Njelemiya 27 - Livulu lya Shukulu Kalunga

Njelemiya alyaka mu mandauluwa ya vingombe

¹ Omo Zendekiya muna Yosiya wapwile mwene wa mu Yunda, co Shukulu Kalunga wanjilekele ngwendi

² njilipangele mandauluwa ya mikole ya vilambu na viti vya vimanda nakuyaka mu mukoshi wange.

³ Shukulu Kalunga wanjilekele kutuma majwi kuli vimyene va ku Endome, na ku Mowavi, na ku Amoni, na ku Tile, na ku Sindone, ali vaka-kwimanena mafuti avo vaje vezile ku Yelusalema mukumona Mwene Zendekiya.

⁴ Shukulu Kalunga Muka-nzili yoshe, Njambi ya Isalele, wanjilekele kuvashika ngeci vakaleke vimyene vavo ngwavo Shukulu Kalunga nendeka ngwendi,

⁵ “Yange njatangele kaye, na vanu, na tusitu, vaje vali ano asi, na nzili yange yakama na livoko lyange lyakwolola, co njivyana kuli munu uje injashaka.

⁶ Ngecivene, njinaana miyati ya vanu voshe ava kuli ngamba yange Mwene Nevukaneza wa Mbambilone, co njinononwesa nameme tusitu ngeci vamupangele.

⁷ Miyati ya vanu voshe vakamupangela, co vakapangela lalo munendi wa munalume na mutekulyendi wa munalume, noo simbu ikaija omo muyati wa vanu vendi ukawa. Asinoni muyati wa vanu vendi vakapangela miyati ya vanu va nzili na vimyene vakama.

⁸ “Oloni nga muyati umo nambe vumwene vumo kuvalikeesa ku mashiko endi, co njikanyanyamesa uje muyati na nzita, na njala ya lyangengela, na mushongo noo njikatavesa Nevukaneza kunyongesa uje muyati.

⁹ Kesi mutolilile kuli vaka-kwimanena veni, nambe kuli munu umo uje endeka ngwendi asa kulumbununa vyuma vya kulutwe, nambe a vinjozi, nambe akusana minzinzime ya vatsi, nambe a manseno a vulozi. Voshe vamileka ngwavo kesi mulikeese kuli mwene wa Mbambilone.

¹⁰ Valinakumikwisa, nakumilingisa ngeci vamitundise ku lifuti lyeni. Njikamishekela kulyala, co mukanyonga.

¹¹ Oloni nga muyati umo ulikeesa kuli mwene wa Mbambilone nakumupangela, co njikavecelela ngeci vakale mu lifuti lyavo, kulimamo nakukalamo. Yange Kalunga, njinendekamo.”

¹² Njendekele cuma cimolika kuli Mwene Zendekiya wa mu Yunda ngwange, “Likeese kuli mwene wa Mbambilone. Mupangele ikeye nakupangela lalo vanu vendi, co ukayoya.

¹³ Omwo vikajo yove na vanu vove mutsila mu nzita nambe ku njala ya lyangengela nambe kutsa ku mushongo? Omu mukemwo mwanendeka Shukulu Kalunga ngwendi cikalingiwa ku muyati woshe-iwoshe uje kuwasa kulikeesa kuli mwene wa Mbambilone.

¹⁴ Kesi utolilile kuli vaka-kwimanena vaje vakuleka ngwavo kesi uliite kuli ikeye. Valinakukukwisa.

¹⁵ Vavenya Shukulu Kalunga nendeka ngwendi kavatumine, valinakumikwisa mu lizina lyendi. Ngecivene, akamisheka, co vakamitsiya, yeni na vaka-kwimanena vaje valinakumileka vya makuli.”

¹⁶ Asinoni njalekele vaka-kukombelela na vanu ngwange Shukulu Kalunga nendeka ngwendi, “Kesi mutolilile kuli vaka-kwimanena vaje vendeka ngwavo vufuko vwa mu Njuvo ya Shukulu Kalunga ololo vakavwilwisa lalo kutunda ku Mbambilone. Valinakumikwisa.

¹⁷ Kesi muvatolilile embwe! Likeeseni kuli mwene wa Mbambilone, co mukayoya! Omwo vikajo nganda eyi ikemuka ngundu?

¹⁸ Nga vanapu vaka-kwimanena va vushunga, co lalo vali na lijwi lyange, vanjilombe yange Kalunga Muka-nzili yoshe, ngeci vufuko vuje vunasala mu Njuvo yange na mu lipela lya mwene wa mu Yunda na mu Yelusalema kesi vavutwale ku Mbambilone.”

¹⁹ (Evi vikevyo vyanendeka Shukulu Kalunga Muka-nzili yoshe a vimanda, na lizau lya vunengu, na vwimaneno, na vufuko vukwavo vwa mu Njuvo ya Shukulu Kalunga vuje vwasalele mu nganda,

²⁰ vije vyasezele Nevukaneza mwene wa Mbambilone omwo watwalele mu vunzinda Yehoyakine muna Yehoyakime mwene wa mu Yunda, kutunda ku Yelusalema nakuya ku Mbambilone, amolika na vakulunu voshe va mu Yunda na Yelusalema.)

²¹ “Tolilileni ku vije njendeka yange Kalunga Muka-nzili yoshe, Njambi ya Isalele, a vufuko vuje vwasalele mu Njuvo yange na mu lipela mu Yelusalema.

²² Vakavutwala ku Mbambilone, co vukakala kuje noo njikavwanuka. Asinoni njikavwilwisa nakuvwaka mu mwela uno. Yange Kalunga, njinendekamo.”