Njelemiya 33 - Livulu lya Shukulu Kalunga

Cikulaeso cikwavo ca cinyangavili

¹ Lijwi lya Shukulu Kalunga lyezile lalo kuli yange, omo njakele mu kamenga mu cipango ca vaka-kunyunga lipela ngwalyo,

² “Yange Kalunga uje watangele asi, co njamungile kaye nakukatumbika mu mwela wako.

³ Njihule, co njikakukumbulula, nakukuleka vyuma vyakama vyakukomokesa.

⁴ Yange Kalunga, Njambi ya Isalele, njinendeka ngwange vinjuvo vya mu Yelusalema, na lipela lya mu Yunda vikasiwuka, omwo nzita ije inavazengeleka nakuvalwisa.

⁵ Vamo vakalwa nzita na vaMbambilone, vakashulisa vinjuvo na vivimbi vya vaje vanjikatsiya mu vukalu vwange na mu litoto lyange. Njinakengesa nima nganda eyi omwo vanu vamwo valinakulinga vyuma vyavivi.

⁶ Oloni njikakangwisa nganda eyi na vanu vamwo nakuvana ciindu. Njikavamwesa kwoloka kwakushemutuka na vuvwa.

⁷ Njikatumisa manene Yunda na Isalele, co njikavatungulula lalo ngwe muvakele laja.

⁸ Njikavajelesa ku vivi vyavo vyoshe vije vivanavulumuna kuli yange, co njikavasambesa ku vivi vyavo na ku kupenga-penga kwavo.

⁹ Yelusalema kuli yange ikwapwa nsina ya kujolela, na kasingimiko, nakushangazala, co miyati yoshe ya mu kaye vakakomoka nakujaja omo vakaziva a vyuma vyavivwa vije vinjikalinga kuli vanu va mu Yelusalema, na a kwoloka kuje kukakala mu nganda.”

¹⁰ Shukulu Kalunga nendekele ngwendi, “Vanu valinakwendeka ngwavo mutambela uno unapu ngwe mambo, muje kumwesi vanu nambe tusitu. Vanendeka mwa vushunga, vinganda vya mu Yunda na vitapalo vya mu Yelusalema vili mupulungwa, kumwesi nakukala vanu nambe tusitu. Oloni mu mutambela ou, mukaziva lalo

¹¹ muyoyo wakulisamba, nakujolela, nakuvwaelela, na muyoyo wa viwano vya vulo. Mukaziva vanu vakaimba omo vanena milambu ya cikandelela ku Njuvo yange nakwendeka ngwavo, ‘Kandeleleni kuli Shukulu Kalunga Muka-nzili yoshe, omwo ikeye wamuvwa, omwo cizemo cendi cakala ku myaka yoshe.’ “Lifuti eli likavezika, ngwe mulyafwile laja. Yange Kalunga, njinendekamo.”

¹² Shukulu Kalunga Muka-nzili yoshe alinakwendeka ngwendi, “Lifuti lino munapu ngwe mambo, muje kumwesi vanu nambe tusitu, oloni mukakala lalo mwila wauvwa kuje tunyungi vakalisila vimanga vavo.

¹³ Mu vinganda vya mu lifuti lya malundu, na mu vinganda va mu lifuti lya ku vushelumukilo vwa malundu, na mu mbwela ya mutambela wa lifuti lya Yunda, mu lifuti lya Mbenjemani, na mu membo akuzengeleka Yelusalema, na mu vinganda vya mu Yunda, tunyungi vakalisa lalo vimanga vavo. Yange Kalunga, njinendekamo.”

¹⁴ Shukulu Kalunga wendekele ngwendi, “Simbu ilinakwija omo njikashulisa cikulaeso cije njalingile na vanu va mu Isalele na mu Yunda.

¹⁵ A simbu ije njikaangula mwene wa vushunga, mutekulwila wa Ndaviti. Mwene uje akalinga vya vushunga na kulongwa, mu lifuti mwoshe.

¹⁶ Vanu va mu Yunda na vanu va mu Yelusalema vakapatuka nakuyoya mwamuvwa. Co nganda ya Yelusalema vakaitumbula ‘Shukulu Kalunga Ikeye Kwamena Kwetu.’

¹⁷ Yange Kalunga, njakulaesa ngwange simbu yoshe kukakala mutekulwila wa Ndaviti kupwa mwene wa Isalele,

¹⁸ co lalo simbu yoshe kukakala vaka-kukombelela va ku muyati wa Levi vaje vakanjipangela, nakukombelela vin̄ombelo vya kwenyeka, na vin̄ombelo vya vimbuto vya vinona.”

¹⁹ Shukulu Kalunga wendekele kuli yange ngwendi,

²⁰ “Yange njalikumiiye cikumiiyo mutanya na vutsiki, ngeci vije-ije a simbu yavyo ije njemika, co cikumiiyo eci kucasa kupokoka.

²¹ Mu ngila eyi vene njalikumiiya cikumiiyo na ngamba yange Ndaviti, ngeci simbu yoshe akakala na mutekulwila wendi uje akapwa mwene, co njalikumiiya cikumiiyo na vaka-kukombelela va ku muyati wa Levi, ngeci simbu yoshe vakanjipangela, co vikumiiyo evi kuvikapokoka.

²² Njikatumisa manene vatekulwila va ngamba yange Ndaviti nakutumisa vaka-kukombelela va ku muyati wa Levi, ngeci naumo asa kuvalava wai, vakapwa ngwe vingongonosi vya mwilu, nambe ngwe lishen̄avu lya ku cikuma ca mema a kalunga.”

²³ Shukulu Kalunga wendekele kuli yange ngwendi,

²⁴ “Wazivuka ngeci vanu valinakwendeka ngwavo yange njinavyana Isalele na Yunda, vinaanga vivali vije njaangwile? Co valinakukenga vanu vange na kayengu, nakuvayongola ngwe kesi muyati.

²⁵ Oloni yange Kalunga, njalikumiiye cikumiiyo mutanya na vutsiki, co njinatungu mashiko akunyunga kaye na lilu.

²⁶ Mwa vushunga omo njinalingi evi, yange njikakolesa cikumiiyo cange na vatekulwila va Yakomba, na ngamba yange Ndaviti. Njikaangula umo wa vatekulwila va Ndaviti kushwana a vatekulwila va Avilahama, na Isake, na Yakomba. Njikazivila vanu vange mema ku mbunge, co vakavezika lalo.”