Njelemiya 2 - Livulu lya Shukulu Kalunga

Njambi anyunga Isalele

¹ Lijwi lya Shukulu Kalunga lyezile kuli yange ngwalyo,

² “Ya ku Yelusalema ukambulwile vanu voshe, ngwove Shukulu Kalunga nendeka ngwendi, ‘Njanuka kulongwa kwove omo wapwile u mwanike, na cizemo cove omo njakwambatele, na muje wanjikavele mu mambo, mukati ka lifuti lije kuvalimine.

³ Isalele, yove wapwile u wange, wapwile vufuko vwange vwakujela. Njatumine tuyando na n̄avava ali munu woshe uje wakuyandesele. Yange Kalunga, njinendekamo.’ ”

Vuvi vwa vakukulwila va Isalele

⁴ Tolilileni ku lijwi lya Shukulu Kalunga, yeni vatekulwila va Yakomba, yeni miyati ya Isalele.

⁵ Shukulu Kalunga alinakwendeka ngwendi, “Mulonga ukajo uvanjiwanene nawo vakukulwila veni ngeci vatunde kuli yange? Valemesele tumponya twakujeneka seo, co na vakevo lalo vapwile vanu vangoco.

⁶ Vakukulwila veni kuvanjumbile mbunge, nameme njavamenene kuvatundisa mu Ingito nakuvatwamenena mu mambo, mu lifuti lyakuma na lishen̄avu, lifuti lyakuma lya vushonde muje naumo wai wakelemo, nambe kwendamo.

⁷ Njaminenele mu lifuti lya vwilo, mukulya vushuka vwamwo na vyuma vyoshe vije vyavivwa. Oloni mwaviisile lifuti lyange nakujwalesa vushwana vuje vunjamyanene.

⁸ Vaka-kukombelela kuvehwile ngwavo, ‘Shukulu Kalunga ali kulijo?’ Vaka-kukombelela vange kuvanjizivukile. Vaka-kushwana vanjitengulukilile nakunjilwisa, vaka-kwimanena vendekele vya vuka-kwimanena mu lizina lya Mbale, co valemesele tumponya twakujeneka seo.

Kusompa kwa Shukulu Kalunga a vanu vendi

⁹ “Ngecivene, yange Kalunga, njikanena n̄anda yange mukusompa yeni vanu vange. Njikasompesa lalo vatekulwila veni.

¹⁰ Yeni mu kangombe ka yambi ku lin̄anda lya Sipulase, co tumeni munu umo mu ngangela ku lifuti lya Kendale, mukamone ngeci nacimo cai cakulifwa neci calingiwile ku san̄ulu.

¹¹ Kukwesi muyati watengulukilile vinjambi vavo nameme vapwile vinjambi va makuli. Oloni yeni munakengesa nima yange Njambi yeni uje naminenela kasingimiko, co munakava vinjambi vaje kuvasa kumilingila cuma cimo.

¹² Ngecivene, njishika lilu lijaje na lyova, valikomokele nakukasama,

¹³ omwo vanu vange vanalingi vuvi vuvali, vanatundu kuli yange, lisima lya kavwelu-vwelu lya mema akutonola, vanalicokwela masima a myanzi muje kumwasa kukendama mema.

Fweto a Isalele yakujeneka kulongwa

¹⁴ “Isalele kapwile ndungo, kuvamukitilile mu vundungo. Cooni omwo vikajo vitozi vendi valinakumuyomba?

¹⁵ Valinakumwanena ngwe vindumba, lifuti lyendi vanalipwisa mambo, co vinganda vyendi vinapu vyamupulungwa, naumo wai wakalamo.

¹⁶ Eyo, vanu va mu Mefise na Tahapanehese vanatavozola cikola cendi.

¹⁷ Isalele, yove vavenya walikokela vuvi! Wasezele yange Kalunga Njambi yove, omo njakutwamenenene mu ngila.

¹⁸ Vikajo ukawanao akuya ku Ingito mukunwa mema a mu Ndonga ya Nailo? Vikajo ukawanao akuya ku Asilya mukunwa mema a mu Ndonga ya Yufuleti?

¹⁹ Vuvi vwove vukakuhisa yove vavenya omwo unatundu kuli yange. Ngecivene, ukalilongesa vuvi na vunyengwe, akuseza yange Kalunga Njambi yove, kujeneka kunjisingimika. Yange Kalunga wa Akamwa ya Vyoshe, Muka-nzili yoshe, njinendekamo.”

Isalele avyana kulemesa Shukulu Kalunga

²⁰ Shukulu Kalunga wa Akamwa ya Vyoshe alinakwendeka ngwendi, “Isalele, ku san̄ulu yove wanjisezele nakupokola vikumiiyo vyoshe vije vyakele akati kove nange, wavyanene kunjononoka nakunjilemesa. Oloni a malundu oshe amalaja, na mu minzinze ya miti yoshe yakutonola, walemesele vinjambi vakujeneka seo.

²¹ Yange njakukunine kupwa mukolovozi wa vushuka vwa vinyu wauvwa, wa ku mbuto yaivwa manene. Cooni unatenguluka vatijo kupwa mukolovozi wakuvola wakujeneka seo?

²² Nameme wajwelesele njapau ya nzili manene, oloni anga njicimona mapwata-mapwata a milonga yove.

²³ Vatijo wendeka ngwove kuwalijwalesele nameme kulemesa Mbale? Oloni anuka muje muwalingile vuvi mu cana, kenga vije viwunalingi. Yove unalifu ngwe kamelo wa lwavo uje ali na lishungu, ashatukila noku-noku mu mambo omwo ya lishungu lyendi,

²⁴ kamelo wa cifwa eci iyajo asa kumupangula? Nkomba naumo wai ayanda akumushakezeka, omwo simbu yoshe yakulonda nkomba amuwana mukwasiwa.

²⁵ Isalele, kesi ujukise mendi ove, nambe mulivu wove kesi uminine na lihwila, kushatozoka noku-noku mukulemesa vinjambi veka. Oloni yove wendeka ngwove, ‘Embwe kunjasa kwiluka kunima. Njinashaka laja vinjambi veka, co njikavakavangeya.’ ”

Isalele napande kutambula cihiso

²⁶ Shukulu Kalunga alinakwendeka ngwendi, “Ngwe mwizi mwakashauka omo vanamukwata, ngecivene, yeni voshe vanu va Isalele, vimyene veni, na vakulunu veni, na vaka-kukombelela veni, na vaka-kwimanena veni vakamishawisa,

²⁷ voshe vaje vendeka ngwavo muti wapwa ishweni, co limanya lyapwa vanyoko. Eci cikalingiwa omwo munatundu kuli yange, kumwelukile kuli yange embwe. Oloni omo muli mu tuyando, co munjilomba ngeci njimikwase.

²⁸ “Vali kulijo vinjambi vaje mwalishongelele? Vanapande kumyamena, omo muli mu tuyando! Yunda, yove uli na vinjambi vavangi ngwe muuli na vinganda vyavingi.

²⁹ Vikajo ulinyenga? Omwo vikajo munanjitengulukila nakunjilwisa?

³⁰ Njaminyanyamesele, oloni kucamikwasele ngeci mwa ndumba wa vukalu, yeni mwatsiile vaka-kwimanena vange.

³¹ Vanu va Isalele, tolilileni vinjendeka. Kuma yange njamisezele mu mambo, nambe kumifwika na lisusulungu ndi? Omwo vikajo mwendeka ngweni mukalinga ngwe mucamivwasela, ngweni kumukelukila lalo kuli yange?

³² Kuma shombolwa asa kwivala vyakuzala vyendi vya senga, nambe cikoveyo cendi ca vushombolwa ndi? Oloni vanu vange vananjivala matangwa amangi manene.

³³ Mwa vushunga mwazivuka mwamuvwa kukavangeya cizemo. Nameme vanakazi vakavilinga vyavivi vasa kumitembunwina.

³⁴ Vuzalo vweni vuli na vipesa vya maninga kesi maninga a vezi vaka-kutuva vinjuvo embwe, oloni na maninga a tuutu na vanu vaka-kujeneka mulonga. “Oloni a vyoshe evi,

³⁵ mwendeka ngweni, ‘Kutwesi na mulonga, mwa vushunga Shukulu Kalunga, kaluvalele netu.’ Oloni yange Kalunga, njimihisa omwo munavyana ngweni kumwalingile vuvi.

³⁶ Omwo vikajo mulinakutengulwila vingila vyeni akukavangeya vinjambi va miyati yeka? Vaka-Ingito vakamizivisa shwamwa, ngwe muvamizivisile shwamwa vaka-Asilya.

³⁷ Mukatunda lalo mu Ingito na shwamwa. Yange Kalunga, njinavyana vaje vamwakulaela, nacimo cai mukawana kuli vakevo.”