Njelemiya 23 - Livulu lya Shukulu Kalunga

Kukulaela vya kulutwe

¹ Kusompa kwa Shukulu Kalunga kukapwa kwakukalu manene ali vaka-kushwana vaje vanyongesa nakushandola vanu vendi!

² Evi vikevyo vyalinakwendeka Shukulu Kalunga, Njambi ya Isalele, ali vaka-kushwana vaje vapandele kunyunga vanu vendi ngwendi, “Yeni kumwanyungile vanu vange, munavashandola nakuvashekela kulyala. Mwa vushunga njikaminyanyamesa omwo vuvi vuje vumunalingi.

³ Njikatundisa vanu vange vaje vanasalao ku mafuti kuje kunjavashandwelelele, co njikavelwisa mu lifuti lyavo. Vakakala na vana vavangi, co vakatuma manene.

⁴ Njikemika vaka-kushwana ngeci vavanyunge. Vanu vange kuvakazivi lalo lyova nambe kutewa, co naumo wai akazimbalao lalo. Yange Kalunga, njinendekamo.”

⁵ Shukulu Kalunga alinakwendeka ngwendi, “Simbu ilinakwija omo njikaangula mwene wa kulongwa wa ku vatekulwila va Ndaviti. Mwene uje akashwana na mana, nakulinga vyavivwa na vushunga mu lifuti mwoshe.

⁶ Omo akapwa mwene, vanu va mu Yunda vakakala mwamuvwa, na vanu va mu Isalele vakayoya mu kwoloka. Vakamutumbula ngwavo, ‘Shukulu Kalunga Kwamena Kwetu.’ ”

⁷ Shukulu Kalunga alinakwendeka ngwendi, “Simbu ilinakwija omo vanu kuvakalisingi lalo a lizina lyange kupwa Njambi wakuyoya uje watundisile vanu va Isalele mu lifuti lya Ingito.

⁸ Oloni vakalisinga a lizina lyange kupwa Njambi wakuyoya uje watundisile vanu va Isalele ku lifuti lya ku kunto na ku mafuti oshe eka lalo kuje kunjavashandwelelele. Asinoni vakakala mu lifuti lyavo.”

Majwi a Njelemiya ali vaka-kwimanena

⁹ Mbunge yange inazeye, co njilinakujaja. Omwo Shukulu Kalunga, omwo majwi endi akujela Njinafu ngwe munu wakupenda, ngwe munu nanu manene vinyu.

¹⁰ Lifuti lyashulu na vanu vakujeneka kulongwa kuli Shukulu Kalunga vapangesa nzili yavo mukulinga vyuma vyavivi. Omwo ya cisingo ca Shukulu Kalunga lifuti lilinakulila, co mu vyana vyakulila vimuna munomu cau.

¹¹ Shukulu Kalunga alinakwendeka ngwendi, “Vaka-kwimanena na vaka-kukombelela voshe kesi vaka-kunjikomoka, njinavawana valingila vuvi mu Njuvo yange.

¹² Vingila vije vivakakavangeya vikapwa vya lisusulungu nakuseneta, njikavatanukisa nakuvawisa. Njikanena vukalu ali vakevo, simbu yakuvanyanyamesa ilinakwija. Yange Kalunga, njinendekamo.

¹³ Njinamono vuvi vwa vaka-kwimanena va ku Samaliya, vanambulula mu lizina lya Mbale nakuungumwisa vanu vange va Isalele.

¹⁴ Oloni njinamono vaka-kwimanena mu Yelusalema, vakevo ni vanai mweka valinga vupangala nakwendeka makuli, vakundwiya vanu kulinga vuvi, ngeci naumo wai alikela kulinga vuvi. Kuli yange, voshe vanapu vavavi ngwe vanu va ku Sondoma na Ngomola.

¹⁵ “Ngecivene, evi vikevyo vinjendeka yange Kalunga Muka-nzili yoshe ali vaka-kwimanena va mu Yelusalema. Njikavalisa vimena vyakulula, nakuvanwisa mwaze omwo vanashandola vuvi mu lifuti mwoshe.”

¹⁶ Shukulu Kalunga Muka-nzili yoshe wendekele kuli vanu va mu Yelusalema ngwendi, “Kesi mutolilile ku vije vendeka vaka-kwimanena, valinakumilongesa vya makuli. Vamileka vije vivalukiya vakevo vavenya, kesi vije vinjendeka yange embwe.

¹⁷ Valeka vanu vaje vanavyana kutolilila kuli yange ngwavo vakakala mu kwoloka, co valeka woshe uje nakaluwisa mbunge yendi ngwavo kukwesi vukalu vukaija kuli ikeye.”

¹⁸ Njendekele ngwange, “Naumo wai wa ali ava vaka-kwimanena nazivuka viyongola vya Shukulu Kalunga vya mu vushweke. Naumo wai wa ali vakevo waziva laja nambe kuzivisisa lijwi lyendi, nambe kutolilila, nambe kumbako mbunge kuli vije vyendekele.

¹⁹ Vukalu vwendi vunapu lisindu-mbowe, vwapwa lihunzi lyakukomokesa, lya vukalu lije likaija a mitwe ya vaka-vuvi,

²⁰ vukalu vwa Shukulu Kalunga kuvukahu kuvanga noo namanesa kulinga vyuma vyoshe vije vyayongwele kulinga. Ku matangwa a kulutwe vanu vendi vakazivisisa vyuma evi mwamuvwa.”

²¹ Shukulu Kalunga wendekele ngwendi, “Kunjatumine vaka-kwimanena ava, oloni nameme ngoco vaile. Kunjaavanene majwi akwendeka, oloni anga vambulwile vuka-kwimanena mu lizina lyange.

²² Nga vazivukile viyongola vyange vya mu vushweke, nga vambulwile majwi ange ku vanu vange nakuvatundisa ku vingila vyavo vya vuvi, na ku vilinga vyavo vya kupenga-penga.

²³ “Yange njapwa Njambi uje wakala kwoshe, kesi mu mutambela umolika embwe.

²⁴ Naumo wai avanda ngeci njijeneke kumumona. Kuma kumuzivuka ngweni yange njakala kwoshe-ikwoshe mwilu na ano asi ndi?

²⁵ Yange njazivuka vivanendeka vaje vaka-kwimanena vaje vambulula vya makuli mu lizina lyange, nakwendeka ngwavo njavaleke majwi mu vinjozi vyavo.

²⁶ Visimbu vingaijo vaka-kwimanena ava vaungumwisa vanu vange, a makuli awa avanatungu?

²⁷ Vayongola ngwavo vinjozi vije vambulula vikalingisa vanu vange ngeci vanjivale, ngwe muvanjivalele vakukulwila vavo, co vatengulukilile kuli Mbale.

²⁸ Muka-kwimanena uje alota njozi ambulule lika vya njozi yendi, oloni muka-kwimanena uje nazivi majwi ange, napande kuwambulula mu vushunga. Vishati vili na vuvwa mukajo nga vavyeseka na tiliku?

²⁹ Majwi ange apwa ngwe tuhya, co lalo apwa ngwe muveto uje utavozola mamanya vimbazuvwila-mbazuvwila.

³⁰ Njazinda vaka-kwimanena vaje vambata majwi kuli umo na mukwavo, co vambulula ngwe majwi ange.

³¹ Co lalo njazinda vaka-kwimanena vaje vendeka majwi avo, co vambulula ngwe atunda kuli yange.

³² Tolilileni vinjendeka yange Kalunga! Njazinda vaka-kwimanena vaje vambulula vinjozi vya makuli, co vaungumwisa vanu vange na makuli avo na kulyalesa kwavo. Yange kunjavatumine nambe kuvashika ngeci vaye, co lalo kuvesi na seo kuli vanu. Yange Kalunga, njinendekamo.”

Citele ca Shukulu Kalunga

³³ Shukulu Kalunga wendekele kuli yange ngwendi, “Njelemiya, nga umo wa ali vanu vange, nambe muka-kwimanena, nambe muka-kukombelela akwihula ngwendi, ‘Citele ca Shukulu Kalunga cika?’ Valeke ngwove, ‘Yeni munapu citele kuli Shukulu Kalunga, co ikeye akamyumbila kuti.’

³⁴ Nga umo wa ali vanu vange, nambe muka-kwimanena, nambe muka-kukombelela, nameme endeka majwi ngwendi, ‘Citele ca Shukulu Kalunga,’ co njikamunyanyamesa na naanga yendi.

³⁵ Oloni munu na munu ehule vasamba vendi na vavushoko vwendi ngwendi, ‘Shukulu Kalunga nakumbulula vatijo? Vikajo vyanendeka Shukulu Kalunga?’

³⁶ Ngecivene, kuvapandele kwendeka majwi ngwavo, ‘Citele ca Shukulu Kalunga,’ omwo nga umo alingamo, co mwa vushunga njikapangesa majwi ange ngeci akapwe citele kuli ikeye. Vanu vanaviisa majwi a Njambi yavo, ikeye Njambi wakuyoya Shukulu Kalunga Muka-nzili yoshe.

³⁷ Njelemiya, ihula vaka-kwimanena ngwove, ‘Shukulu Kalunga namikumbulula vatijo? Vikajo vyanendeka Shukulu Kalunga kuli yeni?’

³⁸ Nga kuvononoka mashiko ange nakwendeka ngwavo, ‘Citele ca Shukulu Kalunga.’ Ngecivene, valeke ngwove,

³⁹ mwa vushunga vene njikavambata, co njikavombila kuti, amolika na vakevo na nganda ije injanene kuli vakevo na kuli vakukulwila vavo.

⁴⁰ Njikavazivisa shwamwa nakushauka vije naumo wai akacivala ku myaka yoshe.”