Njelemiya 29 - Livulu lya Shukulu Kalunga

Mukanda wa Njelemiya kuli vaYunda mu Mbambilone

¹ Njasonekele mukanda kuli vaka-kukombelela, na kuli vaka-kwimanena, na ku vantwama va vanu, na kuli voshe veka lalo vaje vaatwalele Nevukaneza mu vunzinda kuvatundisa ku Yelusalema nakuvatwala ku Mbambilone.

² Njausonekele a simbu omo Mwene Yehoyakine, na vaina, na vamyata va lipela, na vantwama va mu Yunda na mu Yelusalema, na vaka-vipangi vyakushonga, na vatongwe va vipangi vanavatwala laja mu vunzinda.

³ Njaanene mukanda kuli Elasa muna Shafane, na kuli Ngemaliya muna Hilikiya, vaje vaatumine Mwene Zendekiya wa mu Yunda kuli Mwene Nevukaneza wa Mbambilone. Majwi akele mu mukanda ngwavo,

⁴ “Shukulu Kalunga Muka-nzili yoshe, Njambi ya Isalele, nendeka kuli vanu voshe vaje vaatavesele Nevukaneza kuvatwala mu vunzinda kutunda ku Yelusalema nakuya ku Mbambilone ngwendi,

⁵ ‘Tungeni vinjuvo, nakutumbama. Kuneni vyakulya mu mahya nakuvilya.

⁶ Ambateni ngeci mukale na vana. Co lalo taveseni vana veni vambate, nakushomboka ngeci vakale na vana lalo. Munapande kutuma kesi mutepuluke.

⁷ Lingeni vyavivwa mu vinganda muje munjamitwalele kupwa vinzinda. Lombeleni kuli yange a vinganda evi, omwo nga evi vinganda vivezika, co neni lalo mukavezika.

⁸ Yange Kalunga, Njambi ya Isalele njiminangula ngwange kesi mutave vamikwise kuli vaka-kwimanena vaje vali akati keni, nambe vamo veka vaje vendeka ngwavo vasa kwambulula vyuma vya kulutwe. Kesi mumbeko mbunge ku vinjozi vyavo.

⁹ Valinakumileka makuli mu lizina lyange. Kunjavatumine embwe. Yange Kalunga Muka-nzili yoshe, njinendekamo.’

¹⁰ “Shukulu Kalunga alinakwendeka ngwendi, ‘Omo myaka yakukala mu Mbambilone makumi atanu na avali inahu, co njikakala na ngozi neni nakunyunga cikulaeso cange cakumiilwisila lalo kwimbo.

¹¹ Yange lika njazivuka matumbe njilinawo ali yeni, matumbe akuminenela vivezikiso, kesi akuminenela tuyando twakama embwe, matumbe akuyoya kulutwe vuje vunashulu na cinyangavili.

¹² Asinoni mukatambeka kuli yange. Co mukaija nakulomba kuli yange, njikamikumbulula.

¹³ Mukanjishakezeka, co mukanjiwana, omwo mukanjishakezeka na vimbunge vyeni vyoshe.

¹⁴ Eyo, njendeka ngwange, mukanjiwana, co njikamiilwisila mu lifuti lyeni lalo. Njikamikungulula kutunda mu mafuti oshe, nakutunda mu mitambela yoshe muje munjamishandwelele, co njikamiilwisa nakuminena mu lifuti muje mumwatundile, omo njamitwalele mu vunzinda. Yange Kalunga, njinendekamo.’

¹⁵ Mwendeka ngweni Shukulu Kalunga namyana vaka-kwimanena mu Mbambilone.

¹⁶ Tolilileni ku vije vyendeka Shukulu Kalunga ali mwene uje nashwana vumwene vuje vwashwanene Ndaviti, na ali vanu va mu nganda eyi, vakevo vavushoko vweni, vaje kuvavatwalele mu vunzinda amo neni.

¹⁷ Shukulu Kalunga Muka-nzili yoshe alinakwendeka ngwendi, ‘Njilinakunena nzita, na njala ya lyangengela, na mishongo ali vakevo, co njikavapwisa ngwe vushuka vwa mikuyu vuje vwavuvi manene kuvuvwaa kuvulya.

¹⁸ Njikavayandesa na nzita, na njala ya lyangengela, na mushongo, co miyati yoshe ya mu kaye vakalikomokela a vije vakamona. Kwoshe kuje kunjikavashandwela, vanu kakalisimoka nakulikomokela a vije vinalingiwa kuli vakevo. Vanu vakavashendumuna, nakupangesa lizina lyavo kupwa cisingo.

¹⁹ Evi vikalingiwa kuli vakevo omwo kuvononokele lijwi lije njakele nakutuma kuli vakevo ali vangamba vange vaka-kwimanena. Vavyanene kutolilila.

²⁰ Kuli yeni voshe njatumine mu vunzinda mu Mbambilone, tolilileni ku vije njendeka yange Kalunga.’

²¹ Shukulu Kalunga Muka-nzili yoshe, Njambi ya Isalele, nendeka ali Ahave muna Kolaya na Zendekiya muna Maseya, vaje valinakumileka makuli mu lizina lyendi. Nendeka ngwendi akavaka mu mavoko a Mwene Nevukaneza wa Mbambilone, uje akavatsiya oku munakengeko.

²² Omo vanu vaje vavatwalele mu vunzinda kutunda ku Yelusalema nakuya ku Mbambilone nga vashaka kusinga munu, co vakendeka ngwavo, ‘Shukulu Kalunga amilinge ngwe mwalingile kuli Zendekiya na Ahave, vaje mwene wa Mbambilone wavenyekele oku vayoya!’

²³ Eci cikapwa luvinda lwavo omwo vali na mulonga wakama wa vuvi, omwo vanalingi vupangala, co vanendeka makuli mu lizina lya Shukulu Kalunga. Eci kucapwile cizango ca Shukulu Kalunga, ikeye azivuka vije vivanalingi, co napu mukaleo ali vakevo. Shukulu Kalunga nendekamo.”

Mukanda wa Shemaya

²⁴ Shukulu Kalunga Muka-nzili yoshe, Njambi ya Isalele, wanjilekele ngeci njileke Shemaya kaNehelame ngwange,

²⁵ Shukulu Kalunga Muka-nzili yoshe, Njambi ya Isalele alinakwendeka ngwendi, “Unatumu mikanda mu lizina lyove ku vanu voshe va mu Yelusalema, na kuli Zefaniya muna Maseya muka-kukombelela, na kuli vaka-kukombelela veka. Co wendekele kuli Zefaniya ngwove,

²⁶ “Shukulu Kalunga wakupwisile muka-kukombelela kukwingisa mu mwela wa Yehoyanda, co ololo unapu u mwata wakama mu Njuvo ya Shukulu Kalunga. Cinapu cipangi cove kumona ngeci munu woshe wakuzaluka, uje alikwisa kupwa muka-kwimanena, unapande kumukuta malyenge nakumuzengeleka cikuvo ku mukoshi wendi.

²⁷ Omwo vikajo kuwalingile evi kuli Njelemiya wa ku Anatote, uje wakele nakwendeka kupwa muka-kwimanena kuli vanu?

²⁸ Napande kulikela omwo walekele vanu mu Mbambilone ngwendi vakapwa vinzinda muje simbu yakama, co vanapande kutunga vinjuvo, nakutumbama, nakukuna vyakulya mu mahya nakuvilya.”

²⁹ Co Zefaniya wanjilavelele uje mukanda,

³⁰ co Shukulu Kalunga wanjilekele ngeci,

³¹ njitume majwi awa kuli vinzinda voshe vaje vali ku Mbambilone, njivaleke vije vyanendeka Shukulu Kalunga ali Shemaya ngwange Shukulu Kalunga nendeka ngwendi, “Shemaya wambulwile vuka-kwimanena kuli yeni, oloni kunjamutumine embwe, namilingisa ngeci mukulaele vya makuli.

³² Njikanyanyamesa Shemaya kaNehelame, na vatekulwila vendi. Co kakakala na vatekulwila akati keni, nambe kumona vyuma vyavivwa vije vinjikalingila vanu vange, omwo wavalekele ngeci vanjitengulukile nakunjilwisa. Yange Kalunga, njinendekamo.”