Njelemiya 20 - Livulu lya Shukulu Kalunga

Pashehule aaka Njelemiya mu kamenga

¹ Omo Pashehule muka-kukombelela muna Imeli uje wapwile lalo mwata wakama wa Njuvo ya Shukulu Kalunga, wazivile vyuma vije vinjambulwile,

² wanjipupile nakunjikutila malyenge kuyehi na Cikolo ca Mbenjemani cije cakele akamwa ya Njuvo ya Shukulu Kalunga.

³ Alikaki mutondo Pashehule wanjitundisile mu malyenge, co njendekele kuli ikeye ngwange, “Shukulu Kalunga kakakutumbula lalo Pashehule, oloni akakutumbula ‘Kutewa cuma coshe-icoshe.’

⁴ Vavenya Shukulu Kalunga nendeka ngwendi, ‘Njikakupwisa muka-lyova, co lalo ukakala na lyova na vasamba vove, co voshe ukavamona vavatsiya vitozi vavo na mukwale. Njikana vanu voshe va mu Yunda mu livoko lya mwene wa ku Mbambilone, ikeye akavatwala mu vunzinda ku Mbambilone, co vamo akavatsiya.

⁵ Njikecela vitozi vavo vakapukule vufuko vwoshe vwa mu nganda eyi, nakwambata vufuko vwamwo na vivala, na vitulikilo vya vimyene va mu Yunda, co vakatwala vyuma vyoshe ku Mbambilone.

⁶ Ngecivene, Pashehule, yove na naanga yove yoshe vakamifungulula nakumitwala ku Mbambilone. Kuje kukekwo kuukatsila nakukutsinda amolika na vasamba vove vaje vaunaleka makuli.’ ”

Njelemiya alinyengela kuli Shukulu Kalunga

⁷ Shukulu Kalunga unanjikwisa, co nange vanjikwisile. Uli na nzili kunjituvakana yange, co unanjifungulula. Vanu voshe valinakunjishendumuna nakunjijola simbu yoshe.

⁸ Omo njendeka, co njitambeka ngwange, “Vukalu nakunyonga!” Shukulu Kalunga simbu yoshe valinakunjishendumuna nakunjijola, omo njambulula lijwi lyove.

⁹ Oloni nga njendeka ngwange, “Kunjikatumbula Shukulu Kalunga nambe kwendeka mu lizina lyendi.” Co mu mbunge mulinga ngwe munashwama tuhya tuje tuli mu vitsiya vyange, co njeseka kulikela, njikeseka kusimpa manene mu mbunge oloni kunjasa.

¹⁰ Njinazivi vanu vavangi vanjifweya ngwavo, “Kwoshe-ikwoshe kuli munjunju! Tumwambululeni ku vaka-kushwana!” Nameme vene vasamba vange va a mbunge vanavandamena ngeci njiwe. Vendeka ngwavo, “Amo twasa kumukwisa ngeci tumukwate tumulinge shambandinga.”

¹¹ Oloni yove Shukulu Kalunga, uli amo nange kupwa muka-nzili na muka-kujujwisa, voshe vaje vanjipakesa vakonwa. Vakaziva shwamwa ku myaka yoshe omwo kuvakahyana embwe.

¹² Oloni Shukulu Kalunga Muka-nzili yoshe, ukelula vanu mu vushunga, uzivuka vili mu vimbunge vyavo na mu viyongola vyavo. Ngecivene, njishaka kumona muulinga shambandinga na vitozi vange, omwo njinakuleke n̄anda yange.

¹³ Imbileni kuli Shukulu Kalunga! Shangazaleni Shukulu Kalunga! Omwo ikeye napatula vaka-kuyanda ku mavoko a vaka-vuvi.

¹⁴ Litangwa lije njasemukile lipwe lyakusinga! Litangwa lije livanjikitile vanana kesi livezike!

¹⁵ Apwe wakusinga munalume uje wanenele muzimbu wakujolela kuli tate ngwendi, “Mwana wa munalume nasemuka!”

¹⁶ Apwe ngwe vinganda vije vyanyongesele Shukulu Kalunga, kwonwa kuvizivilako mema ku mbunge. Azive mutambi wa kuuya-uya ku simbu ya mutondo na mutambi wa nzita ku simbu ya mutanya,

¹⁷ omwo ikeye kanjitsiile simbu kanda njisemuke. Ngwe mwimo lya vanana mwapwile mu mbumbo yange vene.

¹⁸ Omwo vikajo njasemukilile? Kuma kumona lika tuyando na vusiwa, ngeci kuyoya kwange kupwe lika kwa vusiwa ndi?