Njelemiya 15 - Livulu lya Shukulu Kalunga

Luvinda lwa vanu va mu Yunda

¹ Asinoni Shukulu Kalunga wanjilekele ngwendi, “Nameme nga Mosesa na Samwele vali kuno mukulombela amo nove, nga kunjikazivila vanu ava mema ku mbunge. Vasheke, vatunde ku mesho ange.

² Nga vakwihula ngwavo kulijo kuvanapande kuya, valeke ngwove yange Kalunga njinendeka ngwange, ‘Vaje vanapande kutsa ku mushongo, vatse vene ku mushongo! Vaje vanapande kutsa ku nzita, vanapande vene kutsa ku nzita! Vaje vanapande kulanduka ku njala ya lyangengela, vanapande vene kulanduka ku njala ya lyangengela! Vaje vanapande kuvatwala mu vunzinda, vanapande vene kuvatwala mu vunzinda!’ ”

³ Yange Kalunga, njikavahisa na vyuma viwana vyakukomokesa vije vikalingiwa ali vakevo, vakavatsiila mu nzita, co mivila yavo vakaikokangeya tutali, na tuzila vakailya, na vikashama va mu shwata vakambulukuta vitsiya vyavo.

⁴ Mukapwa vunyengwe ku vanu voshe va a kaye, omwo a vyuma vyavivi manene vije vyalingile Manase muna Hezekiya mu Yelusalema, omwo wapwile mwene wa mu Yunda.

⁵ Shukulu Kalunga alinakwendeka ngwendi, “Yeni vanu va mu Yelusalema, iyajo akamizivilako ngozi? Iyajo akamizivilako vusiwa? Iyajo akalipesa kumihula vati mumunendukila?

⁶ Yeni vanu vange munanjivyana nakunjiseza, munanjikengesa nima. Njinajuka kumizivila mema ku mbunge, cooni njikaminyongesa.

⁷ Njikamishandola kutunda mu vinganda vyoshe vya mu lifuti ngwe lihunzi lipekumuna vishati. Njikaminyongesa yeni vanu vange, njatsiile vana veni, omwo kumwatundile ku vingila vyeni vya vuvi.

⁸ Vifwile mu Yunda vakapwa vavangi manene kutuvakana lishen̄avu lya ku mema a kalunga. Vakanyonga a simbu ya mutanya, co visemi va vanakazi vakalilila vana vavo, vwasi-vwasi tuyando na lyova vikaija ali vakevo.

⁹ Cisemi wa munakazi akalezumuka, ceke ca mutanya cinapu lisusulungu, akumona vana vendi vatanu na vavali vanatsi. Njikatsiya munu woshe uje akasalao, Yange Kalunga, njinendekamo.”

Njelemiya alinyengela kuli Shukulu Kalunga

¹⁰ Nga kunjasemukile! Simbu yoshe njili mu vitanga na vanu voshe va muno mu Yunda. Kunjesi kukumuna vimbongo nambe vanjikumwise vimbongo embwe, oloni munu woshe alinakunjisinga.

¹¹ Shukulu Kalunga, visingo vyavo vyoshe vilingiwe, nga yange kunjakupangelele mwamuvwa, nga kunjalombelele kuli yove a vitozi vange omo vakele mu tuyando.

¹² Naumo wai asa kupokola cikuvo, vunene cikuvo cakukumbasana na vunengu. Naumo wai asa kufungulula vitozi vaje vakezilila ku kunto.

¹³ Shukulu Kalunga wendekele kuli yange ngwendi, “Njikatuma vitozi mukwambata vivala na vufuko vwa vanu vange, mukuvanyanyamesa a vuvi vuje vuvanalingi mu lifuti mwoshe.

¹⁴ Njikavapwisa vaka-kupangela vitozi vavo, mu lifuti lije kuvazivuka, omwo vukalu vwange vunapu ngwe tuhya, co vukashukuma ku myaka yoshe.”

¹⁵ Asinoni njendekele ngwange, “Yove Shukulu Kalunga wazivuka. Njanuke nakunjikwasa. Njilingile shambandinga vaje valinakunjipakesa. Kesi utetele vitozi vange simbu kanda vanjitsiye, vyoshe evi vilinakwija ali yange omwo ali yove.

¹⁶ Omwo wendekele kuli yange, njatolililile majwi oshe nakuwononoka, omwo njapwa nji wove, yove Shukulu Kalunga Njambi Muka-nzili yoshe.

¹⁷ Kunjatumbamene amo na vanu veka, nambe kujola navo, nakuvwaelela amo navo embwe. Mukwononoka mashiko ove, njakele ange lika, vukalu vwove vwanjilemenenene manene.

¹⁸ Omwo vikajo njilinakuyanda simbu yoshe? Omwo vikajo vimbandu vyange kuvyesi nakwola? Omwo vikajo kuvyesi nakukanguka? Kuma ushaka kunjiyeluwisa ngwe ndonga yuma a simbu ya nyangao ndi?”

¹⁹ Ngecivene, Shukulu Kalunga wakumbulwile ngwendi, “Nga utenguluka, co njikakutambula, ngeci unjipangele lalo. Nga wambulula vya seo, kesi kwambulula vyuma vyangoco, co ukapwa muka-kwimanena wange lalo. Vanu va mu Yunda vakatolilila vije ukendeka, kesi ukombe mbunge kukujujwisa kwavo.

²⁰ Njikakupwisa ngwe cimpaka cakukola manene ca vunengu kuli vanu ava. Vakevo vakakulwisa, oloni kuvakakufungulula embwe. Yange njikakala amo nove nakukunyunga mwamuvwa.

²¹ Njikakwamena ku nzili ya vaka-vuvi na kuli vanu vavavi. Yange Kalunga, njinendekamo.”