Njelemiya 36 - Livulu lya Shukulu Kalunga

Mbaluke alava livulu mu Njuvo ya Shukulu Kalunga

¹ Mu mwaka wamuciwana omo Yehoyakime muna Yosiya wapwile mwene wa mu Yunda, Shukulu Kalunga wendekele kuli yange ngwendi,

² “Nona livulu usonekemo vyuma vyoshe vinjinakuleke ali Isalele, na a Yunda, na a miyati yoshe. Co soneka vyuma vyoshe vije njakulekele, kutunda ku simbu yakulivanga ije njendekele kuli yove omo Yosiya wapwile mwene, kweta na simbu ino.

³ Amo omo vanu va mu Yunda vakaziva vije vyoshe vyavikalu vije vinjayongwele kunena ali vakevo, amo vakatenguluka kutunda ku vingila vyavo vyavivi. Asinoni njikavasambesa ku kupenga-penga kwavo na ku vivi vyavo.”

⁴ Ngecivene, njasanene Mbaluke muna Neliya, co njamulekele ngeci asoneke vyuma vyoshe vije Shukulu Kalunga wendekele kuli ikeye. Co Mbaluke wavisonekele vyoshe mu livulu.

⁵ Asinoni njalekele Mbaluke ngwange, “Yange kuvakanjitavesa lalo kukovela mu Njuvo ya Shukulu Kalunga.

⁶ Oloni yange njishaka yove Mbaluke uye a simbu ije omo vanu vazila kulya. Ya ukalave livulu eli, ngeci vakevo vakazive vyuma vyoshe vije Shukulu Kalunga wendekele kuli yange ngeci yange njavinungulwile kuli yove. Linga evi kwoshe kuje munu na munu asa kukuziva, kuwezelelako na vanu va mu Yunda vaje vanaija kutunda ku vinganda vyavo.

⁷ Amo vakalomba kuli Shukulu Kalunga, nakutenguluka kutunda ku vingila vyavo vya vuvi, omwo Shukulu Kalunga nashungwiya vanu vaje na vukalu vwakama.”

⁸ Ngecivene, Mbaluke walavele lijwi lya Shukulu Kalunga mu Njuvo ya Shukulu Kalunga ngwe muje munjamulekele.

⁹ A vingonde vitanu na viwana, ku mwaka wamucitanu uje Yehoyakime wapwile mwene wa mu Yunda, vanu vazilile kulya ngeci Shukulu Kalunga avazivileko mema ku mbunge. Co litangwa lije valinyungile manene vanu voshe vaje vakele mu Yelusalema na voshe vaje vezile vatundile ku vinganda vya mu Yunda.

¹⁰ Ngecivene, simbu vanu voshe vakele nakutolilila, co Mbaluke walavele mu livulu vyuma vyoshe vije vinjendekele kuli ikeye. Walingilile evi mu Njuvo ya Shukulu Kalunga, mu mulili wa Ngemaliya muna Shafane, muka-kusoneka wa mu mbanja. Mulili wendi wakele akamwa ya mbanja kuyehi na vukovelelo vwa Cikolo Caciha ca ku Njuvo ya Shukulu Kalunga.

Vamyata vavalavela livulu

¹¹ Mikaya, muna Ngemaliya mutekulu wa Shafane, wazivile a vije vyalavele Mbaluke mu livulu ali vije vyendekele Shukulu Kalunga.

¹² Co waile ku lipela, ku mulili wa muka-kusoneka wa mu mbanja, kuje kuvakungulukilile vamyata voshe, Elishama, muka-kusoneka wa mu mbanja, na Ndelaya muna Shemaya, na Elenatane muna Akambole, na Ngemaliya muna Shafane, na Zendekiya muna Hananiya, na vamyata veka voshe vakele kuje.

¹³ Mikaya wavalekele vyuma vyoshe vije vyazivile kuli Mbaluke omo wavilavelele vanu.

¹⁴ Co vamyata vatumineko Njehunde (muna Nataniya, mutekulwila wa Shelemiya mutekulwila wa Kushi,) ngeci vakaleke Mbaluke kunena lije livulu lyalavelele vanu. Co Mbaluke wavanenelele livulu.

¹⁵ Co vendekele ngwavo, “Tumbama asi nakutulavela eli livulu.” Ngecivene, Mbaluke walilavele.

¹⁶ Omo wamanesele kulilava, co vakele na lyova, co valyendekesele umo na mukwavo nakuleka Mbaluke ngwavo, “Tunapande kutwala vukaleo ovu kuli mwene.”

¹⁷ Asinoni vamwihwile ngwavo, “Tuleke ololo vene, vatijo unasonekele vyoshe evi? Njelemiya ikeye navyendekele kuli yove ndi?”

¹⁸ Mbaluke wakumbulwile ngwendi, “Njelemiya ikeye wendekele majwi oshe awa kuli yange, co njawasonekele na mufwitilo mu livulu eli.”

¹⁹ Asinoni vamulekele ngwavo, “Yove na Njelemiya munapande kuya mukavande. Kesi mutave munu kuzivuka kuje kumuli embwe.”

Mwene enyeka livulu

²⁰ Vamyata vaakele lije livulu mu mulili wa Elishama, muka-kusoneka wa mu mbanja, co vaile ku mbanja ya mwene, kuje kuvatwalele vukaleo vwa vyuma vyoshe.

²¹ Co mwene watumine Njehunde kukashaka lije livulu. Co ikeye wakalishakele kuje ku mulili wa Elishama, nakulilavela mwene na vamyata voshe, vaje vemanene kuje nakumuzengeleka.

²² Yapwile simbu ya cisika, co mwene watumbamene mu lipela lyendi lya a simbu ya cisika nakwota tuhya.

²³ Omo Njehunde wamanesele kulava mikana itatu nambe iwana, co mwene watavwile lije livulu na moko yendi yaindondo nakulyumbila mu liko. Walitavozwele nakulyenyeka noo lyoshe lyahwile.

²⁴ Oloni nambe mwene, nambe umo wa ali vamyata vendi uje wazivile vyoshe vije vasonekele muje mu livulu, kuvazivila lyova nambe kumwesa cimweso cimo ca vusiwa.

²⁵ Nameme Elenatane, na Ndelaya, na Ngemaliya valombele mwene ngeci kesi enyeke lije livulu, oloni mwene kombileko mbunge kuli vakevo.

²⁶ Co washikile muna mwene Njelahamele, amolika na Selaya muna Azelyele, na Shelemiya muna Avendele, ngeci vanjikwate na muka-kusoneka wange Mbaluke. Oloni Shukulu Kalunga watushwekele.

Njelemiya asoneka livulu likwavo

²⁷ Omo Mwene Yehoyakime wenyekele livulu lije linjendekele kuli Mbaluke, Shukulu Kalunga wanjilekele

²⁸ kunona livulu likwavo nakusonekamo vyuma vyoshe vije vyakele mu livulu lyakulivanga.

²⁹ Shukulu Kalunga wanjilekele kwendeka kuli mwene ngwange, “Unenyeka livulu, co unehula Njelemiya ngwove omwo vikajo wasonekele ngwove mwene wa Mbambilone akaija nakunyongesa eli lifuti, nakutsiya vanu vamwo na tusitu vamwo.

³⁰ Ngecivene, ololo, yange Kalunga, njendeka kuli yove, Mwene Yehoyakime, ngwange naumo mutekulwila wove akashwana mu vumwene vwa Ndaviti wai. Muvila wove vakaumbila anja kuje ukominina na litanya a simbu ya mutanya, nakushinuka ku lisika a simbu ya vutsiki.

³¹ Njikakunyanyamesa, na vatekulwila vove, na vamyata vove, omwo a vuvi vuje vumunalingi muvavoshe. Nambe yove, nambe vanu va mu Yelusalema na mu Yunda kumwombile vimbunge kukunangula kwange, ngecivene, njikanena tuyando twakama ali yeni voshe tuje njalishungwiiye.”

³² Co njanonele lalo livulu likwavo nakulyana kuli muka-kusoneka wange Mbaluke, co wasonekele lalo vyuma vyoshe vije njendekele. Co wasonekele vyuma vyoshe vije vyakele mu livulu lyakulivanga, na majwi akwavo lalo akulifwa na aje njendekele kuli ikeye.