Njelemiya 10 - Livulu lya Shukulu Kalunga

Njambi na tumponya

¹ Yeni vanu va Isalele, tolilileni majwi amileka Shukulu Kalunga.

² Shukulu Kalunga alinakwendeka ngwendi, “Kesi mukavangeye vingila vya miyati ya vanu veka, co kesi mujujuke a vizivukiso mumona mwilu, nameme miyati yeka vajaja.

³ Omwo vilika vya vanu ava vinapu vyangoco, omwo munu ashinja muti mu shwata, aushonga kamponya,

⁴ co akacakeya siliva na ngolinde. Nakukapameya na vimbambo ngeci kesi kenjengeye.

⁵ Tumponya twa cifwa cangacije twafwa ngwe tumponya twa makwisiso twa mu lihya lya matanda, kutwasa kwendeka nambe kwenda kuvanga kutwambata. Kesi mutuzivile lyova embwe, kutwasa kumivulumuna, co lalo kutwesi na seo kuli yeni.”

⁶ Shukulu Kalunga, kukwesi weka wakulifwa nove wai, u Muka-nzili, lizina lyove lyapwa lyakama lya nzili.

⁷ Iyajo kasa kukusingimika, yove mwene wa miyati yoshe? Yove wafwila kasingimiko. Kukwesi weka wakulifwa nove akati ka miyati yoshe ya vaka-mana, nambe akati ka vimyene vavo.

⁸ Voshe valemesa tumponya vapwa vilema. Vikajo vivalilongesa ku tumponya twa viti?

⁹ Tumponya twavo twakucakeya siliva ya ku Sipeini na ngolinde ya ku Ufaze, nakutuzika vinanga vyakuzivuluka nevi vya linyu vyakuvenguluka, vyakushela kuli vatongwe, twapwa vipangi vya vaka-kushonga.

¹⁰ Oloni yove Shukulu Kalunga, wapwa Njambi wa vushunga, yove Njambi wakuyoya na mwene wa ku myaka yoshe. Omo uluvala, co kaye kajaja, miyati ya vanu kuvasa kusimpa ku vukalu vwove.

¹¹ (Yeni vanu munapande kuvaleka ngweni vinjambi vaje kuvatangele kaye na lilu vakanyonga. Nakumo kwai kuvakakala ano asi.)

Mwaso wakushangazala Njambi

¹² Shukulu Kalunga watangele kaye na nzili yendi, watangele kaye na mana endi, co wajangumwine melu.

¹³ Akushika kwendi mema a mwilu akuma, ikeye muka-kwendesa mashelwa kutunda ku shongo imo ya kaye nakweta ku shongo ikwavo. Muka-kuyemwisa muhyato mu nyonzi, nakutuma lihunzi kutunda mu cishete cendi.

¹⁴ Vanu voshe vaje vaka-kufula tumponya twa ngolinde vanapu vilema, voshe vakaziva shwamwa, omwo tumponya tuje tuvakafulu tunapu twa makuli, co kuvesi na mwonyo.

¹⁵ Tumponya tunapu twangoco, vanapande kutuyeluwisa, omo Shukulu Kalunga akaija vakatunyongesa.

¹⁶ Njambi ya Yakomba kalifwile navo, ikeye lika watangele vyuma vyoshe, waangwile Isalele kupwa vanu vendi. Lizina lyendi ikeye Shukulu Kalunga Muka-nzili yoshe.

Vunzinda vulinakwija

¹⁷ Vanu va mu Yelusalema, vanamizengeleka! Ambateni vivala vyeni muye.

¹⁸ Shukulu Kalunga nendeka ngwendi, “Njikasheka voshe vaje vakala muno mu lifuti, co njikavanenela n̄avava, ngeci vazive muyafwa.”

¹⁹ Co vanu va mu Yelusalema valilile ngwavo, “Kayeketu tunavulumuka manene! Vimbandu vyetu kuvikanguka. Twayongwele ngwetu tukasimpa!

²⁰ Vimbalaka vyetu vinaviya, mikole ije yavikwatesele yavatozoka, vana vetu voshe vanatsi, naumo wai nasalao ashimbike lalo vimbalaka vyetu, co naumo wai akashukazekako mavamba ku vimbalaka vyavo.”

²¹ Njelemiya wakumbulwile ngwendi, “Vantwama vetu vanapu vilema, kuvesi kwihula Shukulu Kalunga ngeci avakwase. Eci cikeco cuma cinanenesa ngeci vanu vetu vashandoke.

²² Tolilileni muzimbu unaija! Kuli kalwa kakama manene ku lifuti lya ku kunto, mashwalale vakwo vakanyongesa vinganda vya mu Yunda, nakuvipwisa mutambela wakukala vimbanje.”

²³ Shukulu Kalunga, njazivuka ngeci munu ikeye vavenya na mana endi kasa kwangula ngila yaivwa ngeci endemo, munu ikeye vavenya kesi na nzili yakwenda mwoshe mwashakela.

²⁴ Njilongese yove Shukulu Kalunga oloni kesi na vukalu vwove embwe, kutewa njikanyonga.

²⁵ Vukalu vwove vwije a miyati ije kuvesi kukulemesa, na ali vanu vaje vaka-kukuvyana. Vanatsii vanu vove, vanatunyongesa njwa nakuseza lifuti lyetu ngundu.