Njelemiya 26 - Livulu lya Shukulu Kalunga

Njelemiya vamunena mukumusompa

¹ Omo Yehoyakime muna Yosiya washangumukile kupwa mwene wa mu Yunda,

² Shukulu Kalunga wendekele kuli yange ngwendi, “Imana mu mbanja ya Njuvo yange, wambulule vyoshe vije njakushikile kuvyendeka kuli vanu vaje vatunda mu vinganda vya mu Yunda kwija kuno mukulemesa. Kesi ukasezeo cuma cimo embwe.

³ Amo vanu vakatolilila nakwecela vingila vyavo vyavivi. Nga valingamo, asinoni njikatengulula viyongola vyange vyakunyongesa vinjinayongola ali vakevo omwo a vilinga vyoshe vya vuvi vwavo.”

⁴ Shukulu Kalunga wanjilekele njileke vanu ngwange, “Shukulu Kalunga nendeka ngwendi yeni munapande kunjononoka nakukava vilongesa vije njamyanene,

⁵ nakwaka mbunge ku majwi a vangamba vange, vaka-kwimanena, vaje njakele nakutuma kuli yeni ku simbu ku simbu. Co yeni kumwononokele ku vije vamilekele.

⁶ Co nga yeni kumunjononoka, njikalinga ku Njuvo yeyi ngwe vije njalingile ku Shilo, co miyati ya vanu voshe va mu kaye vakapangesa lizina lya nganda eyi kupwa cisingo.”

⁷ Vaka-kukombelela, na vaka-kwimanena, na vanu voshe vaje vanjizivile njilinakwendeka vyuma evi mu Njuvo ya Shukulu Kalunga,

⁸ co omo njamanesele kwendeka vyoshe vije vyanjishikile Shukulu Kalunga, vaka-kukombelela, na vaka-kwimanena, na vanu voshe vanjikokangeyeye nakutambeka ngwavo, “Vanapande kukutsiya a evi unendeka.

⁹ Omwo vikajo unendeka mu lizina lya Shukulu Kalunga ngwove, eyi Njuvo ya Shukulu Kalunga ikapwa ngwe Shilo, co lalo ngwove na nganda eyi vakainyongesa, naumo wai akakalamo?” Asinoni vanu vanjizengelekele.

¹⁰ Omo vantwama va mu Yunda vazivile vije vyalingiwile, co vazambwile kutunda ku lipela nakuya ku Njuvo ya Shukulu Kalunga, nakutumbama mu myela yavo ku Cikolo Caciha.

¹¹ Asinoni vaka-kukombelela na vaka-kwimanena vendekele kuli vantwama na kuli vanu ngwavo, “Ou munu vanapande kumusompela kutsa, omwo nendeka vyakulwisa nganda yetu. Mwalizivila yeni vavenya na matwi eni.”

¹² Asinoni njendekele ngwange, “Shukulu Kalunga wanjitumine kwambulula vuka-kwimanena vwa vije vikaija a Njuvo ya Shukulu Kalunga na nganda eyi, vije mwazivile vinjendekele vya a Njuvo ya Shukulu Kalunga na nganda eyi.

¹³ Munapande kutenguluka kutunda ku vingila vyeni vyavivi, na ku vyuma vimulinakulinga, co munapande kwononoka Shukulu Kalunga Njambi yeni. Nga mulingamo, co akatengulula viyongola vyendi vyakuminyongesa vije vyendekele ngwendi akavinena ali yeni.

¹⁴ Ngwe yange ni, njili mu mavoko eni. Njilingeni mwoshe mucinamivwaela mu vimbunge.

¹⁵ Oloni zivukeni ngweni nga munjitsiya, co yeni, na nganda ino, mukakala na mulonga wakutsiya munu wakujeneka mulonga, omwo Shukulu Kalunga ikeye wanjitumine ngeci njiminangule.”

¹⁶ Asinoni vantwama na vanu vendekele kuli vaka-kukombelela na kuli vaka-kwimanena ngwavo, “Munu ou kapandele kutsa omwo nakala nakwendeka kuli yetu mu lizina lya Shukulu Kalunga Njambi yetu.”

¹⁷ Munima yevi, vakulunu vamo vakatukile, vendekele kuli vanu vaje vakungulukile ngwavo,

¹⁸ “Omo Hezekiya wapwile mwene wa mu Yunda, Mika muka-kwimanena wa ku Moleshete walekele vanu voshe ngwendi Shukulu Kalunga Muka-nzili yoshe nendeka ngwendi, ‘Siyone vakailima ngwe muvakalimi lihya, Yelusalema ikapwa mutumbo, na munkinda wa Njuvo ya Shukulu Kalunga ukapwa ngwe malundu a mu shwata.’

¹⁹ “Mwene Hezekiya na vanu va mu Yunda kuvatsiile Mika. Oloni Hezekiya wasingimikile Shukulu Kalunga, nakulambelela ngozi ya Shukulu Kalunga. Co Shukulu Kalunga watengulwile viyongola vyendi ku vukalu vuje vwashakele kunena ali vakevo. Yetuco lelo tushaka kulikokela tuyando manene yetu vavenya.”

²⁰ (Kwakele munalume umo lalo, lizina lyendi Uliya muna Shemaya wa ku Kilyate Njelime, uje wambulwile mu lizina lya Shukulu Kalunga kulwisa nganda eyi na lifuti eli ngwe mwalingile Njelemiya.

²¹ Omo Mwene Yehoyakime na mashwalale vendi na vamyata vendi vazivile vije vyendekele Uliya, mwene washakele ngeci vamutsiye. Oloni omo Uliya wazivile vyuma evi wazivile lyova, co watewelele ku Ingito.

²² Nameme ngoco, Mwene Yehoyakime watumine Elenatane muna Akambole na vanalume veka lalo ku Ingito kukashaka Uliya.

²³ Vanenele Uliya kuli Mwene Yehoyakime, co wamutsiile nakumbila muvila wendi mu vimbumbo vya vanu voshe.)

²⁴ Oloni Ahikame muna Shafane, waamenene Njelemiya. Ngecivene, Njelemiya kuvamwanene kuli vanu ngeci vamutsiye.