukulu Kalunga Njambi yetu akakwana omwo yetu.

⁶ Nameme vene nga kesi vije tushaka kulinga, anga vene tukononoka Shukulu Kalunga Njambi yetu, uje tulinakwihula yove ngeci utulombeleleko. Cikapwa cacivwa kuli yetu omo twononoka lijwi lya Shukulu Kalunga Njambi yetu.”

Shukulu Kalunga akumbulula lilombelo lya Njelemiya

⁷ Munima ya matangwa likumi, Shukulu Kalunga wendekele kuli yange,

⁸ co njasanene Yohanane, na mbunga yoshe ya vantwama va mashwalale vaje vakele amolika nange, na vanu veka.

⁹ Co njendekele kuli vakevo ngwange, “Shukulu Kalunga, Njambi ya Isalele, kuje mwanjitumine ngeci njikamihwileye nendeka ngwendi,

¹⁰ ‘Nga muli na cizango cakukala muno mu lifuti, co yange njikamivezikisa, co wai akamipesa, njikamikongweya kunjikamishandola embwe. Co cihiso cije cinjinanena ali yeni canjinenesa vusiwa vwakama.

¹¹ Kesi muzivile lyova mwene wa Mbambilone. Yange njili amo neni, co njikamyamena ku nzili yendi.

¹² Omwo njili na mema ku mbunge, njikamupangesa ngeci amizivileko mema ku mbunge, ngeci amitave mwiluke kwimbo. Yange Kalunga, njinendekamo.’

¹³ “Nameme ngoco nga mwendeka ngweni, ‘Kutukakala muno mu lifuti, co lalo kutukononoka Shukulu Kalunga Njambi yetu,’

¹⁴ co nga mwendeka ngweni, ‘Embwe, tukaya nakukala mu Ingito, muje kutukamono nzita lalo, nambe kuziva malupembo, nambe makende,’

¹⁵ ngecivene, yeni vanu va mu Yunda munasalao tolilileni lijwi lya Shukulu Kalunga, omu mukemwo mwanendeka Shukulu Kalunga Muka-nzili yoshe, Njambi ya Isalele, ngwendi, ‘Nga mwalivwaesela cimweja kuya nakukakala mu Ingito,

¹⁶ co nzita ije mulinakutewa ikamiwanena a ngila, co njala ya lyangengela ije mulinakutewa ikamikola, co mukatsila muje mu Ingito.

¹⁷ Vanu voshe vaje vanalivwaesela cimweja kukakala mu Ingito vakatsila mu nzita, nambe kulanduka ku njala ya ya lyangengela nambe kutsa ku mushongo. Naumo wai wa ali vakevo akasalao, naumo wai akaputumuka ku vukalu vuje vunjikanena ali vakevo.’

¹⁸ “Shukulu Kalunga, Njambi ya Isalele alinakwendeka ngwendi, ‘Ngwe muje njaluvalele na vanu va Yelusalema, ngecivene, njikaluvala lalo neni nga yeni muya ku Ingito. Mukakala mu vukalu vwakama manene, co vanu vakamishendumuna, nakupangesa lizina lyeni kupwa cisingo. Nalumo lwai lalo mukamona mutambela uno.’ ”

¹⁹ Co njendekele ngwange, “Shukulu Kalunga namileka yeni mwasalao mu Yunda ngwendi kesi muye lalo ku Ingito. Co yange njilinakuminangula ngwange

²⁰ mwaviisile manene. Mwanjitumine kuli Shukulu Kalunga Njambi yeni nakwendeka ngweni, ‘Tulombelele kuli Shukulu Kalunga Njambi yetu, nakutuleka vyuma vyoshe vije vyanendeka, co tukavyononoka.’

²¹ Co ololo njinamileka, oloni kumwesi nakwononoka vyuma vyoshe vije vyananjitumu Shukulu Kalunga Njambi yetu ngeci njimileke.

²² Ngecivene, anukeni evi, mukatsila mu nzita nambe kulanduka ku njala ya lyangengela, nambe kutsa ku mushongo mu lifuti muje mushaka kuya nakukakalamo.”