Ngalatiya 6 - Livulu lya Shukulu Kalunga

Lyambateseni vitele umo na mukwavo

¹ Vakwetu, nga munu umo vanamuwana na mulonga umo wa kupenga-penga, vaje veni vanakolo mukukulaela vanapande kumushungamesa, oloni munapande kucilinga mu ngila yaivwa. Oloni liiluleni yeni vavenya, kutewa neni mukakala mu ceseko lalo.

² Likwaseni kulyambatela vitele umo na mukwavo, co mu ngila eyi mukononoka lishiko lya Kilistu.

³ Nga munu umo ayongola ngeci napu wakama oloni kesi mukemwo mwanapu, alinakulikwisa lika ikeye vavenya.

⁴ Co umo na umo asompe futisi yendi vavenya. Nga ikeyo inapu yaivwa, asinoni alyalese a vije vyanalingi, kujeneka kuviseteka na vije vyanalingi munu weka.

⁵ Munu na munu alyambatele citele cendi vavenya.

⁶ Munu uje valinakulongesa lijwi lya vuka-Yesu napande kulipangela vyuma vyoshe vyavivwa vije alinavyo na mulongisi wendi.

⁷ Kesi mulikwise yeni vavenya, naumo wai ashendumuna Njambi. Munu ateja vije vyanakuvile.

⁸ Nga ukuna mu lihya lya cisemwa ca mashungu ove, ku cikeco ukakungulula na kuteja kutsa, nga ukuna mu lihya lya Munzinzime, ku Munzinzime ukakungulula na kuteja mwonyo wa myaka yoshe.

⁹ Ngecivene, kesi tujuke mukulinga mwamuvwa embwe, omwo nga kutujuka, simbu ikaija omo tukateja.

¹⁰ Ngecivene, ngwe omo tuli na simbu, tunapande kulingila vuvwa kuli munu na munu, vunene vene kuli vaje vanakundama ku naanga yetu mukukulaela.

Kunangula cakumanesela na ciindu

¹¹ Kengeni kwama kwa mikanda injikamisonekela ololo na livoko lyange vavenya!

¹² Vanu vaje valinakweseka kumisindiya ngeci mutuuke vakevo vaje vashaka kulimwesa na kulyalesa a vin̄anda vya anja. Nameme ngoco, vakevo valinakucilinga ngeci kesi vavapakese omwo cilindakano ca Kilistu.

¹³ Nameme vaje vatuuka kuvesi nakwononoka Lishiko, vashaka yeni mutuuke ngeci valyalese ngeci ngwavo yeni mwatava ku cilika eci ca cisemwa.

¹⁴ Ngwe ali yange, nameme ngoco, yange njikalyalesa lika a cilindakano ca Mwene yetu Yesu Kilistu, omwo a cilindakano cendi kaye kanatsi kuli yange, co yange lalo njinatsi ku kaye.

¹⁵ Kukwesi mulonga wai nameme kutuuka nambe kujeneka kutuuka, oloni cije cikwasa cinapu kupwa wakutanga kwakuhwa.

¹⁶ Ngwe ali ava valinakukava lishiko eli mukuyoya kwavo, kwoloka na mema ku mbunge vikale navo, vikale navo na voshe vanu va Njambi!

¹⁷ Mukumanesela ngwange, kesi kukale umo anjane vukalu, omwo viveve vinjilinavyo a muvila wange vimwesa ngeci yange nji ndungo ya Yesu.

¹⁸ Kutetela kwa Mwene yetu Yesu Kilistu kukale amo neni voshe, vavusamba vange. Ewa.