Njelemiya 4 - Livulu lya Shukulu Kalunga

VaIsalele vavasana ngeci vatenguluke

¹ Shukulu Kalunga alinakwendeka ngwendi, “Vanu va Isalele, nga mushaka kutenguluka, tengulukileni kuli yange. Nga munjikulaela nakutundisa tumponya tuje tunjazinda,

² cikapwa ca vushunga kulisinga mu lizina lyange. Asinoni miyati ya vanu voshe vakanjilomba ngeci njivavezikise, co vakanjishangazala.”

³ Shukulu Kalunga alinakwendeka kuli vanu va mu Yunda na vanu va mu Yelusalema ngwendi, “Limeni mahya eni aje kumwalimine, kesi mukune vimbuto mu mambimbo.

⁴ Nyungeni cikumiiyo ceni nange Kalunga keni, co likundikeni kuli yange, yeni vanu va mu Yunda neni vanu va mu Yelusalema. Nga kumulingimo, co vukalu vwange vukashukuma ngwe tuhya, omwo a vyuma vyavivi vije vimunalingi, mwa vushunga vene vukashukuma, naumo wai akavuzima.”

Yunda vamushungwiya kumulwisa

⁵ Imbeni lupembo mu lifuti mwoshe! Tambekeni manene, ngeci vamizive! Lekeni vanu va mu Yunda na vanu va mu Yelusalema vashatukile ku vinganda vya mu cimpaka.

⁶ Junduleni pandelo muleke vanu vaye ku Siyone! Yeni mukavande! Kesi mwishwale embwe! Shukulu Kalunga alinakunena tuyando twakama, nakunyongesa kwakama kutunda ku kunto.

⁷ Ngwe ndumba atunda ku mwela wanavutama, muka-kunyongesa miyati ya vanu nakatuka laja. Alinakwija mukunyongesa Yunda. Vinganda vya Yunda vikasala vyamupulungwa, co naumo wai akakalamo.

⁸ Ngecivene, zaleni vikeleya, co lileni nakumbolozoka omwo vukalu vwakukomokesa vwa Shukulu Kalunga, vuli ali Yunda.

⁹ Shukulu Kalunga wendekele ngwendi, “A litangwa lije omo vyuma evi vikasholoka, vimyene na vamyata vakazeya mu vimbunge vyavo, vaka-kukombelela vakalijujukila, co vaka-kwimanena vakalikomokela.”

¹⁰ Asinoni njendekele ngwange, “Yove Shukulu Kalunga wa Akamwa ya Vyoshe, mwa vushunga unakwisa vanu va mu Yelusalema akwendeka ngwove kukakala kwoloka, oloni mukwale anga ucili ku milivu yavo.”

¹¹ Simbu ilinakwija omo vanu va mu Yelusalema vakavaleka ngwavo lihunzi lya ntwima lyakutunda mu mambo lilinakuhuwila nakushungama ali vanu vange. Kulikapu lihunzi lyakuhuwa mwamuvwa lyakupekumuna vishwashwa lika embwe,

¹² oloni likapwa lihunzi lya nzili manene lije lyakashika Shukulu Kalunga! Shukulu Kalunga vavenya ikeye alinakutumbula cisompelo a vanu vendi.

Yunda vanamuzengeleka vitozi

¹³ Kengeni, citozi alinakwija ngwe mashelwa. Matemba endi a nzita anapu ngwe kankumba, co tuvalu twendi vashatuka manene kutuvakana vingonga. Ngongo yetu! Tunanyongo!

¹⁴ Yelusalema, kusha vuvi vuli mu mbunge yove ngeci wovoke. Visimbu vingaijo ukatumba matumbe amavi?

¹⁵ Miluwa vakutunda ku nganda ya Ndane vakwavo vakutunda ku malundu a Efalime vanaija mukwambulula muzimbu wauvi.

¹⁶ Vanaija mukunangula vanu nakuleka vaka-Yelusalema ngwavo vitozi valinakwija kutunda ku lifuti lya kulyala. Vitozi ava vakatambeka nakulwisa vinganda vya Yunda,

¹⁷ co vakazengeleka Yelusalema ngwe vanu vanyunga lihya, omwo vanu vamwo vanatengulukila Shukulu Kalunga nakumulwisa. Shukulu Kalunga nendekamo.

¹⁸ Yunda, yove vavenya walikokela evi a ngila yakuyoya kwove, na a vyuma vije viwunalingi. Vuvi vwove vukevwo vunanena tuyando otu, ngeci vunakuzivisa ku mbunge kuvavala.

Vusiwa vwa Njelemiya ali vanu vendi

¹⁹ Kekange! Kuvavala! Kunjasa kwoloka! Mbunge yange ilinakulwa manene! Omwo njinazivi malupembo na muyoyo wa nzita.

²⁰ Tuyando tulinakulikavasana, lifuti lyoshe lyasala mupulungwa. Ololo vimbalaka vyetu vinanyongo, mavamba avyo anatavozoka tavu-tavu.

²¹ Visimbu vingaijo njikamona vipandelo vya vitozi, nakuziva kusika kwa malupembo?

²² Shukulu Kalunga alinakwendeka ngwendi, “Vanu vange vanapu vilema kuvanjizivuka. Vanafu ngwe vanike va vilema, vaje kuvesi na mana. Vazivuka manene kulinga vyavivi, oloni kuvazivuka kulinga vyavivwa.”

Cimona ca Njelemiya ca cihiso cilinakwija

²³ Njakengele asi, co apwile angoco-ngoco. Njakengele mwilu, co kumwakele ceke.

²⁴ Njakengele ku minkinda, co yakele nakujaja, na malundu akele nakuninganga.

²⁵ Njamwene ngeci kukwakele vanu, nameme tuzila vapululwile kulyala.

²⁶ Lifuti lya vwilo lyapwile mambo, na vinganda vyalyo vyasiwukile, omwo vukalu vwakama vwa Shukulu Kalunga.

²⁷ (Shukulu Kalunga nendeka ngwendi kaye koshe kakapwa mambo, oloni kukakanyongo embwe.)

²⁸ Kaye kakalila, co lilu likazivala. Shukulu Kalunga nendekamo, co kakatengulula viyongola vyendi. Mukemwo mwanayongola, co kakatengululako mweka lalo.

²⁹ Akuziva muyoyo wa vaka-kulonda a tuvalu na vaka-mata a lusipa, co vanu voshe vakatewela kulyala. Vamo vakatewela mu shwata, vakwavo vakavanda mu mamanya. Vinganda vyoshe vikasala vyamupulungwa, co naumo wai lalo akakalamo.

³⁰ Yelusalema, unanyongo! Omwo vikajo uzalela vyakuvenga? Omwo vikajo uzalela vya senga nakukwita mufwitilo ku mesho ove? Ulisina ngoco kulivwaesa! Vaka-cizemo cove vanakuvyana, vashaka kukutsiya.

³¹ Njazivile muteto ngwe wa munakazi ashaka kukita, muteto ngwe wa munakazi ashaka kukita munendi wa ntwatwa. Wapwile muteto wa Yelusalema wakuhwimangana, nakulombela ngeci vamukwase, co endeka ngwendi, “Njinanyongo! Valinakwija mukunjitsiya!”