Njelemiya 38 - Livulu lya Shukulu Kalunga

Njelemiya vamwaka mu lisima lyakuma

¹ Shefatiya muna Matane, na Ngendaliya muna Pashehule, na Njehukale muna Shelemiya, na Pashehule muna Malekiya vazivile ngeci njakele nakuleka vanu ngwange,

² Shukulu Kalunga nendeka ngwendi, “Woshe akakala muno mu nganda akatsa ku nzita, nambe kulanduka ku njala ya lyangengela, nambe ku mushongo. Oloni woshe uje aya nakuliita kuli vaMbambilone, kuvakamutsii embwe, akayoya.”

³ Co lalo njavalekele ngwange Shukulu Kalunga nendeka ngwendi, “Njikana nganda eyi ku mashwalale va Mbambilone, co vakevo vakaifungulula.”

⁴ Asinoni vamyata vaile kuli mwene nakwendeka ngwavo, “Njelemiya vanapande kumutsiya, omwo akwendeka kwendi ngeci alinakujujwisa mashwalale va mu nganda, co alinakulinga cuma cimolika kuli munu na munu uje nasala mu nganda. Njelemiya kesi nakukwasa vanu, oloni ashaka lika kuvavavalesa ku vimbunge.”

⁵ Ngecivene, Mwene Zendekiya wavakumbulwile ngwendi, “Lingeni mwoshe mumushakela kulinga nendi, yange kunjasa kumivindika embwe.”

⁶ Ngecivene, vanjitwalele, vanjikutile mikole nakunjisosela mu lisima lya muna mwene Malekiya, lije lyakele mu cipango ca vaka-kunyunga lipela. Muje mu lisima kumwakele mema, kuvanga lindova lika, co njambombomanene mu lindova.

⁷ Nameme ngoco, Evendemeleke kaSundane, kayunuke uje wakele nakupanga mu lipela lya vumwene, wazivile ngeci vananjaka mu lisima. A simbu ije mwene wakele mu mbanja ku Cikolo ca Mbenjemani.

⁸ Ngecivene, Evendemeleke waile kuli mwene nakwendeka nendi ngwendi,

⁹ “Shukulu yange, eci vanalingi ava vanalume cinapu cacivi. Vanaaka Njelemiya mu lisima, muje nasa kutsilamo na njala nga muno mu nganda mukajeneka vyakulya.”

¹⁰ Asinoni mwene washikile Evendemeleke kuya amo na vanalume vatatu nakunjitundisa mu lisima simbu kanda njitse.

¹¹ Ngecivene, Evendemeleke waile na vanalume vaje ku lipela ku njuvo yakutulikila vyuma, co wakanonele vuzalo vwalaja vwakusanyozoka, nakuvusosela kuli yange na mikole.

¹² Co wanjilekele ngeci njake vuje vuzalo vwakusanyozoka mu vin̄ondondwa vyange, ngeci mikole kesi injivulumune. Njalingile ngacije vene.

¹³ Co vanjikokele nakunjitundisa mu lisima. Munima yevi, vanjinyungilile mu cipango ca vaka-kunyunga lipela.

Zendekiya alomba Njelemiya kumunangula

¹⁴ A simbu ikwavo, Mwene Zendekiya washikile ngeci vanjinene kuli ikeye, ku cikolo camucitatu ca ku Njuvo ya Shukulu Kalunga, co wendekele ngwendi, “Njikwihula cihula, njishaka unjileke vushunga vwoshe.”

¹⁵ Njamukumbulwile ngwange, “Nga njikuleka vushunga, co ukanjitsiya, nameme nga njikunangula, anga vene kuumbuko mbunge.”

¹⁶ Ngecivene, Mwene Zendekiya wanjikulaesele mu vushweke ngwendi, “Njilisinga ali Njambi wakuyoya, Njambi uje watutangele, ngwange kunjikakutsii embwe, nambe kukwaka mu mavoko a vanalume vaje vashaka kukutsiya.”

¹⁷ Asinoni njalekele Zendekiya ngwange Shukulu Kalunga Muka-nzili yoshe, Njambi ya Isalele nendeka ngwendi, “Zendekiya nga uliita kuli vamyata va mwene wa Mbambilone, kuvakakutsii, na nganda eyi kuvakayenyeka, yove na naanga yove mukayoya.

¹⁸ Oloni nga kuuliiti, co nganda eyi vakayana ku mavoko a vaMbambilone, ngeci vakayenyeke, co yove vakakukwata kupwa cinzinda.”

¹⁹ Oloni mwene wakumbulwile ngwendi, “Yange njili na lyova lya vaYunda vaje vatewelele kuli vaMbambilone, amo vakanjana ku mavoko ava vaYunda, co vakanjiyandesa manene.”

²⁰ Co njamukumbulwile ngwange, “Naumo wai akakwana ku mavoko a vaYunda. Yange njikulomba lika ngwange wononoke majwi a Shukulu Kalunga, co vyuma vyoshe vikapwa vyavivwa kuli yove, co vakakuseza na mwonyo.

²¹ Oloni Shukulu Kalunga nanjimwesa laja mu cimona vije vikalingiwa nga uvyana kuliita.

²² Mu cimona eci, njinamwene vanakazi voshe vaje vasalele mu lipela lya vumwene vwa Yunda, valinakuvatwala kuli vamyata va mwene wa Mbambilone. Omo vaile vakele nakwendeka ngwavo, ‘Vasamba va mwene va a mbunge vaje vakulaelele vanamukwisa nakumufungulula. Ololo myanja yendi omo inakovela mu mandova, vanamuseze endi lika.’ ”

²³ Asinoni njamulekele ngwange, “Vanakazi vove voshe na vana vove vakavatwala kuli vaMbambilone, nove lalo kuukaputumuka ku mavoko avo. Vakakutwala mu vunzinda kuli mwene wa Mbambilone, co nganda eyi vakayenyeka njwa.”

²⁴ Zendekiya wakumbulwile ngwendi, “Njelemiya, kesi ulekeko munu umo visimutwiya evi, kuvakakutsii.

²⁵ Nga vamyata vakaziva ngwavo njasimutwiya nove, co vakaija kuli yove nakukwihula vika tunasimutwiya. Vakevo vakakukulaesa ngeci kuvakakutsii nga uvaleka vyuma vyoshe.

²⁶ Nga vakwihula valeke lika ngwove unakele nakunjilomba ngeci kesi njikwilwisile lalo mu kamenga ku njuvo ya Yonatana nakukatsilamo.”

²⁷ Ngecivene, vamyata voshe vezile kuli yange nakunjihula, co njavalekele vene vije vyanjilekele mwene ngeci njivyendeke. Co nacimo cai civalingile, omwo naumo wai wazivile vije vitwasimutwiiye.

²⁸ Co vanjinyungilile mu cipango ca vaka-kunyunga lipela, noo litangwa lije vafungulwile Yelusalema.