Njelemiya 34 - Livulu lya Shukulu Kalunga

Njelemiya anangula Zendekiya

¹ Shukulu Kalunga wendekele kuli yange omo Mwene Nevukaneza wa Mbambilone na nzita yendi, na mbunga ya vanu vaje vamukwasele vakutunda ku miyati ya vanu voshe, na ku mafuti oshe aje ononokele kuli ikeye, valwisile Yelusalema na vinganda vyakwatako.

² Shukulu Kalunga, Njambi ya Isalele, wanjilekele kuya nakwendeka kuli Mwene Zendekiya wa mu Yunda ngwange Shukulu Kalunga nendeka ngwendi, “Yange Kalunga, njikana nganda eyi ku mavoko a mwene wa Mbambilone, co ikeye akayenyeka yoshe njwa.

³ Kumukasa kuputumuka, oloni vakamifungulula nakumyana ku mavoko endi. Mukamumona mesho na mesho, nakwendeka nendi kanwa na kanwa, asinoni mukaya ku Mbambilone.

⁴ Zendekiya, tolilila vinjendeka kuli yove, kuvakakutsiila mu nzita embwe.

⁵ Oloni ukatsa mu kwoloka, ngwe omo vanu venyekele insense omo vatsindile vakukulwila vove, vaje vapwile vimyene vakulivanga, mu ngila ije vene nove vakakwenyekela insense. Co vakalila nakwendeka ngwavo, ‘Tawee, mwene yetu natsi!’ Yange Kalunga, njinendekamo.”

⁶ Asinoni njalekele majwi awa Mwene Zendekiya mu Yelusalema,

⁷ a simbu ije vene mashwalale va mwene wa Mbambilone vakele nakulwisa nganda, co lalo valwisile Lakishe na Azeka, avyo lika vinganda vya vimpaka vije vyasaleleo mu Yunda.

Vanu vapokola cikulaeso

⁸ Mwene Zendekiya na vanu va mu Yelusalema valizivasanene kwecela

⁹ vindungo vavo va vaHevelu, va vanalume na vanakazi, ngeci naumo wai akapwise mukwavo kaIsalele cinzinda.

¹⁰ Vanu voshe na vantwama vavo valizivasanene kwecela vinzinda vavo, ngeci kesi vavafungulule lalo. Vecelele vinzinda vavo,

¹¹ oloni kulutwe vatengulwile viyongola vyavo, co vavelwisile lalo, kupwa vinzinda.

¹² Asinoni Shukulu Kalunga,

¹³ Njambi ya Isalele, wanjilekele kwendeka kuli vanu ngwange, “Yange njalikumiiye cikumiiyo na vakukulwila veni, omo njavatundisile mu Ingito, nakuvecela ku vunzinda. Njavalekele ngwange

¹⁴ omo myaka itanu na ivali inahu, vanapande kwecela ngoco woshe cinzinda wa kaHevelu, uje navapangela myaka itanu na umo. Oloni vakukulwila veni kuvombileko mbunge nambe kutolilila ku vije njendekele.

¹⁵ Mu matangwa amandondo lika a kunima, mwatengulwile viyongola vyeni, mwalingile vije vyanjivwasele. Yeni voshe mwalizivasanene kwecela ngoco vavushoko vweni vaIsalele, co mwalikumiiye cikumiiyo ku mesho ange, mu Njuvo yange muje muvakanjilemesela.

¹⁶ Oloni mwatengulwile lalo viyongola vyeni, co kumwanjisingimikile. Yeni voshe mwelwisile lalo vinzinda vaje mwecelele ngwe kukushaka kwavo, co mwavasindiiye lalo mu vunzinda.

¹⁷ Ngecivene, yange Kalunga, njinendeka ngwange kumwanjononokele, kumwanene vakweni vaIsalele kupatuka kwavo. Mwamuvwa oni, njikamyana kupatuka, kupatuka kwakutsila mu nzita, na ku mushongo, nakulanduka ku njala ya lyangengela. Njikamiyevanganesa akati ka miyati ya vanu voshe va mu kaye. Co vakakomoka a vije njikalinga ali yeni.

¹⁸ Vamyata va mu Yunda na vamyata va mu Yelusalema, amolika na vamyata va ku lipela, na vaka-kukombelela, na vantwama voshe, valikumiiye cikumiiyo nange, akwecela vinzinda vavo, vatavwile muna ngombe akati nakwenda mukati ka mitambela ivali ya muna ngombe uje ivatavwile mukati.

¹⁹ Oloni vapokwele cikumiiyo, kuvanyungile visimbu vyaco. Ngecivene, njikalinga kuli vanu ava ngwe vije vivalingile vakevo na muna ngombe.

²⁰ Njikavakundika ku mavoko a vitozi vavo vaje vakavatsiya, co mivila yavo vakailya tuzila na tusitu.

²¹ Njikakundika lalo Mwene Zendekiya wa mu Yunda na vamyata vendi kuli vaje vakavatsiya. Njikavakundika ku mashwalale va ku Mbambilone vaje vanalikela kumilwisa.

²² Njikavana mashiko, co vakeluka ku nganda ino. Vakailwisa nakuyifungulula, co vakayenyeka njwa. Njikapwisa vinganda vya mu Yunda vingundu. Yange Kalunga, njinendekamo.”