Njelemiya 25 - Livulu lya Shukulu Kalunga

Citozi wa ku kunto

¹ Mu mwaka wamuciwana uje Yehoyakime muna Yosiya wapwile mwene wa mu Yunda, njatambwile lijwi lyakutunda kuli Shukulu Kalunga ali vanu va mu Yunda. (Wapwile mwaka wakulivanga uje Nevukaneza wapwile mwene wa Mbambilone.)

² Co njendekele kuli vanu voshe va mu Yunda na mu Yelusalema ngwange,

³ “A myaka makumi avali na itatu, kutunda ku mwaka wamulikumi na itatu uje Yosiya muna Amoni wapwile mwene wa mu Yunda kweta ku litangwa lya lelo, Shukulu Kalunga nendeka kuli yange, co kunjajukile kumileka vije vyendekele. Oloni kumwombileko mbunge embwe.

⁴ Kumwasele kutolilila nambe kumbako mbunge, nameme Shukulu Kalunga watwaleleo kutuma vangamba vendi vaka-kwimanena, kuli yeni.

⁵ Vamilekele ngeci mutunde ku vingila vyeni vyavivi na ku vilinga vyavivi na ku vyuma vyavivi vije vimulinakulinga, ngeci mwase kukala mu lifuti lije Shukulu Kalunga waanene kuli yeni na kuli vakukulwila veni ngeci lipwe vufuko vweni ku myaka yoshe.

⁶ Vamilekele ngeci kesi mulemese nakupangela vinjambi vangoco, co kesi muluvalese Shukulu Kalunga akulemesa tumponya tuje tumunashongo. Nga mwononokele Shukulu Kalunga, nga kaminyanyamesele embwe.

⁷ Oloni vavenya Shukulu Kalunga nendeka ngwendi mwavyanene kumutolilila. Oloni mwamuluvalesele na tumponya tweni, nakulikokela cihiso yeni vavenya.

⁸ “Ngecivene, omwo kumwasele kumutolilila, Shukulu Kalunga Muka-nzili yoshe alinakwendeka ngwendi,

⁹ ‘Njikanena miyati ya vanu voshe vakutunda ku kunto na ngamba yange, Mwene Nevukaneza wa Mbambilone. Njikavanena ngeci vakulwise Yunda na vanu vamwo, nakulwisa miyati ya vaje muvanalyatela. Njikanyongesa muyati ou na vandambo vavo, co kukakala vingundu lika, cikapwa cimweso cakukomokesa nakulisimoka. Yange Kalunga, njinendekamo.

¹⁰ Njikolwesa miyoyo yavo yakujolela nakuvwaelela, na miyoyo yakuvwaelela a viwano vya malo. Kuvakakala na mazi mu vindeya vyavo, co kukukakala lalo vimbuto vya vinona.

¹¹ Lifuti lyoshe eli likapwa ngundu, likapwa mutambela wakukomokesa, co miyati ya vanu vavanalyata navo vakapangela mwene wa Mbambilone myaka makumi atanu na avali.

¹² Co munima yevi njikanyanyamesa Mbambilone na mwene wamwo a vuvi vwavo. Co njikanyongesa lifuti lije nakulipwisa ngundu ku myaka yoshe.

¹³ Njikanyanyamesa Mbambilone na tuyando twoshe tuje njashakele kunena a miyati ya vanu omo njendekele muli Njelemiya, tuyando twoshe vasoneka mu livulu eli.

¹⁴ Njikalinga shambandinga vaka-Mbambilone a vije valingile, co miyati ya vanu vavangi na vimyene vakama vakapwisa vaka-Mbambilone vindungo.’ ”

Kusompa kwa Njambi a miyati yeka

¹⁵ Shukulu Kalunga, Njambi ya Isalele, wendekele kuli yange ngwendi, “Nganja ya vinyu eyi inashulu na vukalu vwange. Itwale kuli voshe vaje kesi vaYunda kuje njikakutuma, co vanwiseyo.

¹⁶ Co omo vakevo vananumo, vakapelyangela, co mana avo akaya mweka omwo a nzita ije njituma kuli vakevo yakuvalwisa.”

¹⁷ Njatambwile ije nganja mu livoko lya Shukulu Kalunga, njayanene kuli vaje kesi vaYunda kuje Shukulu Kalunga wanjitumine, co njavanwisileyo.

¹⁸ Yelusalema na vinganda vyoshe vya mu Yunda, amolika na vimyene vamwo, na vamyata, vanwilemo, ngeci vapwe mambo yakukomokesa nakulisimoka, co vanu vakapangesa lizina lyavo kupwa cisingo, ngwe muje muvali nakulinga na simbu ino.

¹⁹ Ou ukewo mukana wa voshe vaje vanwile mu nganja ije, mwene wa Ingito, na vamyata vendi, na vantwama, vaka-Ingito voshe,

²⁰ na voshe vaka-kwija va mu Ingito, na vimyene voshe va mu lifuti lya Uze, na vimyene voshe va ku Filisitiya, va vinganda vya Ashekelone, na Ngaza, na Ekelone, na vaje vasalele mu Ashendonde,

²¹ na vanu voshe va mu Endome, na Mowavi, na Amoni,

²² na vimyene voshe va mu Tile, na Sindone, na vimyene voshe va ku man̄anda a Menditelenyani, na ku vinganda vya

²³ Ndendane, na Tema, na Mbuze, na vanu voshe vaje vatewile vin̄ambu vyavo,

²⁴ na vimyene voshe va mu Alambiya, na vimyene voshe va miyati ya mu mambo,

²⁵ na vimyene voshe va mu Zimeli, na Elame, na Mendiya,

²⁶ na vimyene voshe va ku kunto, na ava vakulyala na muyehi, kulikavasana umo na mukwavo. Muyati na muyati wa vanu va ano asi vanwilemo. Co akukotoka kwa vyoshe, mwene wa mu Mbambilone akainwa.

²⁷ Asinoni Shukulu Kalunga wendekele kuli yange ngwendi, “Leka vanu ngwove yange Kalunga Muka-nzili yoshe, Njambi ya Isalele, njivashika vanwe vapende nakushanja, vawe kesi venduke, omwo a nzita ije njituma kuli vakevo yakuvalwisa.

²⁸ Nga vakevo vavyana kutambula nganja mu livoko lyove nakuyinwa, co valeke ngwove, Shukulu Kalunga Muka-nzili yoshe, nendeka ngwendi kuvanga vene vainwe.

²⁹ Njikashangumuka vipangi vyange vyakunyongesa mu nganda yange vavenya. Kuma vayongola ngwavo kuvakavanyanyamesa ndi? Embwe, vakavanyanyamesa, omwo njikatuma nzita ku vanu voshe ano asi. Yange Kalunga Muka-nzili yoshe, njinendekamo.

³⁰ “Yove Njelemiya, unapande kwambulula vyuma vyoshe vinjinendeka. Unapande kuleka vanu ava ngwove, ‘Shukulu Kalunga alinakwaana ngwe ndumba oku ali mwilu, nakuluma mwilu ya melu, akaana ngwe ndumba mukulwisa vanu vendi, akatambeka ngwe munu alinakulyatangela mikolovozi ya vushuka vwa vinyu. Vanu voshe va ano asi vakamuziva,

³¹ co cilumo ciketa na aje asikisila kaye. Shukulu Kalunga ali na n̄anda na vaka-mafuti. Akakungulwila vanu ku cisompelo, nakutsiya vaka-vuvi. Shukulu Kalunga nendekamo.’ ”

³² Shukulu Kalunga Muka-nzili yoshe alinakwendeka ngwendi tuyando twakama tulinakwija ku muyati umo wa vanu na ku muyati ukwavo wa vanu, co lihunzi lyakama lilinakulikungulwila ku shongo ya kaye kwoshe.

³³ A litangwa lije, mivila ya vaje vaatsiile Shukulu Kalunga ikakala nakushandozoka kutunda ku shongo imo ya kaye nakweta ku shongo ikwavo. Naumo wai akavalila, nambe kuvatsinda. Vakalala asi ngwe mitumbo ya vwilo.

³⁴ Lileni, yeni vantwama, yeni tunyungi va vanu vange, lileni manene! Lileni nakulikotinga mu livu. Omwo simbu yeni inete yakumitsiya, co vakamitsiya ngwe majamba a vimanga.

³⁵ Co kuli yeni kukwesi ngila yeka lalo yakuputumukilamo yai.

³⁶ Tolilileni tunyungi muvali nakulila, vakulunu va tunyungi valinakulinyenga, omwo Shukulu Kalunga alinakunyongesa vulilo vwa vimuna vavo.

³⁷ Malimba aje a kwoloka anavaye, omwo vukalu vwa Shukulu Kalunga vwakama manene.

³⁸ Shukulu Kalunga naseza vanu vendi, ngwe ndumba akatuka mu livandelo lyendi. Vukalu vwa nzita, nakuluvala kwakama kwa Shukulu Kalunga vinatengulula lifuti kupwa mambo.