Njelemiya 22 - Livulu lya Shukulu Kalunga

Lijwi lya Njelemiya kuli vaka-naanga ya vumwene vwa Yunda

¹ Shukulu Kalunga wendekele kuli yange ngeci njiye ku njuvo ya Yunda, Njikendeke majwi awa ngwange,

² “Tolilila lijwi lya Shukulu Kalunga, yove Mwene wa mu Yunda uje natumbama a litanda lya Ndaviti na vamyata vove, na vanu va mu Yelusalema.

³ Yange Kalunga njikushika kulinga vije vyavivwa nevi vya vushunga. Ameneni vaje vavalinakunyanyamena kuli vaje valinakuvanyanyamena. Kesi muyandese vaka-kwija, na visiwa, nambe vifwile, co kesi mutsiile vanu vakujeneka mulonga mu mutambela ou wakujela.

⁴ Nga mwa vushunga mulinga ngwe munjinamishika, co vatekulwila va Ndaviti vakapwa vimyene simbu yoshe. Amolika na vamyata vavo, na vanu vavo, vakaita-ita mu vikolo vya lipela mu matemba, na a tuvalu.

⁵ Oloni nga kumwononoka mashiko ange, co njilisinga ngwange lipela eli likasiwuka nakunyonga. Yange Kalunga, njinendekamo.

⁶ “Kuli yange, lipela lya vumwene vwa Yunda linapu lyalivwa manene ngwe lifuti lya Ngilyande, co ngwe lalo Minkinda ya Lembanone, oloni njikalipwisa ngundu muje naumo wai akakalamo.

⁷ Njikatuma vanu ngeci vakalinyongese. Voshe vakaija na vinjaviti vyavo mukushinja vimanda vyayo vyavivwa vya kendale, nakuvyumbila mu liko.

⁸ “Munima yevi vaka-kwija vavangi vakaita kuje, vakalihula umo na mukwavo ngwavo omwo vikajo yange Kalunga, njalingi cuma cangacije ku nganda eyi yakama?

⁹ Asinoni vakakumbulula ngwavo omwo mwasezele cikumiiyo ceni nange Njambi yeni, co mwalemesele nakupangela vinjambi veka.”

Lijwi lya Njelemiya ali Yowahaze

¹⁰ Yeni vanu va mu Yunda, kesi mulile Mwene Yosiya nambe mulinyenge a kutsa kwendi. Oloni lileni manene munendi Yowahaze, valinakumutwala kulyala kakeluka lalo embwe, nambe kumona lifuti lyendi lya cisemwa.

¹¹ Shukulu Kalunga alinakwendeka ali Yowahaze muna Yosiya, uje washwanene a litanda lya ishe kupwa mwene wa mu Yunda ngwendi, “Yowahaze natundu kuno nai kweka kakeluka lalo.

¹² Akatsila ku lifuti kuje kuvanamutwala, co kakamono lalo lifuti lyendi lya cisemwa.”

Lijwi lya Njelemiya ali Yehoyakime

¹³ Luvinda ku munu uje a tunga njuvo yendi na vutumbe vwa vwizi, nakwamesa milili yayo ya akamwa na vutumbe vwa linyanyamena, uje apangesa vanu ngoco kujeneka kuvana fweto yavo.

¹⁴ Luvinda ku munu uje endeka ngwendi, “Njikalitungila njuvo yakama ije ili na milili yakama akamwa.” Ngecivene, aaka vinjanena ku njuvo yendi nakuyifwika na mavaya a kendale nakuyikwita mufwitilo wakuvenga.

¹⁵ Kuma wayongola ngwove u mwene wamuvwa kutuvakana vimyene voshe nga utunga vinjuvo vya kendale vyavivwa, kutuvakana vinjuvo vya vakweni voshe ndi? Isho walile nakunwa simbu yoshe wapwile wa kulongwa na vushunga, wavezikile mu vyuma vyoshe vije vyalingile.

¹⁶ Ikeye waamenene vaka-kuutwa, vyuma vyoshe kuli ikeye vyendele mwamuvwa. Omu mukemwo mucalumbunukila kuzivuka Shukulu Kalunga.

¹⁷ Oloni viyongola vyove vinapu vya muuka lika, utsiya vanu vakujeneka mulonga, nakuyandesa vanu vove na muuka. Mwanendeka Shukulu Kalunga.

¹⁸ Ngecivene, Shukulu Kalunga alinakwendeka ali Yehoyakime muna Yosiya mwene wa mu Yunda ngwendi, “Naumo wai akamulila nambe kwendeka ngwendi, ‘Kekange yaya, kekange ndolome yange!’ Naumo wai akamulila ngwendi, ‘Kekange shukulu yange!’ ‘Kekange mwene yange!’

¹⁹ Vakamutsinda ngwe cimulu, vakamukoka nakumumbila anja ya vikolo vya Yelusalema.”

Majwi a Njelemiya a vije vikasholoka mu Yelusalema

²⁰ Vanu va mu Yelusalema, yeni ku Lembanone nakutambeka, yeni ku lifuti lya Mbashane nakutambeka, tambekeni oku muli a minkinda ya Mowavi, omwo vasamba veni voshe vaka-kumikwasa kulwa nzita vanavafungulula.

²¹ Shukulu Kalunga wendekele neni omo mwakele mwamuvwa, oloni mwavyanene kumutolilila. Eci cikeco cifwa ceni tunde ku vwanike, kumwononokele Shukulu Kalunga.

²² Vantwama veni vakavapekumuna na lihunzi, vasamba veni vaka-kumikwasa kulwa vakavatwala ku vunzinda, nganda yeni vanaiyeluwisa nakuyizivisa shwamwa, omwo vuvi vwoshe vuje vumunalingi.

²³ Mulinakukala mwamuvwa mukati ka miti ya kendale yakutunda ku Lembanone, oloni mukakala manene na vusiwa mukakemanga omo mushongo ukamiwana, mushongo ngwe wa munakazi uje ashaka kukita.

Kusompa kwa Njambi ali Yehoyakine

²⁴ Shukulu Kalunga wendekele kuli Mwene Yehoyakine, muna Mwene Yehoyakime wa mu Yunda ngwendi, “Mwa vushunga yange njapwa Njambi wakuyoya, nameme nga wapwile kanzeya ka ku livoko lyange lya cilyo nga njakushomonako,

²⁵ nakukwana ku vanu vaje vawatewa, vaje vashaka kukutsiya. Njikakwana kuli Mwene Nevukaneza wa ku Mbambilone na mashwalale vendi.

²⁶ Yove na vanyoko njikamitwala ku lifuti lya vunzinda. Mukaya ku lifuti lije kumwasemukilile, co muvuvali vweni, mukatsila kuje vene.

²⁷ Mukashungwiya lalo kumona lifuti lino, oloni kumukelukilamo muno lalo.”

²⁸ Njendekele ngwange, “Kuma Mwene Yehoyakine napu ngwe njava ya kutsa ije ivanombila kuti, ije naumo wai aishaka ndi? Kuma mukemwo vana vendi vanavatwala ku vunzinda ku lifuti lije kuvazivukile mulyafwa?”

²⁹ Yove lifuti, lifuti, lifuti! Tolilila majwi a Shukulu Kalunga,

³⁰ Shukulu Kalunga nendeka ngwendi, “Munalume ou kakakala na vana, kakavezika mukuyoya kwendi kwoshe. Kakakala na vatekulwila, vaje vakamushwana mu Yunda kushwana a litanda lya Ndaviti. Yange Kalunga, njinendekamo.”