Njelemiya 32 - Livulu lya Shukulu Kalunga

Njelemiya alanda lihya

¹ Shukulu Kalunga wendekele kuli yange mu mwaka wamulikumi uje Zendekiya wapwile mwene wa mu Yunda, ukewo lalo mwaka wamulikumi na itanu na itatu wakushwana kwa Mwene Nevukaneza wa Mbambilone.

² A simbu ije vene, mbunga ya mashwalale va mwene wa Mbambilone valwisile Yelusalema, co yange vanjipatelele mu cipango ca vaka-kunyunga lipela.

³ Mwene Zendekiya wanjakele mu kamenga omwo njambulwile ngwange Shukulu Kalunga nendeka ngwendi, “Njikatavesa mwene wa Mbambilone ngeci afungulule nganda ya Yelusalema,

⁴ co Mwene Zendekiya vakamufungulula nakumwana mu mavoko a mwene wa Mbambilone, uje akalimona nendi mesho na mesho, nakwendeka nendi.

⁵ Zendekiya vakamutwala ku Mbambilone, co akakala kuje vene noo anjikamwanukila. Nameme akalwisa vaka-Mbambilone, oloni kakasa kuhyana embwe. Yange Kalunga, njinendekamo.”

⁶ Shukulu Kalunga wanjilekele

⁷ ngwendi Hanamele, muna nananu Shalume, akaija kuli yange na kunjihula ngeci njilande lihya lyendi lya ku Anatote mu lifuti lya Mbenjemani, omwo njapwa kavushoko kendi wa a mbunge, co njili na moko yakulilanda.

⁸ Ngecivene, ngwe mwendekele Shukulu Kalunga, Hanamele wezile kuli yange ku cipango ca lipela, wanjilekele ngwendi njilande lihya. Njazivukile ngeci ngwange mwa vushunga eli lyapwile lijwi lya Shukulu Kalunga.

⁹ Njalandele lije lihya kuli Hanamele, nakumwana mavundungulu a siliva akupwa likumi na atanu na avali.

¹⁰ Njasonekele mukanda wa ndando nakuwaka cimweso, njasanene vakaleo, co twapeselesele siliva a cipeseleso.

¹¹ Asinoni njanonele mukanda muje muvasonekele ndando, uje wakwaka cimweso cakutuma siliva na majwi a vipangi, na mukanda ukwavo wakujeneka kushoka,

¹² co njayanene kuli Mbaluke, muna Neliya mutekulu wa Mahaseya. Co njamwaneneyo ku mesho a Hanamele na ku mesho a vakaleo vaje vasonekele kuje ku mukanda wa cimweso na kuli vanalume vaje vatumbamene mu cipango ca lipela.

¹³ Njendekele kuli Mbaluke ku mesho avo ngwange,

¹⁴ “Shukulu Kalunga Muka-nzili yoshe, Njambi ya Isalele, nakushiki kutwala vishimbikiya evi, cishimbikiya cakushoka ca ndando na mukanda wakujeneka kushoka, ukavyake mu njava, mukuvitulikilamo ngeci vyete na ku myaka ya kulutwe.

¹⁵ Shukulu Kalunga Muka-nzili yoshe, Njambi ya Isalele, nendeka ngwendi vinjuvo, na mahya, na mikolovozi ya vushuka vwa vinyu, vakavilanda lalo mu lifuti lino.”

Lilombelo lya Njelemiya

¹⁶ Omo njinaana laja cishimbikiya kuli Mbaluke, co njalombelele ngwange,

¹⁷ “Shukulu Kalunga wa Akamwa ya Vyoshe, yove watangele kaye na melu na nzili yove yakama, na livoko lyove lyakwolola, kukwesi cuma cacikalu kuli yove cai.

¹⁸ Ukamwesa cizemo cove cije kucesi kutenguluka ku vanu vavangi-vangi, oloni lalo ukanyanyamesa vanu a vuvi vwa visemi vavo. Yove Shukulu Kalunga, Njambi Muka-nzili yoshe.

¹⁹ Ukatumbu matumbe akujeneka mana, nakulinga vyuma vya nzili, ukamono vyuma vyoshe vije vivalinga vanu, co ukavana cikandelela kupwisa ngwe ku vilinga vyavo.

²⁰ Ku san̄ulu walingile vizivukiso na vikomokeso vyakukomokesa mu Ingito, co wakele nakuvilinga nakweta ku litangwa lya lelo mu Isalele, na akati ka miyati yoshe yeka, ngecivene, ololo vanakuzivuka kwoshe-ikwoshe.

²¹ Watundisile vanu vove va Isalele mu Ingito, na vizivukiso na vikomokeso vyakukomokesa na livoko lyove lya nzili.

²² Wavanene lifuti eli lyalivwa lya vwilo, ngwe muwakulaesele vakukulwila vavo.

²³ Omo vetele mu lifuti lino, co lyapwile vufuko vwavo, oloni kuvononokele mashiko ove, nambe kuyoya ngwe ku vilongesa vyove, nacimo civalingile cai a vyuma wavashikile kulinga. Co yove wanenele vukalu vwoshe ovu ali vakevo.

²⁴ “VaMbambilone vanalundika mikinya kuzengeleka Yelusalema ngeci vailwise, vanu vali mu vukalu vwa njala ya lyangengela na mishongo, co nganda vakayana ku mavoko a vaMbambilone vaje valinakuyilwisa. Co vyoshe viwendekele vinapu vya vushunga.

²⁵ Nameme ngoco, Shukulu Kalunga wa Akamwa ya Vyoshe yove wanjishikile kulanda lihya ku mesho a vakaleo, nameme nganda ije ololo vaifungulula vaMbambilone.”

²⁶ Asinoni Shukulu Kalunga wendekele kuli yange ngwendi,

²⁷ “Yange Kalunga, Njambi wa vanu voshe. Kukwesi cuma cimo cacikalu kuli yange cai.

²⁸ Njikana nganda eyi kuli Mwene Nevukaneza wa Mbambilone na ku mbunga yendi ya mashwalale, vakaifungulula

²⁹ nakuyenyeka. Vakayenyeka nakuyizilisa yoshe njwa, amolika na vinjuvo, kuje kuvanjiluvalesele vanu akwenyeka insense kuli Mbale a milili ya vinjuvo vyavo vya akamwa ya viluli vyakusivama, nakwitila vin̄ombelo vya vinyu kuli vinjambi veka.

³⁰ Kutunda kukushangumuka kwa vin̄anda vyavo, vanu va mu Isalele na vanu va mu Yunda vanalingi vuvi, co vananjiluvalesa.

³¹ Vanu va mu nganda eyi vananjiluvalesa manene kutunda ku litangwa lije vaitungile. Ngecivene, njayongola kuyinyongesa,

³² omwo a vuvi vwoshe vuje vuvanalingi vanu va mu Yunda na vanu va mu Yelusalema, amolika na vimyene vavo, na vantwama, na vaka-kukombelela vavo, na vaka-kwimanena.

³³ Vanjikengesele nima nameme njakele nakuvalongesa, oloni vakevo kuvasele kunjitolilila.

³⁴ Vanaaka tumponya tuje tunjazinda mu Njuvo yange, mwela uje njatumbwile ngwange mukemwo vakanjilemesela, co vanaijwalesa.

³⁵ Vanatungu mitula ya Mbale mu Cana ca Hinome, mukukombelela vana vavo va vanalume, na ava va vanakazi kuli njambi Moleki. Kunjavashikile kulinga evi embwe, kuvyakovelele mu mbunge yange, ngeci valinge cuma ca cifwa cangacije nakulingisa vanu va mu Yunda vuvi.”

Cikulaeso ca cinyangavili

³⁶ Shukulu Kalunga, Njambi ya Isalele, wendekele kuli yange ngwendi, “Njelemiya, vanu valinakwendeka ngwavo, nzita, kulanduka ku njala ya lyangengela, na mushongo evi vikevyo vikaanesa nganda eyi mu mavoko a mwene wa Mbambilone. Ololo tolilila ku cuma eci cinjendeka.

³⁷ Njikakungulwila vanu amolika kutunda ku mafuti oshe kuje njavashandwelele omwo njaluvalele navo manene, co yange njikavelwisa ku mutambela uno, nakuvecela ngeci vakale muno mu kwoloka.

³⁸ Co vakapwa vanu vange, nange lalo njikapwa Njambi yavo.

³⁹ Njikavana ciyongola cimo mukuyoya kwavo, mukunjisingimika simbu yoshe, omwo a vuvwa vwavo, na a vuvwa vwa vatekulwila vavo.

⁴⁰ Njikalikumiiya cikumiiyo navo ca ku myaka yoshe. Nalumo lwai njikalikela kulinga vyuma vyavivwa kuli vakevo, vakanjisingimika, ngecivene, nalumo lwai vakashondoloka kuli yange.

⁴¹ Co njikavwaelela kulinga vyuma vyavivwa kuli vakevo, co njikavaka mu lifuti lino ku myaka yoshe.

⁴² Nameme omo njinanena tuyando twakama ali vanu ava, oloni njikavana vyuma vyoshe vyavivwa vije vinjavakulaesele.

⁴³ Vanu valinakwendeka ngwavo, lifuti eli likapwa ngwe mambo muje kumwesi vanu nambe tusitu, ngeci vakalyane kuli vaMbambilone. Oloni mahya vakaalanda lalo mu lifuti lino.

⁴⁴ Vanu vakalanda, co vakasoneka vukaleo vwa vikumiiyo, nakuvisatesa. Evi vakavilingila mu mutambela wa lifuti lya Mbenjemani, mu membo akuzengeleka ku Yelusalema, mu vinganda vya mu Yunda, na mu vinganda vya mu lifuti lya malundu, na mu membo a mu lifuti lya ku vushelumukilo vwa malundu, na mu mbwela ya mutambela wa lifuti lya Yunda. Co njikelwisila vanu mu lifuti lyavo. Yange Kalunga, njinendekamo.”