Njelemiya 13 - Livulu lya Shukulu Kalunga

Mwiva wa linyu

¹ Shukulu Kalunga wendekele kuli yange ngwendi, “Ya ukalande mwiva wa linyu uukute mu mbunda yove, oloni kesi uumbwateke mu mema.”

² Ngecivene, njalandele uje mwiva, njaukutile mu mbunda yange ngwe mwanjishikile Shukulu Kalunga.

³ Asinoni Shukulu Kalunga wendekele kuli yange lalo ngwendi,

⁴ “Ya ku Ndonga ya Yufuleti ukashweke mwiva mu mwanzi wa mamanya.”

⁵ Ngecivene, njaile nakuushweka kuyehi na Ndonga ya Yufuleti ngwe mwanjishikile Shukulu Kalunga.

⁶ Omo kwetile matangwa amangi, Shukulu Kalunga wanjilekele kuya ku Ndonga ya Yufuleti nakushaka uje mwiva.

⁷ Ngecivene, njaile, co omo njetele ku mutambela uje kunjashwekele uje mwiva, njauwanene unaliwa.

⁸ Asinoni Shukulu Kalunga wendekele kuli yange ngwendi,

⁹ “Omu mukemwo munjikamanesela kulyalesa kwa vanu va mu Yunda na kulyalesa manene kwa vanu va mu Yelusalema.

¹⁰ Vanu ava vanapu vavavi omwo vanavyana kwononoka majwi ange. Vakevo vanakaluwisa vimbunge vyavo manene kutuvakana akulivanga, vanalemesa nakupangela vinjambi veka. Ngecivene, vakafwa ngwe ou mwiva wakuliwa.

¹¹ Ngwe mwiva muukakakateya mu mbunda ya munu, mukemwo vene vanu va mu Isalele voshe, na vanu va mu Yunda voshe vakakateyeye kuli yange. Njalingile vyuma evi ngeci vapwe vanu vange, co vakalemese nakusingimika lizina lyange, oloni kuvanjononokele.”

Cisimo ca njava ya vinyu

¹² Shukulu Kalunga Njambi wendekele kuli yange ngwendi, “Njelemiya, leka vanu va Isalele vaake vinyu mu vinjava vyavo nakuvishulisa. Nga vakukumbulula ngwavo tuzivuka ngwetu vinjava vya vinyu vyoshe vikashulu vene na vinyu ngwe mutuzivuka nalaja.

¹³ Asinoni valeke ngwove, ‘Yange Kalunga, njikashulisila vinyu vanu va mu lifuti lino noo vakapenda, vimyene vatekulwila va Ndaviti, na vaka-kukombelela, na vaka-kwimanena, na vanu voshe va mu Yelusalema.

¹⁴ Asinoni njikavalingisa ngeci valitsene umo na mukwavo ngwe vinjava, kunjikakala na mema ku mbunge kuli mukulunu nambe mukwenje, co voshe vakanyonga.’ ”

Njelemiya avanangula a kulyalesa

¹⁵ Eni vanu va mu Yunda, tolilileni mwanendeka Shukulu Kalunga! Kesi mulyalese, oloni pweni vaka-kulikeesa.

¹⁶ Singimikeni Shukulu Kalunga Njambi yeni simbu kanda anene lisusulungu mutanuke a minkinda, simbu kanda apwise ceke ngwe lisusulungu.

¹⁷ Oloni nga kumutolilila, co njikalilila kwalikalyange omwo kulyalesa kweni, njikalila manene, co misozi yange ikolomoka omo vanu va Shukulu Kalunga vavatwala ku vunzinda.

¹⁸ Shukulu Kalunga wendekele kuli yange ngwendi, “Leka mwene na vaina vatunde a matanda avo, omwo vilongo vyavo vyavivwa vinau ku mitwe yavo.

¹⁹ Vinganda vya mu mbwela ya Yunda vanavizengeleka ku vitozi, naumo wai asa kukovelamo nambe kutuukamo. Vanu voshe va mu Yunda vanavatwala mu vunzinda.”

²⁰ Vaka-Yelusalema, kengeni! Vitozi veni valinakwija kutunda ku kunto! Vali kulijo vanu vaje vavamikundikile kuvanyunga, vanu vaje mwakele nakulyaleselao?

²¹ Vatijo mukendeka omo vanu vaje vapwile vasamba veni vakamifungulula nakumishwana? Mukakemanga ngwe munakazi ashaka kukita.

²² Nga mukehula ngweni omwo vikajo vyoshe evi vinalingiwa kuli yeni, omwo vikajo vuzalo vweni vwatavozokela nakumilinga vuvi mu ngila kesi ikeyo? Vamilingile vyuma vyoshe evi omwo vuvi vweni vwakukomokesa manene.

²³ Munu asa kutengulula cikonde cendi, nambe ingwe kutengulula mavala endi ndi? Nga ngoconi, amo mwasa kutenguluka, nakulilongesa kulinga vyuma vyavivwa.

²⁴ Shukulu Kalunga akamishandola, ngwe lihunzi lya mu mambo lipekumuna vishati.

²⁵ Shukulu Kalunga nendeka ngwendi ou ukewo mutambela wove unjinakwana, omwo unanjivala, co unakulaela vinjambi va makuli.

²⁶ Shukulu Kalunga ikeye vavenya akamishulula vuzalo vweni ngeci mukazive shwamwa.

²⁷ Ikeye namimono mumuli nakulinga vije vyazinda. Ikeye namimono omo mulinakukavangeya vinjambi va makuli na nakulinga vupangala a malundu na mu mahya, ngwe munalume ashungwiya munakazi wa musamba wendi, nambe ngwe kavalu wa nkomba alinakweveyeya kavalu wa lwavo. Yeni vanu va mu Yelusalema, munavindama! Simbu mukajo mukajela?