Njelemiya 24 - Livulu lya Shukulu Kalunga

Mitonga ivali ya vushuka vwa mikuyu

¹ Shukulu Kalunga wanjimwesele mitonga ivali ya vushuka vwa mikuyu ije vatumbikile kulutwe lwa Njuvo ya Shukulu Kalunga. (Eci calingiwile omo Mwene Nevukaneza wa Mbambilone natwala laja Mwene Yehoyakine wa mu Yunda muna Yehoyakime kutunda ku Yelusalema nakuya ku Mbambilone kupwa cinzinda, amolika na vantwama va mu Yunda, na vatongwe vaka-kushonga, na vatongwe vaka-kufula.)

² Mu mutonga wakulivanga mwakele vushuka vwavuvwa vwa mikuyu, vuje vukalivanga kuhya, co mu mutonga ukwavo mwakele vushuka vwa mikuyu vwavuvi, vwapwile vwavuvi manene akuvulya.

³ Asinoni Shukulu Kalunga wendekele kuli yange ngwendi, “Njelemiya, vikajo unamono?” Co njakumbulwile ngwange, “Vushuka vwa mikuyu. Vushuka vwavuvwa vunapu vwavuvwa manene, co vushuka vwavuvi vunapu vwavuvi manene, kuvuvwaa kuvulya.”

⁴ Ngecivene, Shukulu Kalunga wendekele kuli yange ngwendi,

⁵ “Yange Kalunga, Njambi ya Isalele, njayongola ngwange vanu vaje vavatwala ku Mbambilone vanafu ngwe vushuka vwa mikuyu vuje vwavuvwa, njikavazivila mema ku mbunge.

⁶ Njikavanyunga nakuvelwisila lalo mu lifuti eli. Yange vene njikakala navo. Kunjikavashandola embwe, njikavakongweya, kuvakatundumo embwe.

⁷ Co njikavana mbunge yakuzivuka ngeci yange njapwa Kalunga. Asinoni vakapwa vanu vange, co yange njikapwa Njambi yavo, omwo vakelukila kuli yange na mbunge yavo yoshe.

⁸ “Ngwe ali Mwene Zendekiya wa mu Yunda, na ali vaje vaka-kuyongola vin̄anda vya lifuti vaje vali navo amo, na vanu voshe va mu Yelusalema vaje vanasala mu lifuti lino, nambe vanai ku Ingito, yange Kalunga, njikavapwisa voshe ngwe vushuka vwa mikuyu vuje vwavuvi manene kuvuvwaa kuvulya.

⁹ Njikanena vukalu ali vakevo ngeci miyati yoshe ya mu kaye vakalikomokele. Vanu vakavashendumuna, co vakalinga litangalakazi ali vakevo, nakuvayengula, nakupangesa mazina avo ngwe cisingo kwoshe kuje njavashandwela.

¹⁰ Njikatuma nzita, na njala ya lyangengela, na mushongo ali vakevo ngeci naumo wai akasalao mu lifuti lije linjanene kuli vakevo na kuli vakukulwila vavo.”