Njelemiya 14 - Livulu lya Shukulu Kalunga

Lilanga lyakama

¹ Shukulu Kalunga wendekele kuli Njelemiya a lilanga ngwendi,

² “Yunda alinakulila omwo vikolo vyamwo vinazeye, vanu vamwo vanatumbama asi valinakulila, co Yelusalema ilinakulila manene.

³ Vaka-kufuka vatuma vangamba vavo mukutekula mema, vaya ku masima, oloni vawana mema ai, co vakeluka na vinjava vyavo vyamupulungwa. Vafwika ku mesho avo omwo shwamwa na lyova.

⁴ Livu lyatavozoka myanzi, omwo kuli lilanga lyakama mu lifuti, vandimi vali na vusiwa mu vimbunge vyavo, co vafwika ku mesho avo.

⁵ Nameme shonge wa lwavo asema munendi, co amuseza nakushakezeka mwila.

⁶ Vingolo vanemana akamwa ya malundu vaekela ngwe vimbanje, mesho avo anatsitsivala omwo mwila wai.

⁷ Vanu vange vanjililila ngwavo, ‘Nameme vuvi vwetu vutuhisa, oloni Shukulu Kalunga tukwase ngwe omo watukulaesele. Tunakukengesa nima visimbu vyavingi, tunalingi vuvi ku mesho ove.

⁸ Yove cinyangavili ca Isalele, yove muyoyesi wa Isalele a simbu ya tuyando. Omwo vikajo upwa ngwe mungenzi mu lifuti lyetu, nambe ngwe muka-kwendangana uje alala vutsiki vumolika?

⁹ Omwo vikajo unapu ngwe munu ivanakasumuna, nambe ngwe lishwalale najeneka nzili mukulyamena? Mwa vushunga Shukulu Kalunga yove uli netu! Yetu tu vanu vove kesi utuseze embwe.’ ”

¹⁰ Shukulu Kalunga alinakwendeka ali vanu ava ngwendi, “Vanu ava vazema kulumbazala ngoco kuvasa kulinyunga vakevo vavenya embwe. Ngecivene, kunjesi nakuvwaelela navo. Njikanuka vuvi vwavo, vuje vuvanalingi, co njikavanyanyamesa omwo vuvi vwavo.”

¹¹ Shukulu Kalunga wendekele kuli yange ngwendi, “Njelemiya, kesi ulombelele vanu ava ngeci vavezike embwe.

¹² Nameme nga vazila kulya, oloni kunjikatolilila ku mutambi wavo wakuvakwasa, nameme nga vakombelela vin̄ombelo vya kwenyeka, na vin̄ombelo vya vimbuto vya vinona, kunjikavitambula embwe. Oloni njikavanyongesa na moko ya mukwale, na njala ya lyangengela, na mushongo wakulitambwisa.”

¹³ Asinoni njendekele ngwange, “Shukulu Kalunga wa Akamwa ya Vyoshe, wazivuka ngeci vaka-kwimanena valinakuleka vanu ngwavo yove wakulaesele ngwove kukukakala nzita, nambe njala ya lyangengela, kukakala lika kwoloka mu lifuti lyetu.”

¹⁴ Oloni Shukulu Kalunga wakumbulwile ngwendi, “Vaka-kwimanena valinakwendeka makuli mu lizina lyange, kunjavatumine embwe, nameme kuvana mashiko amo, nambe kwendeka lijwi limo kuli vakevo lyai. Vimona vije valinakwambulula kuvyesi nakutunda kuli yange, oloni vinapu vimona vyavo vyangoco, na manseno avo vavenya na viyongola vyavo vavenya.

¹⁵ Yange Kalunga njikuleka vije vinjikalinga kuli vaka-kwimanena vaje kunjatumine, vakevo valinakwendeka mu lizina lyange, vendeka ngwavo nzita na njala ya lyangengela kuvikakalamo mu lifuti lyavo, oloni njikavatsiila mu nzita nakuvalandwisa ku njala.

¹⁶ Vanu vaje vavanakala nakuleka vyuma evi, navo lalo njikavatsiya mu cifwa cimolika. Mivila yavo vakayumbila mu vitapalo vya Yelusalema, naumo wai akavatsinda nameme vanakazi vavo, nambe vana vavo va vanalume, nambe vana vavo va vanakazi. Omwo njikavelwisila vuvi vwavo.”

¹⁷ Shukulu Kalunga wanjishikile ngeci njileke vanu ngwange Shukulu Kalunga nendeka ngwendi, “Mesho ange alinakuyengela misozi mutanya na vutsiki, kunjilikele kulila, omwo vanu vange vanavetwa manene, co vanavulumuka mwamuvi.

¹⁸ Omo njiya mu mahya njimona mivila ya vaje vatsililile mu nzita, omo njikovela mu membo, co njimona vanu valinakulanduka ku njala. Oloni vaka-kwimanena na vaka-kukombelela valinakupanga vipangi vyavo, kuvazivuka vije vilinakulingiwa.”

Vanu valiita kuli Shukulu Kalunga

¹⁹ Shukulu Kalunga, kuma unavyana vene Yunda ndi? Kuma wazinda vanu va ku Siyone ndi? Omwo vikajo watuvulumwina mwamuvi ngacije ngeci kutwesi nakukanguka? Twakengelelele kwoloka, oloni nacimo cacivwa calingiwile cai, cinyangavili cetu capwile cakwinduka, oloni kwezile lika tuyando.

²⁰ Shukulu Kalunga, tunalingi vuvi ku mesho ove, tulitavela vuvi vwetu, na vuvi vwa vakukulwila vetu.

²¹ Anuka vikulaeso vyove, co kesi utuyeluwise, kesi uzivise shwamwa Yelusalema mwela uje wa litanda lyove lya vumpau. Kesi upokole cikumiiyo cije walikumiiye netu.

²² Kukwesi tumponya twa vaka-mafuti vasa kunyokesa nyonzi, lilu alyo lika kulyasa kunyokesa nyonzi ya vusuku-mbundu. Yetu tunaka cinyangavili cetu muli yove Shukulu Kalunga Njambi yetu, omwo yove lika muka-kulinga vyuma vyoshe evi.