Njelemiya 17 - Livulu lya Shukulu Kalunga

Vuvi na cihiso ca Yunda

¹ Shukulu Kalunga alinakwendeka ngwendi, “Vanu va mu Yunda vuvi vweni vanavusoneka na mufwitilo wa cikuvo, vanavusoneka mu vimbunge vyeni na shongo ya ndaimani, co vavucakeya a vimbango vya mitula yeni.

² Vana veni vakalemesa ku mitula, na ku vifwa vije vivashimbikilile Ashela njambi wa munakazi mwisi ya minzinze ya miti yoshe yakutonola na akamwa ya malundu,

³ na a minkinda mushandangala yangoco. Vitozi veni vakambata vivala vyeni na vufuko vweni omwo a vuvi vweni vwoshe vuje munalingi mu lifuti lyeni mwoshe.

⁴ Mukaseza lifuti eli linjamyanene, co njikamyecelela ngeci mukapangele vitozi veni mu lifuti lije kumuzivuka, omwo vukalu vwange vwapwa ngwe tuhya, co vukashwama ku myaka yoshe.”

Kukulaela kuli Shukulu Kalunga

⁵ Shukulu Kalunga alinakwendeka ngwendi, “Njikasinga munu uje atunda kuli yange nakukulaela kuli munu wangoco, nakutundisa mbunge yendi kuli Shukulu Kalunga.

⁶ Nalifu ngwe liputa lya mu mambo lije lilinakukula mu mambo mwakuma, mu livu lya mwongwa muje kumwesi kumena cuma ceka. Nacimo cacivwa cai cikalingiwa kuli ikeye.

⁷ “Oloni njikavezikisa munu uje akulaela muli yange.

⁸ Munu wa cifwa eci nafu ngwe muti ulinakukula ku ngenge ya kana ka ndonga, co mizi yawo ishalavela ku mema. Kuwesi kuziva ntwima a simbu ya nyangao omwo maputa awo apwa akutonola nakuzivuluka simbu yoshe, kuwesi kujujwama a simbu ya lilanga ukemi vushuka simbu yoshe.

⁹ “Mbunge ya munu yapwa ya makuli kutuvakana vyuma vyoshe, yapwa yaivi manene, iyajo aizivuka?

¹⁰ Yange Kalunga, nji muka-kweseka viyongola nakwilula vimbunge vya vanu, mukwana ku munu na munu kupwisa mu ngila yendi yakuyoyelamo, nakupwisa ku vipangi vya vilinga vyendi.”

¹¹ Uje awana vufuko mu ngila yaivi, nalifu ngwe kazila atetula mavunda kesi endi. A simbu ya mutanya ya matangwa akuyoya kwendi akavuzimbalesa, co ku mamaneselelo akapwa cilema.

¹² Njuvo yetu ya Shukulu Kalunga inapu litanda lya vumpau, yemana a munkinda waulaja kutunda ku san̄ulu.

¹³ Shukulu Kalunga, yove wapwa cinyangavili ca Isalele, voshe vaje vakuseza vakaziva shwamwa. Voshe vaje vakuseza vakaya ku vukalo vwa vatsi, omwo vanaseza yove Shukulu Kalunga lisima lya kavwelu-vwelu lya mema a mwonyo.

Njelemiya alomba Shukulu Kalunga kumukwasa

¹⁴ Shukulu Kalunga njikangwise, co njikapwa mukangule, njamene, co njikovoka, omwo njikakushangazala!

¹⁵ Vanu valinakwendeka ngwavo, “Vilikulijo vije vyakele nakulishungwiya Shukulu Kalunga ali yetu? Avilinge oni ololo!”

¹⁶ Oloni Shukulu Kalunga, yange ni kunjalikelele kupwa kanyungi kove, co kunjayongwele litangwa lya tuyando. Shukulu Kalunga, wazivuka vije njendekele.

¹⁷ Kesi unjijujwise, yove wapwa cishwamo cange a simbu ya tuyando.

¹⁸ Vayesa vaje vanjiyandesa, oloni kesi unjizivise shwamwa, vajujwise, oloni Shukulu Kalunga, yange kesi unjijujwise. Nena tuyando ali vakevo nakuvanyongesa.

Kunyunga Litangwa Lyakuhwima

¹⁹ Shukulu Kalunga wendekele kuli yange ngwendi, “Njelemiya, ya ukambulule lijwi lyange ku cikolo ca vanu, kuje kuvakakovelela mu nganda vimyene va mu Yunda, na kuje kuvakatuukila mu nganda, asinoni ukaya ku vikolo vyoshe vikwavo vya mu Yelusalema.

²⁰ Leka vimyene na vanu voshe va mu Yunda, na munu woshe uje wakala mu Yelusalema, uje akovelela ku vikolo evi, vatolilile ku evi njendeka,

²¹ Valeke ngwove nga vazema myonyo yavo kuvapandele kwambata citele cimo a Litangwa Lyakuhwima, kuvapandele kwitisa cuma cimo mu vikolo vya Yelusalema,

²² nambe kutuula cuma cimo mu vinjuvo vyavo a Litangwa Lyakuhwima. Kuvapandele kupanga a Litangwa Lyakuhwima, vanapande kulinyunga kupwa litangwa lyakujela, ngwe munjashikile vakukulwila vavo.

²³ Oloni vakukulwila vavo kuvanjitolililile, nambe kumbako mbunge. Oloni vapwile vaka-kukaluwisa vimbunge, kuvanjononokele nambe kulilongesa kuli yange.

²⁴ “Leka vanu ava ngeci vanapande kwononoka mashiko ange oshe. Kuvapandele kwambata citele cimo nakuciitisila mu vikolo vya nganda a Litangwa Lyakuhwima. Vanapande kunyunga Litangwa Lyakuhwima kupwa litangwa lyakujela, co kuvapandele kupanga cipangi cimo.

²⁵ Nga mwononoka, co vimyene na vana va vimyene va vanalume, va ku naanga ya Ndaviti vakakovela mu vikolo vya Yelusalema, vakashwana, vakalonda a matemba na a tuvalu, co vanu va mu Yunda na vanu va mu Yelusalema vakakala amo navo, nganda ya Yelusalema ikakala na vanu simbu yoshe.

²⁶ Vanu vakaija kutunda mu vinganda vya mu Yunda na mu membo azengeleka Yelusalema, vakatunda ku lifuti lya Mbenjemani, vakatunda ku vushelumukilo vwa malundu, na ku minkinda, na mu mbwela ya Yunda. Vakanena ku Njuvo yange vin̄ombelo vya kwenyeka na vin̄ombelo na vin̄ombelo vya vimbuto vya vinona na insense na vin̄ombelo vya cikandelela.

²⁷ Oloni nga kuvanjononoka nakunyunga Litangwa Lyakuhwima kupwa litangwa lyakujela, kwitisa citele cimo mu vikolo vya Yelusalema a Litangwa Lyakuhwima, nga valingamo, co njikashwameka tuhya ku vikolo vya Yelusalema. Tuhya tukenyeka mapela a mu Yelusalema, co naumo wai akatuzima.”