Njelemiya 41 - Livulu lya Shukulu Kalunga

¹ Mu ngonde yamucitanu na vivali ku mwaka uje vene, Ishimela, muna Netaniya mutekulu wa Elishama, wa ku naanga ya vumwene, uje wapwile umo wa vakulunu vakama va mwene, waile ku Mizipa na vanalume likumi mukumona Nguvulu Ngendaliya. Omo voshe vakele nakulya vyakulya amo,

² Ishimela na vaje vanalume likumi vezile nendi, vashomwene mikwale yavo, co vatsiile Ngendaliya.

³ Ishimela watsiile lalo vaIsalele voshe vaje vakele amo na Ngendaliya ku Mizipa, nakutsiya lalo mashwalale va Mbambilone vaje vakele kuje.

⁴ Alikaki, simbu kanda vanu vazivuke kutsa kwa Ngendaliya,

⁵ vanalume makumi atanu na atatu vetele kutunda ku Shekeme, na ku Shilo, na ku Samaliya. Vatewile minjezi yavo, nakutavozola vuzalo vwavo, nakulilengozola a mivila yavo. Vezile na vimbuto vya vinona, na insense vyakukombelela mu Njuvo ya Shukulu Kalunga.

⁶ Ngecivene, Ishimela watundile ku Mizipa wavasheshele, wakele nakulila omo wavasheshele. Omo wetele kuli vakevo, wendekele ngwendi, “Mwane ijeni mwakumone Ngendaliya.”

⁷ Co omo vakovelele mu nganda, Ishimela na vanu vendi vavatsiile, vavombilile mu lisima.

⁸ Oloni muje mu munga mwakele vanalume likumi vendekele kuli Ishimela ngwavo, “Mwane kesi ututsiye! Tuli na tiliku, na mbale ya maumwa, na mazi a olive, na vuki twavishweke mu shwata.” Ngecivene, wavasezeleo.

⁹ Mu lisima muje mwombilile Ishimela mivila ya vanu vaje vatsiile lyapwile lyakama manene, Mwene Asa ikeye waliindile omo vamulwisile kuli Mwene Mbasha wa mu Isalele. Co Ishimela washulisile lije lisima na mivila ya vanu vaje vatsiile.

¹⁰ Ngecivene, wapwisile vana va vimyene va vanakazi vinzinda, na vanu voshe vaje vasaleleo ku Mizipa, vaje Nevuzalandane muka-kushika wa mukulunu wavaakele mu mavoko a Ngendaliya. Ishimela wavapwisile vinzinda, co waile ku lifuti lya Amoni.

¹¹ Yohanane, na vatwama voshe va mbunga ya mashwalale vaje vakele amo nendi vazivile mulonga uje wavulumwine Ishimela.

¹² Ngecivene, vamukavele amo na vanu vavo, co vamukwatelele kuyehi na lishali lyakama ku Ngimbiyone.

¹³ Omo vaje vinzinda va Ishimela vamwene Yohanane ali amo na vantwama va nzita, co vavwaelelele,

¹⁴ co vatengulukile vaile kuli Yohanane.

¹⁵ Oloni Ishimela na vanu vendi vatanu na vatatu, vatewele Yohanane, co vakavandele mu lifuti lya Amoni.

¹⁶ Asinoni Yohanane amo na vantwama va nzita vaje vakele nendi, vakele na moko yakunyunga vaje vanu vapwisile Ishimela vinzinda kuvatundisa ku Mizipa, omo natsii laja Ngendaliya, na mashwalale, na vanakazi, na vanike, na vayunuke.

¹⁷ Ngecivene, vaile, co vetele ku Cinehame, kuyehi na ku Mbetelehema, ngeci vaye ku Ingito.

¹⁸ Vazivile lyova lya vaMbambilone omwo Ishimela watsiile Ngendaliya, uje yapwisile nguvulu wa mu Mbambilone mwene wa lifuti.