Njelemiya 35 - Livulu lya Shukulu Kalunga

Njelemiya na vaLekave

¹ Omo Yehoyakime muna Yosiya wapwile mwene wa mu Yunda, co Shukulu Kalunga wendekele kuli yange ngwendi,

² “Ya kuli vaka-cikota ca vaLekave ukendeke navo. Ya ukavatwale mu mulili umo wa mu Njuvo yange nakuvana vinyu.”

³ Ngecivene, njaile kukashaka Njazaniya (muna munalume umo lizina lyendi Njelemiya, muna Havaziniya) na vandolome vendi voshe, na vana vendi voshe,

⁴ co njavanenele ku Njuvo ya Shukulu Kalunga. Njavatwalele ku mulili wa Hanane muka-kwimanena muna Ingendaliya. Mulili ou wakele kuyehi na milili ya vamyata vakwavo, co mulili wa Hanane muka-kwimanena wakele akamwa ya mulili wa Maseya muna Shalume, uje wapwile mwata wakama mu Njuvo ya Shukulu Kalunga.

⁵ Asinoni njaakele vinganja na malonga akulova akushula a vinyu kulutwe lwa vaLekave, co njendekele kuli vakevo ngwange, “Vinyu evi nweni.”

⁶ Oloni vakumbulwile ngwavo, “Yetu kutwesi kunwa vinyu, omwo kukulwila yetu Yonandave muna Lekave watulekele ngwendi nambe yetu nameme vatekulwila vetu kesi tunwe vinyu embwe.

⁷ Ikeye lalo watulekele ngwendi kesi tutunge vinjuvo, nambe kukuna vimbuto, nambe kukuna vitungu vya mikolovozi ya vushuka vwa vinyu nameme kuvilanda. Ikeye watushikile ngeci simbu yoshe tunapande kukala mu vimbalaka, ngeci tukale matangwa amangi mu lifuti lino tulinakukala ngwe tu vangenzi.

⁸ Tunononoka vilongesa vyoshe vije Yonandave watulongesele. Yetu kutwesi kunwa vinyu embwe, nameme vanakazi vetu, nambe vana vetu va vanalume, nambe vana vetu va vanakazi.

⁹ Kutwesi kutunga vinjuvo ngeci tukalemo, kutwesi na vitungu vya mikolovozi ya vushuka vwa vinyu, nambe mahya a vimbuto, nambe vimbuto vene kutwesi navyo,

¹⁰ oloni twakala mu vimbalaka. Twanyunga vije vyatushikile kukulwila yetu Yonandave.

¹¹ Oloni omo Mwene Nevukaneza wakovelele mu lifuti nakulwisa vanu, twayongwele kwija ku Yelusalema ngeci tutunde kuli vaMbambilone na kuli vaSilya. Evi vikevyo vyatunene muno mu Yelusalema.”

¹² Asinoni Shukulu Kalunga wendekele kuli Njelemiya ngwendi,

¹³ “Yange Kalunga, Muka-nzili yoshe, Njambi ya Isalele njikutuma ukehule vanu va mu Yunda na vanu va mu Yelusalema ngwove omo vikajo mulinakuvyana kutolilila kuli yange nakwononoka vilongesa vyange?

¹⁴ Vatekulwila va Yonandave vanononoka lishiko lya kukulwila yavo lyakujeneka kunwa vinyu, nakweta ku litangwa lya lelo kuvesi kunwa vinyu. Oloni yange njinakala nakwendeka kuli yeni simbu yoshe, oloni yeni kumwesi kunjononoka.

¹⁵ Njinakala nakutuma vangamba vange voshe vaka-kwimanena, kuli yeni vamileke kwecela vingila vyeni vyavivi, ngeci mulinge vyavivwa. Vaminangwile ngeci kesi mulemese nameme kupangela vinjambi veka, ngeci muyoye mwamuvwa mu lifuti lije linjanene kuli yeni na kuli vakukulwila veni. Oloni yeni kumwanjitolililile, nameme kumbako mbunge.

¹⁶ Vatekulwila va Yonandave vanononoka lishiko lije lyavanene kukulwila yavo, oloni yeni kumwanjononokele.

¹⁷ Ngecivene, ololo, yange Kalunga, Muka-nzili yoshe, Njambi ya Isalele, njikanena ali yeni vanu va mu Yunda na vanu va mu Yelusalema, n̄avava yoshe ije injamitumbwilile. Njikalinga evi omwo kumwatolililile ku vije njendekele kuli yeni, co kumwanjikumbulwile omo njamisanene.”

¹⁸ Asinoni njalekele vaka-cikota ca vaLekave ngwange Shukulu Kalunga, Muka-nzili yoshe, Njambi ya Isalele, nendeka ngwendi, “Munononoka lishiko lije lyamishikile kukulwila yeni Yonandave, co munakavangeya vilongesa vyendi vyoshe, munalingi vyuma vyoshe vije vyamishikile.

¹⁹ Ngecivene, yange Kalunga, Muka-nzili yoshe, Njambi ya Isalele, njikulaesa ngwange ku naanga ya Yonandave muna Lekave simbu yoshe kukakala munalume uje akanjipangela.”