Njelemiya 31 - Livulu lya Shukulu Kalunga

VaIsalele veluka kwimbo

¹ Shukulu Kalunga alinakwendeka ngwendi, “Simbu ilinakwija omo yange njikapwa Njambi wa miyati yoshe ya Isalele, co vakevo vakapwa vanu vange.

² Njamwesele mema ku mbunge mu mambo kuli vanu vaje vaputumukile ku kutsa. Omo vanu va Isalele vashakele kuhwima,

³ njasholokele kuli vakevo alyala. Vanu va Isalele, simbu yoshe njamizema, ngecivene, simbu yoshe njikamwesa cizemo cange cije kucesi kutenguluka.

⁴ Co lalo njikakala neni, co lalo mukambata tumbulumbumba tweni nakukina nakujolela manene.

⁵ Co lalo mukakuna mikolovozi ya vushuka vwa vinyu ku malundu a mu Samaliya, co vaje vaikuna vakalya vuje vushuka vukaimako.

⁶ Eyo, simbu ilinakwija omo vaka-kunyunga vakatambeka a malundu a Efalime ngwavo, ‘Tuyeni ku Siyone, kuli Shukulu Kalunga Njambi yetu.’ ”

⁷ Shukulu Kalunga alinakwendeka ngwendi, “Imbileni Isalele nakujolela, muyati wa vanu wakama kutuvakana miyati ya vanu voshe. Imbeni mwaso weni wakushangazala ngweni, ‘Shukulu Kalunga namena vanu vendi, napatula voshe vaje vasaleleo.’

⁸ Njikavatundisa ku lifuti lya ku kunto, nakuvakungulula kutunda ku mitambela ya ku shongo na shongo ya kaye. Tupuputwa na vilema vakaija amo navo, na tufumbakazi, na vaje vali kuyehi nakukita. Vakeluka ngeci vapwe muyati wakama.

⁹ Vanu vange vakaija nakulila, nakulombela omo njivatwamenena mukuvelwisa. Njikavatwamenena ku vana va vindonga vya mema, mu ngila yaivwa muje kuvakasa kutanuka. Yange njapwa ishe ya Isalele, co Efalime ikeye munange wa ntwatwa.”

¹⁰ Shukulu Kalunga alinakwendeka ngwendi, “Yeni miyati tolilileni kuli yange, ambululeni majwi ange na ku vikuma vyakulyala. Njashandwele vanu vange, oloni njikavakungulula lalo, nakuvatwamenena ngwe kanyungi atwamenena vutanga vwendi.

¹¹ Njinapatula vanu va Isalele, co njinavamena ku muyati wa vanu va nzili.

¹² Vakaija nakwimba mwaso wakujolela a Munkinda wa Siyone, co vakavwaelela na vwana vwange, vwana vwa vimbuto na vinyu, na mazi a olive, vwana vwa vimanga na vingombe. Vakafwa ngwe lihya lyakutukumwina mema mwamuvwa, vakakala na vyuma vyoshe vije vivashaka.

¹³ Vambanda vakakina nakuvwaelela, vanalume va vakulunu amo na vakwenje voshe vakavwaelela. Njikavazembeleka, co kulila kwavo kukapwa kujolela, na vusiwa vwavo vukapwa kuvwaelela.

¹⁴ Vaka-kukombelela njikavakutisa na vyakulya vyavivwa manene, co vanu vange vakakala na vyuma vyoshe vivashaka. Yange Kalunga, njinendekamo.”

Mema ku mbunge a Shukulu Kalunga ali Isalele

¹⁵ Shukulu Kalunga alinakwendeka ngwendi, “Vanazivi lijwi mu Lama, lijwi lyakusikoka nakulila manene, Lakele alilila vana vendi, avyana kumuzembeleka, omwo vakevo vaiko.

¹⁶ Likele kulila, lisikumune misozi. Vyoshe vije walingilile vana vove, kuvikai mwangoco kujeneka cikandelela embwe, vakeluka kutunda mu lifuti lya citozi.

¹⁷ Kucili cinyangavili cove kulutwe, vana vove vakeluka lalo kwimbo. Yange Kalunga, njinendekamo.

¹⁸ “Njazivi vanu vaIsalele valinyenga ngwavo ‘Shukulu Kalunga, twafwile ngwe tusitu vakujeneka kwononwesa, oloni watulongesele kwononoka. Twilwise, co tukeluka kuli yove, Shukulu Kalunga Njambi yetu.

¹⁹ Twakukengesele nima, oloni twatengulukile. Omo watunyanyamesele, twazivile vusiwa. Co twazivile shwamwa na lyova, omwo a vyuma vya vulema vije vitwalingile omo twapwile tu vakwenje.’

²⁰ “Isalele, yove wapwa munange injazema manene, wapwa mwana injazema manene kutuvakana. Nameme njishaka kukunyanyamesa, anga vene njikuyongola. Mbunge yange ikushaka manene, co njikakuzivila mema ku mbunge.

²¹ Aka vimweso, twa vipalo mu ngila, co wana ngila ije iwaililile. Ilukeni, yeni vanu va Isalele, ilukeni kwimbo ku vinganda vije mwasezele.

²² Visimbu vingaijo mukendangana oku noku, yeni vanu vaka-kujeneka kukulaela? Njinatanga cuma caciha cakufwa mweka lalo, cakufwa mweka ngwe munakazi anyunga munalume wendi.”

Vivezikiso vikaija kulutwe ali vanu va Njambi

²³ Shukulu Kalunga Muka-nzili yoshe, Njambi ya Isalele, alinakwendeka ngwendi, “Omo njikelwisila vanu mu lifuti lyavo, vakendeka lalo mu lifuti lya mu Yunda na mu vinganda vyamwo ngwavo, ‘Shukulu Kalunga avezikise lilundu lyakujela lya Yelusalema, mwela wakujela kuje kwakala.’

²⁴ “Vanu vakakala mu Yunda na mu vinganda vyamwo vyoshe, co kukakala vandimi na tunyungi na matanga avo.

²⁵ Njikahwimisa vaje vanajuka, co njikana vyakulya ku munu na munu uje nazeye na njala.

²⁶ Ngecivene, vanu vakendeka ngwavo, ‘Njalalele, co njinenduka njili mwamuvwa ngu.’

²⁷ “Yange Kalunga, njendeka ngwange simbu ilinakwija, omo njikatumisa vanu na tusitu mu lifuti lya Isalele na Yunda.

²⁸ Ngwe omo njavanyungile mukuvatukula, nakuvawisa, nakuvombila, nakuvanyongesa, nakuvayandesa, ngecivene, njikavanyunga mukuvakuna, nakuvatunga lalo.

²⁹ Omo simbu ije ikaija, vanu kuvakendeka lalo ngwavo, ‘Visemi valile mikolovozi ya vushuka vwa vinyu vwakukamata. Oloni vana vavo vakevo vazivile kukamata mu tunwa twavo.’

³⁰ “Oloni woshe uje akalya mikolovozi ya vushuka vwa vinyu vwakukamata, co akaziva kuwala ku mayo, co munu na munu akatsa omwo vuvi vwendi.”

³¹ Shukulu Kalunga alinakwendeka ngwendi, “Simbu ilinakwija omo njikalikumiiya cikumiiyo caciha na vanu va mu Isalele na mu Yunda.

³² Cikeco kucikapu ngwe cikumiiyo cije calaja cinjalikumiiye na vakukulwila vavo, omo njavambatele na livoko lyange kuvatundisa mu Ingito. Nameme njapwile nji munalume wavo, oloni kuvanyungile cikumiiyo cije.

³³ Cikumiiyo caciha cije njikalikumiiya na vanu va Isalele cikapwa eci, njikaka lishiko lyange muli vakevo, nakulisoneka mu vimbunge vyavo. Yange njikapwa Njambi yavo, navo vakapwa vanu vange.

³⁴ Naumo wai akalongesa mundambo wendi nambe ndolome yendi kuzivuka Shukulu Kalunga, omwo voshe vakanjizivuka, kushangumukila ku vanike kutwala ku vakulunu. Njikavasambesa ku vivi vyavo, co kunjikanuka milonga yavo. Yange Kalunga, njinendekamo.”

³⁵ Shukulu Kalunga waaka litangwa kutwa ceke ku mutanya, co ngonde na vingongonosi kutwa ceke ku vutsiki. Ikeye akatula mema a kalunga ngeci mankimba angwanjange, lizina lyendi ikeye Shukulu Kalunga Muka-nzili yoshe.

³⁶ Ikeye nakulaesa ngwendi, kakevala kwana mashiko, co Isalele vakapwa muyati ku myaka yoshe.

³⁷ Nga citava melu vaweseke, nambe kweta a luvula, co njikavyana muyati wa Isalele, omwo a vuvi vuje vuvanalingi. Mwanendeka Shukulu Kalunga.

³⁸ Shukulu Kalunga alinakwendeka ngwendi, “Simbu ilinakwija, omo Yelusalema yoshe vakaitungulula kupwa nganda yange, kutunda ku Kaposhi ka Hananele mu kangombe ka yambi, kutwala ku Cikolo ca mu Mbango.

³⁹ Co nginga ikatunda kuje nakweta ku kangombe ka yambi nakutwala ku lilundu lya Ngalembe, asinoni iketa ku Ngowa.

⁴⁰ Mu cimbongo muje vakatsindi vivimbi, nakumbila vishwashwa, na mahya oshe a vulamatelo a kandonga ka Kindelone kuketa na ku Cikolo ca Tuvalu mu ngangela, kuli yange ikapwa mitambela yakujela. Nalumo lwai lalo vakasiwula Yelusalema nambe kuyinyongesa.”