Njelemiya 1 - Livulu lya Shukulu Kalunga

Njelemiya

¹ Livulu eli lyapwa lya vin̄anda vije vyendekele Njelemiya, umo wa vaka-kukombelela va mu nganda ya Anatote mu lifuti lya Mbenjemani. Njelemiya wapwile muna Hilikiya.

² Shukulu Kalunga wendekele kuli Njelemiya mu mwaka wamulikumi na itatu omo Yosiya muna Amoni wapwile mwene wa mu Yunda.

³ Shukulu Kalunga wendekele lalo kuli Njelemiya omo Yehoyakime muna Yosiya wapwile mwene. Munima yevi, Shukulu Kalunga wendekele kuli Njelemiya visimbu vyavingi, noo mu mwaka wamulikumi na umo mu ngonde yamucitanu omo Zendekiya muna Yosiya wapwile mwene. Ije ikeyo simbu omo vanu va mu Yelusalema vavatwalele mu vunzinda.

Njelemiya vamusana

⁴ Shukulu Kalunga wendekele kuli yange ngwendi,

⁵ “Njakuzivukile simbu kanda uwile mwimo lya vanyoko, njakwangwile simbu kanda usemuke ngeci upwe muka-kwimanena wange ku miyati ya vanu.”

⁶ Co njakumbulwile ngwange, “Shukulu Kalunga wa Akamwa ya Vyoshe, kunjizivukamo kwendeka, nji mwanike wamundondo.”

⁷ Oloni Shukulu Kalunga wendekele kuli yange ngwendi, “Kesi wendeke ngwove u mwanike wamundondo embwe, oloni unapande kuya ku vanu kuje kunjikutuma, nakuvaleka vyuma vyoshe vije vinjikushika.

⁸ Kesi uvazivile lyova embwe, omwo yange njikakala nove nakukunyunga. Yange Kalunga, njinendekamo!”

⁹ Asinoni Shukulu Kalunga wolwele livoko lyendi, co wakwatele a kanwa kange, wendekele kuli yange ngwendi, “Njilinakukwana majwi aje aunapande kwendeka.

¹⁰ Ku litangwa lya lelo njilinakukutuma na nzili kukendeka ku mafuti oshe na ku vumwene vwoshe kutukula nakusiwula, kunyongesa nakuwisa, kutunga nakukuna.”

Vimona vivali

¹¹ Shukulu Kalunga wanjihwile ngwendi, “Njelemiya, vikajo unamono?” Co njakumbulwile ngwange, “Njinamono munango wa muti wa alumonde.”

¹² Shukulu Kalunga wendekele ngwendi, “Watombola. Yange njikengelela njimone ngeci majwi ange alingiwa.”

¹³ Asinoni Shukulu Kalunga wanjihwile lalo ngwendi, “Vikajo vyeka lalo viwunamono?” Co njakumbulwile ngwange, “Njinamono ndeo ilinakutupuka ku kunto, co ishaka kwitikila ku mutambela unotuli.”

¹⁴ Co wendekele kuli yange ngwendi, “Tuyando tukatundilila ku kunto tukaija ali vanu voshe vaje vakala mu lifuti eli,

¹⁵ omwo njilinakusana miyati yoshe ya vanu vali ku kunto vaije. Vimyene vavo vakatumbika nakuzengeleka matanda avo ku vikolo vya Yelusalema na ku vivumbe vyayo, co lalo vakazengeleka vinganda vikwavo vya mu Yunda.

¹⁶ Co njikahisa vanu vange omwo vanalingi vuvi akunjiseza, vanakombelela vin̄ombelo ku vinjambi veka, co vanashongo tumponya nakutulemesa.

¹⁷ Ngecivene, Njelemiya, katuka uye, ya ukavaleke vyuma vyoshe vije vinjikushika. Kesi uvazivile lyova embwe, nga uziva lyova ni, co njikakuzivisa manene lyova ku mesho avo.

¹⁸ Co yange njikakupwisa nganda yakukola manene, nambe ngwe manda ya vutale, nambe civumbe ca vunengu, mukulwisa lifuti lyoshe, vimyene voshe va mu Yunda, na vamyata vamwo, na vaka-kukombelela vamwo, na vanu voshe va mu lifuti.

¹⁹ Vakevo vakakulwisa, oloni kuvakakufungulula, omwo yange njikakala nove nakukunyunga. Yange Kalunga, njinendekamo.”