Njelemiya 18 - Livulu lya Shukulu Kalunga

Njelemiya ali ku njuvo ya muka-kushonga vindeo

¹ Shukulu Kalunga wendekele kuli yange ngwendi,

² “Ya ku njuvo ya muka-kushonga vindeo kuje njikakuleka lijwi lyange.”

³ Ngecivene, njaileko, njamwene muka-kushonga vindeo alinakupangela a nkwakwa yendi.

⁴ Omo ndeo ije yashonga iviya, co aishonga lalo mweka muje munai viyongola vyendi.

⁵ Asinoni Shukulu Kalunga wendekele kuli yange ngwendi,

⁶ “Kuma kunjasa kulinga kuli vanu va mu Isalele vije vyanalingi muka-kushonga vindeo ndi? Yeni muli mu mavoko ange, ngwe vuma vuli mu mavoko a muka-kushonga.

⁷ Nga a simbu yoshe-iyoshe njendeka ngwange njikatukula nakupokola, nambe kunyongesa muyati wa vanu, nambe vumwene,

⁸ oloni nga uje muyati wa vanu vatenguluka ku vuvi vwavo, co njikatengulula viyongola vyange, kunjikalingi vije vinjayongwele kulinga.

⁹ Co nga a simbu ikwavo lalo njendeka ngwange njikuna nambe kutunga muyati umo wa vanu, nambe vumwene,

¹⁰ oloni muyati uje kuvanjononoka, oloni valinga vuvi, co kunjikalingi vyuma vije vyavivwa vinjayongwele kulinga.

¹¹ Ngecivene, ololo, leka vanu va mu Yunda na vanu va mu Yelusalema ngwove njilinakutumba matumbe akuvalwisa, nakuvahisa. Valeke ngeci valikele kuyoya mu vuvi, vatenguluke ku vingila vyavo na ku vyuma vivalinakulinga.

¹² Vakakukumbulula ngwavo, ‘Embwe, omwo vikajo tutenguluka? Yetu voshe tukakaluwisa vimbunge vyetu, nakulinga vuvi ngwe mutushakela kulinga!’ ”

Vanu vavyana Shukulu Kalunga

¹³ Shukulu Kalunga alinakwendeka ngwendi, “Ihula miyati yoshe ya vanu nga cuma eci calingiwileo ku san̄ulu. Vanu va Isalele vanalingi cuma cakukomokesa!

¹⁴ Kuma mema akukonda a akamwa ya minkinda ya Lembanone akasangunuka ndi? Kuma mema a a minkinda akutonola ali mu ndonga akauma ndi?

¹⁵ Oloni vanu vange vananjivala, venyekela insense ku tumponya. Vanatundu mu ngila muje muvanapandele kuya, kuvesi nakukavangeya vingila vyalaja, oloni valinakwenda mu vingila vyakupunda.

¹⁶ Lifuti lyavo vanalipwisa lyakukomokesa, likapwa lyakushauka ku myaka yoshe. Voshe vaje vaketilamo vakalisimoka a vije vakamonamo, vakaningangesa mitwe yavo nakulikomokela.

¹⁷ Njikashandwela vanu vange kulutwe lwa vitozi vavo, ngwe lihunzi lya mu ngangela. Njikavakengesa nima, kunjikavakwasa omo tuyando twakama twija ali vakevo.”

Vutumbe vwakulwisa Njelemiya

¹⁸ Co vanu vendekele ngwavo, “Tutumbeni vutumbe ali Njelemiya! Simbu yoshe tuli na vaka-kukombelela vaje vakatulongesa, na vaka-mana vaje vakatunangula, na vaka-kwimanena vaje vakambulula majwi a Njambi. Tumukutiiyeni vin̄anda vyakumulwisa, co tulikeleni kutolilila ku vije vyendeka.”

¹⁹ Ngecivene, njalombelele ngwange, “Shukulu Kalunga tolilila ku evi njilinakwendeka, tolilila lalo ku evi vivalinakwendeka vitozi vange ali yange.

²⁰ Kuma mwamuvwa kwilwisila vuvi ku vuvwa ndi? Oloni vananjindila mbulu ngeci njiwilemo. Anuka muje munjemanene ku mesho ove nakuvemanena ngeci kesi uvanyanyamese.

²¹ Oloni ololo Shukulu Kalunga tava vana vavo valanduke ku njala. Vecele vakavatsiile mu nzita. Vanakazi vajeneke vanalume vavo na vana vavo, vanalume vatse ku mushongo, co vakwenje vatsile mu nzita.

²² Tuma mbunga ya vanu vakupukule vinjuvo vyavo kwa kuvanangula, valile na lyova. Vananjindila mbulu ngeci njiwilemo, co vananjitela myeto ngeci njitsemo.

²³ Oloni Shukulu Kalunga, yove wazivuka matumbe avo oshe akunjitsiya. Kesi uvasambese a vuvi vwavo nakuvecela ku milonga yavo. Vawisile asi uvafungulule, vanyanyamese mu simbu ya vukalu vwove.”