Njelemiya 30 - Livulu lya Shukulu Kalunga

Vikulaeso vya Shukulu Kalunga kuli vanu vendi

¹ Shukulu Kalunga, Njambi ya Isalele,

² wendekele kuli yange ngwendi, “Soneka mu livulu vyuma vyoshe vije vinjakuleke,

³ omwo simbu ilinakwija omo njikelwisa vanu vange, Isalele na Yunda. Njikavelwisila ku lifuti lije njaanene vakukulwila vavo, co likapwa lyavo lalo. Yange Kalunga, njinendekamo.”

⁴ Shukulu Kalunga alinakwendeka ku vanu va Isalele na Yunda ngwendi,

⁵ “Njazivile mutambi wakujajesa, mutambi wa lyova kesi wa kwoloka.

⁶ Co ololo olokeni muyongole! Kuma munalume asa kukita mwana ngeci mwakalingi munakazi ndi? Omo vikajo njinamono vanalume voshe vanakwata mavoko avo ku mafu avo ngwe munakazi ashaka kukita? Omwo vikajo munu na munu cihanga cendi citokoloka?

⁷ Litangwa lyalikalu lilinakwija, kukwesi lalo litangwa lyeka lyakulifwa nalyo, ikapwa simbu yaikalu kuli vanu vange, oloni vakovoka.”

⁸ Shukulu Kalunga Muka-nzili yoshe alinakwendeka ngwendi, “Omo litangwa lije likaija, njikapokola mandauluwa ije ili ku mikoshi yavo, nakuvatula malyenge avo, co kuvakapu lalo vindungo va vaka-kwija.

⁹ Oloni vakapangela yange Kalunga Njambi yavo, nakupangela lalo mutekulwila wa Ndaviti, uje njikemika kupwa mwene.

¹⁰ Yeni vanu vange, kesi muzive lyova, yeni vanu va Isalele kesi mujaje embwe. Njikamyovola ku lifuti lije lya kulyala, ku lifuti lije ku muli mu vunzinda. Mukeluka kwimbo, co mukayoya mu kwoloka, mukakala mwamuvwa, naumo wai akamizivisa lyova.

¹¹ Yange njili amo neni nakumyamena. Njikanyongesa miyati ya vanu voshe, kuje kunjamishandwelelele, oloni kunjikaminyongesa, kunjikamyecelela ngoco kuminyanyamesa, oloni omo njiminyanyamesa, co njikamizivila mema ku mbunge. Yange Kalunga, njinendekamo.”

¹² Shukulu Kalunga alinakwendeka kuli vanu vendi ngwendi, “Vimbandu vyeni kuvikanguka, nakuvetwa kweni kukukanguka.

¹³ Kukwesi umo wakuminyunga, kukwesi vyemba vyakwaka a vimbandu vyeni, kukwesi cinyangavili cakumikangwisa.

¹⁴ Vaje vamizemene voshe vanamivala, kuvesi nakumyumba lalo mbunge. Njinamilwisa ngwe citozi, cihiso ceni cinapu cacikalu, omwo vivi vyeni vinapu vyavingi na kupenga-penga kweni kunapu kwakama manene.

¹⁵ Kesi mulinyenge omwo munavetwa, vimbandu vyeni wai asa kuvisaka, njaminyanyamesa ngacije omwo vivi vyeni vinapu vyavingi manene na kupenga-penga kweni kunapu kwakama manene.

¹⁶ Voshe vaje vaminyongesa na vakevo vakavanyongesa, co vitozi veni voshe vakavatwala ku vunzinda. Voshe vaje vamiyandesa, na vakevo vakavayandesa, voshe vaje vapukula vyeni, na vakevo vakavapukula vyavo.

¹⁷ Mukapwa vakangule, njikakangwisa vimbandu vyeni, nameme vitozi veni vendeka ngwavo, ‘Siyone vanayumbila, naumo wai aishaka.’ Yange Kalunga, njinendekamo.”

¹⁸ Shukulu Kalunga alinakwendeka ngwendi, “Njikelwisila vanu vange mu lifuti lyavo, co njikazivila mema ku mbunge naanga na naanga, vakatungulula Yelusalema, co lipela lya mwene vakaliilwisila mu mutambela walyo walaja.

¹⁹ Vanu vaje valinakukala muje vakaimba myaso yakushangazala vakatambeka nakujolela. Omwo a vivezikiso vyange, vakatuma nakupwa vavangi, vivezikiso vyange vikavanenela kasingimiko.

²⁰ Njikelwisila muyati ou nzili yavo ngwe ije vakele nayo laja, co njikavakolesa lalo, njikanyanyamesa voshe vaje vavayandesa.

²¹ Muka-kuvashwana akatunda ku muyati wavo vavenya, muna mwene yavo akatunda ku vanu vavo vavenya. Akaija kuli yange omo njikamusana, iyajo asa kwija kuli yange, kujeneka kumusana?

²² Vakapwa vanu vange, nange njikapwa Njambi yavo. Yange Kalunga, njinendekamo.”

²³ Vukalu vwa Shukulu Kalunga vwapwa ngwe lisindu-mbowe, lihunzi lyakukomokesa lije likaija a mitwe ya vaka-vuvi.

²⁴ Vukalu vwa Shukulu Kalunga kuvukahu kuvanga noo namanesa kulinga vyuma vyoshe vije vyayongwele kulinga. Ku matangwa a kulutwe, vanu vendi vakazivisisa mwamuvwa vyuma evi.