Njelemiya 39 - Livulu lya Shukulu Kalunga

Kuwa kwa Yelusalema

¹ Mu ngonde yamulikumi, mu mwaka wamucitanu na iwana uje Zendekiya wapwile mwene wa mu Yunda, Mwene Nevukaneza wa Mbambilone wezile na mbunga ya mashwalale nakulwisa Yelusalema.

² A litangwa lyamucitanu na awana ku ngonde yamuciwana yapwisile Zendekiya myaka likumi naumo a vumwene, co vaMbambilone valundumwine vivumbe vya nganda.

³ Omo vafungulwile Yelusalema, vamyata vakama voshe va mwene wa Mbambilone, Nelengale Salezele, na Samengale Nembo, na Salesekime, na mukwavo Nelengale Salezele vezile nakutambula myela yavo ku Cikolo ca Mukati.

⁴ Omo Mwene Zendekiya na mashwalale vendi voshe vamwene vije vyakele nakulingiwa, co vesekele kutewa mu nganda a simbu ya vutsiki. Vaililile mu ngila ya citungu ca vumwene, co vetilile mu ngila ya mu cikolo ije yakulishwata mukati ka vivumbe vivali, nakutewela ku mutambela wa Cana ca Ndonga ya Yondau.

⁵ Oloni mbunga ya mashwalale va Mbambilone vavakavele, co vakakwatelele Zendekiya ku vyana vya kuyehi na Yeliko. Co vamutwalele ku nganda ya Limbela mu lifuti lya Hamate, co kuje Nevukaneza wamusompele nakumuwana ngeci ali na mulonga.

⁶ Kuje vene Nevukaneza watsiile vana va Zendekiya oku ishavo navakengelela, co lalo vamyata va mu Yunda vavatsiile.

⁷ Munima yevi, Zendekiya vamucakuvwile mesho, nakumukuta malyenge, ngeci vamutwale ku Mbambilone.

⁸ A simbu ije vene, vaka-Mbambilone venyekele lipela lya mwene, na vinjuvo vya vanu, nakusiwula vivumbe vya Yelusalema.

⁹ Akukotoka Nevuzalandane, muka-kushika wa vaka-kunyunga watwalele vaje vasalele mu nganda ku Mbambilone kupwa vinzinda, amolika na vaje valiitile kuli Nevukaneza.

¹⁰ Co wasezele vamo vanu mu lifuti lya Yunda vaje vapwile tuutu, co wavanene vitungu vya mikolovozi ya vushuka vwa vinyu na mahya.

Njelemiya vamwecela

¹¹ Oloni Mwene Nevukaneza washikile Nevuzalandane, muka-kushika wa vaka-kunyunga kwana mashiko awa ngwendi,

¹² “Yeni mukashake Njelemiya, co munyungeni mwamuvwa. Kesi mumuvulumune embwe, oloni mulingileni vyoshe vije vyashaka.”

¹³ Ngecivene, Nevuzalandane, amolika na vaje vamyata vakama, Nevushazevane, na Nelengale Salezele, na voshe vakulunu veka va mwene wa Mbambilone,

¹⁴ vakanjishakele ku cipango ca vaka-kunyunga lipela. Co vanjikundikile kuli Ngendaliya muna Ahikame mutekulu wa Shafane ngeci anjinyunge nakunjetesa kwimbo mwamuvwa, ngecivene, njakakele kuje amolika na vanu va Yunda vaje vasaleleo.

Cinyangavili ca Evendemeleke

¹⁵ Omo njakele mu kamenga mu cipango ca vaka-kunyunga lipela, co Shukulu Kalunga wanjilekele,

¹⁶ ngeci njileke Evendemeleke kaSundane ngwange Shukulu Kalunga Muka-nzili yoshe, Njambi ya Isalele, nendeka ngwendi, “Ngwe munjendekele ngwange njikanena cihiso a nganda eyi, kunjikanene vuvwa embwe. Omo vyuma evi vikalingiwa, co ukavimona.

¹⁷ Oloni yange Kalunga, njikakunyunga, oloni kuvakakwana ku mavoko ava vanalume vaulinakuzivila lyova.

¹⁸ Njikakunyunga mwamuvwa, co naumo wai akakutsiya. Ukayoya, omwo unaka cinyangavili cove muli yange. Yange Kalunga, njinendekamo.”