Njelemiya 37 - Livulu lya Shukulu Kalunga

Cihula ca Zendekiya kuli Njelemiya

¹ Mwene Nevukaneza wa Mbambilone wengisile Zendekiya muna Yosiya mwene wa mu Yunda mu mwela wa Yehoyakine muna Yehoyakime.

² Oloni Zendekiya, na vamyata vendi, na vanu va mu Yunda kuvononokele lijwi lya Shukulu Kalunga lije lyanjanene.

³ Mwene Zendekiya watumine Njehukale muna Shelemiya na Zefaniya muka-kukombelela muna Maseya kunjihula ngeci njilombele kuli Shukulu Kalunga Njambi yetu kwimanena muyati wetu.

⁴ Aje te kanda vanjake mu kamenga, co njacikele nakulyendela ngoco akati ka vanu.

⁵ Mashwalale va Mbambilone vazengelekele Yelusalema, oloni omo vazivile ngwavo mashwalale va Ingito vanajomboka nginga ya Ingito, co velukilemo.

⁶ Asinoni Shukulu Kalunga, Njambi ya Isalele, wanjilekele kwendeka kuli Zendekiya ngwange,

⁷ “Mashwalale va Ingito valinakwija nakukukwasa, oloni vakeluka ku Ingito kwimbo lyavo.

⁸ Co vaMbambilone vakeluka lalo mukulwisa nganda, nakuyifungulula, nakuyenyeka.

⁹ Yange Kalunga, njiminangula ngwange kesi mulikwise, nakuyongola ngweni amo vaMbambilone vakeluka lalo embwe, mwa vushunga vene vakaija.

¹⁰ Nameme nga mukafungulula mbunga ya mashwalale va Mbambilone voshe, nakuseza lika vanalume vakuvetwa vanalala mu vimbalaka vyavo, oloni vanalume vaje vakuvetwa anga vene vakenduka nakwenyeka nganda eyi.”

Njelemiya vamukwata nakumwaka mu kamenga

¹¹ Mashwalale va Mbambilone vatundile mu Yelusalema omwo mashwalale va Ingito vashwenyele muyehi.

¹² Ngecivene, njatundile mu Yelusalema, co njaile ku lifuti lya Mbenjemani, kukatambula mutambela wa vufuko vwa ku naanga yange.

¹³ Oloni omo njetele ku Cikolo ca Mbenjemani, co mwata wa mashwalale uje wakele nakunyunga ku cikolo a simbu ije, lizina lyendi Iliya, muna Shelemiya mutekulu wa Hananiya, wanjivindikile nakwendeka ngwendi, “Yove ushaka kukalipandakana na vaMbambilone!”

¹⁴ Co njamukumbulwile ngwange, “Kesi ngoco embwe! Yange kunjesi nakutewesa.” Iliya kanjitolililile, oloni, wanjikwatele, nakunjitwala kuli vamyata.

¹⁵ Vamyata valuvalele manene nange, co vashikile mashwalale ngeci vanjipupe nakunjishokela mu njuvo ya Yonatana, muka-kusoneka wa mu mbanja, njuvo yendi ikeyo ivapwisile kamenga.

¹⁶ Vanjakele mu kamenga mwisi ya livu muje mwakele tumilili twakulishwata, co njakele muje simbu yakama.

¹⁷ Asinoni Mwene Zendekiya wanjisanene mu vushweke mu lipela lyendi, co wanjihwile ngwendi, “Kuli lijwi limo lyatundu kuli Shukulu Kalunga ndi?” Co njamukumbulwile ngwange, “Eyo kulili, Shukulu Kalunga akakwana ku mavoko a mwene wa Mbambilone!”

¹⁸ Co njamwihwile ngwange, “Mulonga ukajo unjavulumuna kuli yove nambe kuli vamyata vove nambe kuli vanu ava, wakunjakela mu kamenga?

¹⁹ Vikajo vyalingiwa kuli vaka-kwimanena vove vaje vakulekele ngwavo mwene wa Mbambilone kakaija nakukulwisa, nambe kulwisa lifuti lyove?

²⁰ Co ololo shukulu, njikulomba unjitolilile, nakulinga evi vinjikulomba. Shukulu kesi unjiilwisile lalo mu kamenga ku njuvo ya Yonatana. Nga ulingamo, co mwa vushunga njikatsila muje vene.”

²¹ Ngecivene, Mwene Zendekiya washikile ngeci vanjishokele mu cipango ca vaka-kunyunga lipela, co njakele muje, a litangwa na litangwa vakele nakunjana mukasha wa likende, watundile kuli vaka-kwoca makende, noo makende oshe ahwile mu nganda.