Njelemiya 19 - Livulu lya Shukulu Kalunga

Njava yakutivika

¹ Shukulu Kalunga wanjilekele ngwendi, “Njelemiya, ya ukalande njava ya vuma kuli muka-kushonga. Co lalo ya amolika na vakulunu vamo, na vakulunu vamo vakama va vaka-kukombelela,

² Iteni mu Cikolo ca Potishende muye ku Cana ca Hinome, ya ukambulule majwi aje anjikakuleka.

³ Ya ukendeka ngwove Shukulu Kalunga nendeka ngwendi, ‘Tolilileni yeni vimyene va mu Yunda, na vanu va mu Yelusalema, tolilileni vinjendeka yange Kalunga Muka-nzili yoshe, Njambi ya Isalele. Njikanena tuyando twakama mu mutambela ou ngeci vanu voshe vakatuziva vakalikasamena.

⁴ Njikalinga eci omo vanu vananjiseza, vanajwalesa mutambela ou akukombelelamo vin̄ombelo ku vinjambi veka, vinjambi vaje nambe vakevo, nambe vakukulwila vavo, nambe vimyene va mu Yunda kuvavazivukile. Vanashulisa mutambela ou na maninga a vanu vakujeneka mulonga,

⁵ vanatungila Mbale mutula ngeci venyekeleo vana vavo kupwa vin̄ombelo vya kwenyeka. Kunjavashikile kulinga ngeci embwe, nameme kuciyongola mu mbunge yange.

⁶ Ngecivene, simbu ikaija omo mutambela uno kuvakautumbula lalo Tofete nambe Cana ca Hinome. Oloni vakautumbula Cana Cakutsiila.

⁷ Mu mutambela uje njikatanganesa matumbe oshe a vanu va mu Yunda na vanu va mu Yelusalema. Njikecela vitozi vavo kuvalyatangela nakuvatsiila mu nzita. Co njikana mivila yavo ku tuzila na ku tusitu kupwa vyakulya vyavo.

⁸ Co njikaviisa manene Yelusalema ngeci vanu voshe vakaitako vakalikasamena nakuziva lyova.

⁹ Vitozi vakazengeleka nganda kweseka kutsiya vanu vamwo. Co kuzengeleka kuje kukapwa kwakukomokesa ngeci vanu va mukati ka nganda, munu akalya munu mukwavo, nameme vana vavo vavenya.’ ”

¹⁰ Asinoni Shukulu Kalunga wanjilekele kutsiila njava kulutwe lwa vanalume vaje vezile amo nange,

¹¹ nakuvaleka ngwange Shukulu Kalunga Muka-nzili yoshe nendeka ngwendi, “Njikatsiya vanu ava na nganda eyi, ngwe munu atsiya njava ya vuma ije kuvasa kuyimunga-munga lalo. Vanu vakatsinda vivimbi vyavo mu Tofete, omwo kukwesi kweka lalo kwakuvatsindila.

¹² Mukemwo munjikalinga na nganda eyi na vanu vamwo ngwe munjalingile na Tofete.

¹³ Vinjuvo vya mu Yelusalema na vinjuvo vya vimyene va mu Yunda, na a viluli vya vinjuvo vyoshe aje vakele nakwenyekela insense ku vingongonosi, na kuje vakele nakwitilila vinyu kupwa mulambu ku vinjambi veka, vyoshe vikapwa vya mazilo ngwe ku Tofete.”

¹⁴ Asinoni njatundile ku Tofete, kuje kwanjitumine Shukulu Kalunga nakwambulula majwi endi, njaile nakwimana mu cipango ca Njuvo ya Shukulu Kalunga nakuleka vanu voshe ngwange,

¹⁵ Shukulu Kalunga Muka-nzili yoshe, Njambi ya Isalele, nendeka ngwendi, “Njikanena vihiso vyoshe a nganda eyi na vindandanga vya kulyata nayo, vihiso vije njendekele ngwange njikavilinga, omwo munakaluwisa vimbunge vyeni, co kumutolilila ku vije njendeka.”