Njelemiya 16 - Livulu lya Shukulu Kalunga

Cizango ca Shukulu Kalunga a mwonyo wa Njelemiya

¹ Asinoni Shukulu Kalunga wendekele kuli yange ngwendi,

² “Kesi wambate nambe kukala na vana mu mutambela ou.

³ Njikuleka vije vikalingiwa ku vana vaje vasemukila muno na kuli visemi vavo.

⁴ Vakatsa ku mushongo wakukomokesa, co naumo wai akavalila nambe kuvatsinda. Mivila yavo ikalala asi ngwe mitumbo ya vwilo. Vakavatsiila mu nzita nakulanduka ku njala ya lyangengela, co mivila yavo ikapwa vyakulya vya tuzila na tusitu.

⁵ “Kuwapandele kukovela mu njuvo muje valinakulila. Kesi ukazivile vusiwa a munu umo. Omwo njinatundisa kwoloka kuli vanu ava, na cizemo, na mema ku mbunge.

⁶ Vaka-kufuka na tuutu vakatsila mu lifuti eli, oloni naumo wai akavatsinda nambe kuvalila. Naumo wai akalitavozola ikeye vavenya nambe kuteula vin̄ambu vyendi mukumwesa vusiwa.

⁷ Naumo wai akalya nambe kunwa amo na munu umo mukumuzembeleka a vusiwa vwa ishe nambe vaina. Naumo wai akamwesa ngozi, nameme kuli uje natsisa ishe nambe vaina.

⁸ “Kesi ukovele mu njuvo muje muli ciwano. Kesi utumbame navo mukulya nakunwa.

⁹ Tolilila ku evi njendeka yange Kalunga Muka-nzili yoshe Njambi ya Isalele. Njikolwesa muyoyo wakujolela nakuvwaelela, na muyoyo wakuvwaelela mu viwano vya vulo. Vanu valimuno vakayoya mukumona evi vilingiwa.

¹⁰ “Omo ukavaleka vyoshe evi vakakwihula ngwavo, ‘Omwo vikajo Shukulu Kalunga nayongola kutunyanyamesa? Vuvi mukajo tunalingi, nambe vikajo tunalingi ku mesho a Shukulu Kalunga Njambi yetu?’

¹¹ Asinoni ukavaleka ngwove Shukulu Kalunga nendeka ngwendi, ‘Omwo vakukulwila veni vanjikengesele nima, valemesele nakupangela vinjambi veka. Vanjisezele kuvononokele vilongesa vyange.

¹² Oloni yeni mwalingi mwamuvi manene kutuvakana vakukulwila veni. Muvavoshe munapu vaka-kukaluwisa vimbunge vyeni na vuvi, co kumwesi kunjononoka.

¹³ Ngecivene, njikamyumbila anja ya lifuti eli, njikamitwala mu lifuti lije yeni nambe vakukulwila veni kumwalizivukile. Kuje mukapangela vinjambi veka mutanya na vutsiki, co kunjikamizivila mema ku mbunge!’ ”

Veluka ku vunzinda

¹⁴ Shukulu Kalunga alinakwendeka ngwendi, “Simbu ilinakwija omo vanu kuvakalisingi nakwendeka ngwavo njapwa Njambi wakuyoya, uje watundisile vanu va Isalele mu lifuti lya Ingito.

¹⁵ Oloni vakalisinga nakwendeka ngwavo njapwa Njambi wakuyoya, uje watundisile vanu va Isalele ku lifuti lya ku kunto na ku mafuti oshe aje njavashandwelele, co njikavelwisila mu lifuti lyavo, lifuti lije linjanene kuli vakukulwila vavo. Yange Kalunga, njinendekamo.”

Cihiso cije cikaija

¹⁶ Shukulu Kalunga alinakwendeka ngwendi, “Njikatuma vaka-kuta visi vavangi kwija nakukwata vanu ava. Asina lalo njikatuma viyambi vavangi mukuyomba vanu ava mu minkinda na a malundu, na mu manzenzengoma, na mukati ka mamanya.

¹⁷ Njamono vyoshe vivalinakulinga. Cuma nacimo cai cakuvanda kuli yange, vuvi vwavo kuvwavandele ku mesho ange.

¹⁸ Akulivanga njikavayandesa luvali omwo vuvi vwavo nakuvulumuna kwavo, omwo vanajwalesa lifuti lyange na tumponya tuje kutwesi na mwonyo, co vanashulisa lifuti na vinjambi vavo va makuli.”

Lilombelo lya Njelemiya lyakumusimpisa muli Shukulu Kalunga

¹⁹ Yove Shukulu Kalunga, u muka-kunjinyunga nakunjana nzili, u muka-kunjikwasa a visimbu vya tuyando. Miyati vakaija kuli yove kutunda ku shongo ya kaye nakwendeka ngwavo, “Vakukulwila vetu vakele lika na vinjambi va makuli, tumponya twakujeneka seo.

²⁰ Kuma munu asa kulishongela vinjambi vendi ndi? Embwe, nga alingamo, co mwa vushunga kuvapu vinjambi vavavwa embwe.”

²¹ Ngecivene, Shukulu Kalunga alinakwendeka ngwendi, “Miyati ya vanu vakazivuka a simbu imolika aje alenga nzili yange, co vakazivuka ngeci yange njapwa Kalunga.”