Njelemiya 3 - Livulu lya Shukulu Kalunga

Isalele yakujeneka kulongwa

¹ Shukulu Kalunga alinakwendeka ngwendi, “Nga munalume akondola munakazi wendi, co uje munakazi ashomboka kweka, munalume wendi kasa kumwilwisa lalo kuli ikeye. Eci cikajwalesa lifuti lyoshe. Oloni Isalele unakala na mapangala vavangi manene, co ololo ushaka kwiluka lalo kuli yange!

² Kenga akamwa ya malundu. Kuma kuli mutambela umo kuje kuwajenekele kulingilako vupangala ndi? Yove wakele nakuvandamena vikwizi kumukulo wa tapalo, ngwe kaAlambe avandamena vanu mu mambo. Yove unajwalesa lifuti na vukwizi vwove.

³ Evi vikevyo viyalikelele nyonzi kunyoka, na nyonzi ya vusuku-mbundu kuyanyokele. Unapu ngwe cikwizi, kuwesi na shwamwa.

⁴ “Co ololo wendeka kuli yange ngwove, ‘Yove u tate wanjizema tunde ku vwanike vwange.

⁵ Kuwasa kuluvala simbu yoshe, kuwasa kunjiluvalela ku myaka yoshe.’ Isalele, omu mukemwo muwendekele, oloni walingile vuvi ngwe muunashakela.”

Isalele na Yunda vanapande kutenguluka

⁶ Omo Yosiya wapwile mwene, Shukulu Kalunga wendekele kuli yange ngwendi, “Unamono vije vyanalingi Isalele, uje munakazi wakujeneka kulongwa? Ikeye natundu kuli yange, co nalingi vukwizi a lilundu lyoshe lyalilaja na mu minzinze ya miti yoshe yakutonola.

⁷ Njayongwele ngwange omo nalingi vyoshe evi, mwa vushunga akeluka kuli yange, oloni shendi kwiluka, co ndokazi yendi Yunda wakujeneka kulongwa wamwene vyoshe evi.

⁸ Yunda lalo wamwene ngeci yange njashekele Isalele omwo watundile kuli yange nakupwa cikwizi. Oloni Yunda, ndokazi ya Isalele wakujeneka kulongwa, kakele na lyova. Nendi lalo wapwile cikwizi,

⁹ co kakele na shwamwa. Wajwalesele lifuti, co walingile vupangala vwakulemesa tumponya va mamanya na viti.

¹⁰ Munima ya vyoshe evi, Yunda ndokazi ya Isalele wakujeneka kulongwa, walikwisile kwiluka kuli yange, oloni kelukile na mbunge yendi yoshe. Yange Kalunga, njinendekamo.”

¹¹ Asinoni Shukulu Kalunga wanjilekele ngwendi, nameme Isalele natundu kuli ikeye, oloni walingile mwamuvwa kutuvakana Yunda wakujeneka kulongwa.

¹² Shukulu Kalunga wanjilekele ngeci njikendeke kuli Isalele ngwange Shukulu Kalunga nendeka ngwendi, “Isalele wakujeneka kulongwa iluka kuli yange. Yange muka-mema ku mbunge, co kunjikakuluvalela ku myaka yoshe.

¹³ Litavele lika ngwove uli na mulonga, co unatengulukila nakulwisa Shukulu Kalunga Njambi yove. Litavele ngwove unalingi vupangala mu minzinze yoshe ya miti, na vinjambi veka ngeci kuwononokele mashiko ange. Yange Kalunga, njinendekamo.

¹⁴ “Ilukeni kuli yange, yeni vanu vakujeneka kulongwa. Mu nganda na nganda njikambatamo munu umo-umo, co ku cikota na cikota njikambata vavali-vavali, co njikamiilwisa ku Munkinda wa Siyone.

¹⁵ Njikamyana vaka-kushwana vaje vanjononoka, co vakamishika na mana nakuzivisisa.

¹⁶ Asinoni omo munapu muvavangi mu lifuti, co vanu kuvakendeka vya Cikasa ca Cikumiiyo cange. Kuvakaciyongola lalo nambe kucanuka, kuvakacishaka lalo nambe kulinga lalo ceka.

¹⁷ Simbu ikaija omo Yelusalema vakaitumbula ngwavo, ‘Litanda lya Shukulu Kalunga,’ co miyati yoshe ya vanu vakakungulukilako mukunjilemesa. Co kuvakakavangeya vilinga vya vimbunge vyavo vyakukaluwa.

¹⁸ Isalele akalipandakana na Yunda, co voshe vakatunda mu vunzinda mu lifuti lya ku kunto, co vakeluka ku lifuti lije linjanene vakukulwila veni kupwa vufuko vwa ku myaka yoshe.”

Vanu va Njambi valemesa tumponya

¹⁹ Shukulu Kalunga alinakwendeka ngwendi, “Isalele, njashakele kukutambula ngeci upwe u munange nakukwana lifuti lyalivwa, lifuti lyalivwa manene mu kaye koshe. Njashekele ngwange unjitumbule nji isho ngeci kesi utunde lalo kuli yange.

²⁰ Oloni unapu ngwe munakazi uje napokola cikumiiyo ca vulo vwendi, yove kuwapwile wakujeneka kulongwa kuli yange. Yange Kalunga, njinendekamo.”

²¹ Vanazivi muyoyo akamwa ya malundu, vanu va Isalele valinakulila nakulambelela, omwo vanakele nakuyoya mu vuvi co vanevala Shukulu Kalunga Njambi yavo.

²² Ilukeni, yeni voshe munatundu kuli Shukulu Kalunga, co ikeye akamikangwisa nakumipwisa vanu vaka-kulongwa. Mulinakwendeka ngweni, “Eyo, twiluka kuli Shukulu Kalunga, omwo wapwa Njambi yetu.

²³ Kutwawanene vukwasi akulemesa vinjambi vetu vakujeneka seo akamwa ya malundu. Vukwasi vwa Isalele vwatunda lika kuli Shukulu Kalunga Njambi yetu.

²⁴ Kulemesa Mbale njambi wakujeneka seo cinatujenekesa kukala na matanga a vimuna, na matanga a vimanga, na vana va vanalume na ava va vanakazi, na vyuma vyoshe vije vivapangelele vakukulwila vetu tunde ku san̄ulu.

²⁵ Tuli na vusiwa, co shwamwa yetu inatufwiki, omwo tunalingi vuvi kuli Shukulu Kalunga Njambi yetu, yetu na vakukulwila vetu kutwononokele mashiko endi.”