Njelemiya 21 - Livulu lya Shukulu Kalunga

Vambulula kufungulula kwa Njelemiya

¹ Mwene Zendekiya wa mu Yunda watumine Pashehule muna Malekiya kuli yange, na Zefaniya muka-kukombelela muna Maseya nakunjihula ngwendi,

² “Twendekeleko kuli Shukulu Kalunga, omwo Mwene Nevukaneza wa ku Mbambilone ashaka kutulwisa. Amo Shukulu Kalunga akalinga cikomokeso cimo ngeci Nevukaneza eluke.”

³ Asinoni Shukulu Kalunga wendekele kuli yange, co njalekele vaje vanalume vavatumine,

⁴ vakaleke Zendekiya vije vyendekele Shukulu Kalunga Njambi ya Isalele ngwange Shukulu Kalunga nendeka ngwendi, “Zendekiya njikafungulula mashwalale vove vaje valinakulwa na mwene wa ku Mbambilone na mashwalale vendi. Njikakungulwila amo vitwa vya mashwalale vove mukati ka nganda.

⁵ Njikalwa nove na nzili yoshe, na vukalu vwange na kuluvala kwange.

⁶ Njikatsiya vaje voshe vali muno mu nganda, vanu na tusitu vakatsa mu cifwa cimo ku mushongo wakukomokesa.

⁷ Oloni yove ni, na vamyata vove, na vanu vaje vanasalao mu nzita, na ku njala ya lyangengela, na ku mushongo, njikecelela yeni voshe vakamifungulule kuli Mwene Nevukaneza na ku vitozi veni vaje vakamitsiya. Nevukaneza akamitsiya kakasezeo umo nambe kumizivilako mema ku mbunge, nambe kutetelako munu umo. Yange Kalunga, njinendekamo.”

⁸ Asinoni Shukulu Kalunga wanjilekele njileke vanu ngwange Shukulu Kalunga nendeka ngwendi, “Tolilileni! Yange Kalunga njilinakumyana vingila vivali mwanguleo, ngila ije itwala ku mwonyo, na ngila ije itwala ku kutsa.

⁹ Woshe uje akala mu nganda vakamutsiila mu nzita nambe akalanduka ku njala, nambe akatsa ku mushongo. Oloni woshe uje atundamo, co akaliita kuli vaMbambilone vaje valinakulwisa nganda ololo, munu wa cifwa cangacije kuvakamutsii embwe, oloni akaputumukamo na mwonyo wendi.

¹⁰ Njinayongola ngeci kunjikecela nganda eyi, oloni kuyinyongesa vene. Njikayana kuli mwene wa ku Mbambilone, co ikeye akayenyeka njwa. Yange Kalunga, njinendekamo.”

Cisompelo a naanga ya njuvo ya vumwene vwa Yunda

¹¹ Shukulu Kalunga wanjilekele kuleka majwi awa ku naanga ya vumwene vwa Yunda, vatekulwila va Ndaviti ngwange Shukulu Kalunga nendeka ngwendi,

¹² “Tolilileni ku evi njendeka yange Kalunga. A litangwa na litangwa sompeni mwa vushunga. Ameneni vaje vavanevila vyavo kuli vaje valinakuvayandesa. Kutewa vukalu vwange vukashwama ngwe tuhya tuje naumo wai asa kutuzima, omwo a vuvi vuje mulinakulinga.

¹³ Yove Yelusalema watumbama a litanda lya akamwa ya cimbongo, ngwe limanya lyalilaja lya mu cana. Oloni yange njikakulwisa. Ulinakwendeka ngwove naumo wai asa kukulwisa nambe kutuva cimpaka cove.

¹⁴ Oloni njikakunyanyamesa ngwe ku vilinga vyove. Njikenyeka lipela lyove, co tuhya tukenyeka vyuma vyoshe vije vyazengelekako. Yange Kalunga, njinendekamo.”