Njelemiya 28 - Livulu lya Shukulu Kalunga

Njelemiya na Hananiya muka-kwimanena

¹ Mu mwaka uje vene, ku ngonde yamucitanu, mu mwaka wamuciwana uje Zendekiya wapwile mwene, Hananiya muna Azule, muka-kwimanena wa ku nganda ya Ngimbiyone, wendekele kuli yange mu Njuvo ya Shukulu Kalunga, ku mesho a vaka-kukombelela na ku mesho a vanu, Hananiya wanjilekele

² ngwendi Shukulu Kalunga Muka-nzili yoshe, Njambi ya Isalele, nendeka ngwendi, “Njinamanesa laja nzili ya mwene wa Mbambilone.

³ Mu myaka ivali lika njikelwisa vufuko vwoshe vwa mu Njuvo yange ku mwela uno vuje vwatwalele Mwene Nevukaneza ku Mbambilone.

⁴ Co lalo njikelwisa mwene wa mu Yunda, na Yehoyakine muna Yehoyakime, amolika na vanu voshe va mu Yunda, vaje vaile mu vunzinda mu Mbambilone. Eyo, njikamanesa nzili ya mwene wa Mbambilone. Yange Kalunga, njinendekamo.”

⁵ Asinoni njendekele kuli Hananiya ku mesho a vaka-kukombelela na ku mesho a vanu voshe vaje vemanene mu Njuvo ya Shukulu Kalunga ngwange,

⁶ “Ewa! Shukulu Kalunga alinge ngoco! Shukulu Kalunga ashulise majwi ove a vuka-kwimanena, akwilwisa vufuko vwoshe vwa mu Njuvo ya Shukulu Kalunga, vuje vwaile ku Mbambilone, nakwiluka lalo kwa vanu voshe vaje vavatwalele mu vunzinda.

⁷ Oloni tolilila ku vije vinjendeka kuli yove na ku vanu voshe.

⁸ Vaka-kwimanena vaje vendekele ku san̄ulu, omwo kanda simbu yange neyi yeni yete, vambulwile ngwavo nzita, na njala ya lyangengela, na mushongo vikaija ku miyati yaingi na ku vumwene vwakama.

⁹ Oloni muka-kwimanena uje ambulula vuka-kwimanena vwa kwoloka, nga majwi aje ambulula anasholoka, co vakamutumbula ngwavo mwa vushunga Shukulu Kalunga ikeye namutumu.”

¹⁰ Asinoni Hananiya watundisile mandauluwa mu mukoshi wange, waitavozwele mu vimbazuvwila vyavingi,

¹¹ co wendekele ku mesho a vanu voshe ngwendi, “Shukulu Kalunga nendeka ngwendi omu mukemwo mwakatavula mandauluwa ya Mwene Nevukaneza ije yanaaka mu mikoshi ya vanu voshe, co akalinga eci mu myaka ivali lika.” Co njaile.

¹² A simbu imo munima yevi, Shukulu Kalunga wanjilekele

¹³ kuya nakuleka Hananiya ngwange, “Shukulu Kalunga nendeka ngwendi yove wasa kutavula mandauluwa ya citi, oloni akengisamo mandauluwa ya cikuvo.

¹⁴ Shukulu Kalunga Muka-nzili yoshe, Njambi ya Isalele, nendeka ngwendi akaka mandauluwa ya cikuvo a mikoshi ya vanu voshe ngeci vapangele Mwene Nevukaneza wa Mbambilone. Shukulu Kalunga nendeka ngwendi nameme tusitu akavononwesa ngeci vapangele Nevukaneza.”

¹⁵ Asinoni njalekele Hananiya ngwange, “Tolilila, Hananiya! Shukulu Kalunga kakutumine embwe, co ulinakulingisa ava vanu kukulaela makuli.

¹⁶ Co Shukulu Kalunga nendeka ngwendi akakutundisa. Ukatsa omo kanda mwaka uno ucihwe, omwo unaleke vanu kutengulukila Shukulu Kalunga nakumulwisa.”

¹⁷ Co Hananiya watsile mu ngonde yamucitanu na vivali mu mwaka uje vene.