Njelemiya 11 - Livulu lya Shukulu Kalunga

Njelemiya na cikumiiyo

¹ Shukulu Kalunga wendekele kuli yange ngwendi,

² “Tolilila majwi a cikumiiyo eci, nakuwaleka vanu va mu Yunda na vanu va mu Yelusalema ngwove,

³ yange Kalunga Njambi ya Isalele, njikaka cisingo ali munu woshe uje kononoka majwi awa a cikumiiyo eci.

⁴ Cinapu cikumiiyo cije njalikumiiye na vakukulwila vavo omo njavatundisile mu Ingito, lifuti lije lyafwile kuli vakevo ngwe tuhya twa mu lutengo. Njavalekele ngeci vanjononoke nakulinga vyuma vyoshe vije njashikile. Njavalekele ngwange nga munjononoka, co mukapwa vanu vange, nange njikapwa Njambi yeni.

⁵ Asinoni njikanyunga cikumiiyo cije njalikumiiye na vakukulwila veni, ngeci njikavana lifuti lyalivwa nevi vyakujenekamo vyai, muje mumuli nakukala ololo.” Co njakumbulwile ngwange, “Ewa Shukulu Kalunga.”

⁶ Asinoni Shukulu Kalunga wendekele ngwendi, “Ya ku vinganda vya mu Yunda na mu vitapalo vya mu Yelusalema, utambeke majwi ange nakuleka vanu vatolilile ku mashiko a cikumiiyo nakuwononoka.

⁷ Omo njatundisile vakukulwila vavo mu Ingito, njavanangwile ngeci vanjononoke, njavanangwile kushwakumo kweta na ku litangwa lya lelo.

⁸ Oloni kuvatolililile nambe kwononoka. Oloni munu na munu wakaluwisile mbunge nakulinga vuvi simbu yoshe. Njavashikile kunyunga cikumiiyo, oloni vavyanene. Ngecivene, njavatuminine vihiso vyoshe ngwe muvyapwile.”

⁹ Asinoni Shukulu Kalunga wendekele kuli yange ngwendi, “Vanu va mu Yunda na vanu va mu Yelusalema valinakunjenda vungungu.

¹⁰ Vanelukila ku vingila vyavivi vya vakukulwila vavo, co vanavyana kwononoka ku majwi ange, valinakukavangeya vinjambi veka nakuvalemesa. Miyati ya Isalele na Yunda vanavyana cikumiiyo cije njalikumiiye na vakukulwila vavo.

¹¹ Ngecivene, ololo, yange Kalunga, njivaleka ngwange njikanena tuyando ali vakevo tuje kuvakasa kuputumuka. Nameme vakatambeka kuli yange, oloni kunjikavatolilila embwe.

¹² Asinoni vanu va mu Yunda na vanu va mu Yelusalema vakatambeka ku vinjambi vaje vavanakala nakukombelela. Oloni vinjambi vaje kuvakavamena omo vali mu vukalu.

¹³ Vanu va mu Yunda muli na vinjambi vavangi manene kutuvakana vinganda vyeni, muli na mitula yaingi mu Yelusalema yakukombelela kuli Mbale njambi wa vunyengwe kutuvakana vitapalo vya mu Yelusalema.

¹⁴ Njelemiya, kesi ulombele kuli yange nambe kunjilambelela ngeci njamene vanu ava omo vali mu tuyando, nameme valombela kuli yange ngeci njivakwase, oloni kunjikavatolilila.”

¹⁵ Shukulu Kalunga alinakwendeka ngwendi, “Vanu vanjazema valinakulinga vyuma vyavivi. Vuvwa mukajo valinavwo ngeci vakale mu Njuvo yange? Kuma vayongola ngwavo vasa kuvindika tuyando akulinga vikulaeso nakukombelela vin̄ombelo vya tusitu? Kuma vije vikavavwaelelesa ndi?

¹⁶ Njavatumbwile muti wa olive, uje uli na vushuka vwavuvwa, oloni ololo, njikenyeka minango ya muti ou na cililimo cakama nakwenyeka muti woshe na tuhya.

¹⁷ “Yange Kalunga Muka-nzili yoshe, njakunine Isalele na Yunda, oloni ololo njivatumbwila tuyando. Vakevo vavenya vanalikokela tuyando omwo vanalingi vuvi, vananjiluvalesa akukombelela vin̄ombelo kuli Mbale.”

Vutumbe vwakutsiya Njelemiya

¹⁸ Shukulu Kalunga wanjinangwile a matumbe aje avayongwele vitozi vange ali yange.

¹⁹ Njafwile ngwe muna manga wa kulongwa, uje vatwala mukumutsiya, co kunjazivukile cuma nacimo cai a matumbe awa. Vakele nakwendeka ngwavo, “Tushinjeni ou muti simbu ucili wauvwa, ijeni tumutsiye ngeci naumo wai akamwanuka.”

²⁰ Asinoni njalombelele ngwange, “Shukulu Kalunga Muka-nzili yoshe, yove wapwa muka-kusompa wa vushunga, u muka-kwilula viyongola vya vanu na mana avo, njinakundika n̄anda yange mu mavoko ove, ngeci njinakengelela kuli yove kulinga shambandinga ali vanu ava.”

²¹ Vanalume va ku Anatote vashakele kunjitsiya, co vanjilekele ngwavo tukutsiya nga ucitwalao kwambulula lijwi lya Shukulu Kalunga.

²² Ngecivene, Shukulu Kalunga Muka-nzili yoshe wendekele ngwendi, “Njikavahisa! Vakwenje vavo vakavatsiila mu nzita, co vana vavo vakalanduka ku njala.

²³ Njinemika simbu yakunena tuyando ali vanu va ku Anatote, co omo simbu ije iketa naumo wai akasalao.”