Ngalatiya 5 - Livulu lya Shukulu Kalunga

Nyungeni kupatuka kweni

¹ Kupatuka kukekwo tulinakwo, Kilistu natupatula! Ngecivene, imaneni ngwe vanu vakupatuka, co kesi mulyecelele yeni vavenya lalo kupwa vindungo.

² Tolilileni, yange Paulu njimileka ngwange nga mulyecelela yeni vavenya kutuuka, co eci cinalumbunuka ngeci kuma Kilistu kesi na seo kuli yeni voshe.

³ Njiilukilamo lalo kunangula munu woshe uje alyecelela ikeye vavenya kutuuka, ikeye nakutiwa mukunyunga Mashiko oshe.

⁴ Vaje veni veseka kulipwisa vaka-vushunga ku mesho a Njambi akwononoka Mashiko vanavatukiya vakevo vavenya nakutunda kuli Kilistu. Munatundu ku kutetela kwa Njambi.

⁵ Ngwe ali yetu, cinyangavili cetu cinapu ngeci Njambi akatupwisa vaka-vushunga ku mesho endi, co eci cikeco tulinakuvandamena a nzili ya Munzinzime wa Njambi uje alinakupanga mukukulaela kwetu.

⁶ Omwo tuli amo muli Kilistu Yesu, nambe kutuuka nambe kujeneka kutuuka kuvyasa kulinga cuma cimo, cuma cakama lika kukulaela cije cilinakupanga mu cizemo.

⁷ Mwakele nakulinga mwamuvwa! Iyajo namivindika kwononoka vushunga! Iyajo wamisindiiye?

⁸ Eci kacilingile Njambi, uje alinakumisana.

⁹ Ngwe muvakendeka ngwavo, “Kamusima kakandondo lika kakafutunwisa mukasha wose wamutunu.”

¹⁰ Oloni yange anga njicili na lukakateya ali yeni. Mwonyo wetu muli Mwene ulinakunjilingisa lukakateya ngeci kumukakala na viyongola vyeka, co uje munu alinakumitanganesa, nambe wapwa iya, Njambi akamunyanyamesa.

¹¹ Oloni ngeci mwange, vakwetu, nga njicitwalao kwambulula ngwange kutuuka kunapu kwakuvwa,omwo vikajo vacili nakunjipakesela? Nga eci capwile ca vushunga, cooni kwambulula kwange kwa cilindakano ca Kilistu nga kucilingisa vitanga.

¹² Njishaka ngeci vanu vaje valinakumitanganesa kesi valengesele aa lika, veceleni vatwaleo nakulipwisa vayunuke!

¹³ Ngwe ali yeni, vakwetu, vamisanene mukupatuka. Oloni kesi mutave kupatuka oku kupwe lisesa lyakumyecelela ngeci mashungu eni a vunu amipangese. Oloni taveni cizemo cimipwisa vangamba va umo na mukwavo.

¹⁴ Omwo Mashiko oshe amutunu vanalilavelao mukushika kumo ngwavo, “Zema mukweni ngwe muwalizema yove vavenya.”

¹⁵ Oloni nga mulinga ngwe tusitu, kulitwa vimbandu nakulivulumuna umo na mukwavo, co nyanyameni, kutewa mukalinyongesa umo na mukwavo.

Munzinzime na cisemwa ca vunu

¹⁶ Evi vikevyo njendeka ngwange, eceleni Munzinzime atwamenene myonyo yeni, co mukenukwa mashungu a cisemwa ca vunu.

¹⁷ Omwo cisemwa cetu ca vunu cilinakulwisa vije vyashaka Munzinzime, co lalo vije vyashaka Munzinzime vilinakulwisa vije vishaka cisemwa cetu ca vunu. Vyoshe evi vivali vyakala mu vutozi, co eci cinalumbunuka ngeci yeni kumwasa kulinga vije vimushaka kulinga.

¹⁸ Oloni nga Munzinzime alinakumitwamenena, co yeni kumwesi mwisi ya Mashiko.

¹⁹ Vije vicilinga cisemwa ca vunu vinatungukwa manene. Cilimwesa cikeco vavenya mu vupangala nakulijwalesa na vilinga vya kukezima,

²⁰ mukulemesa tumponya na mu vulozi. Co vanu vakapwa vitozi, vakalwa, co vakapwa vaka-cipululu, vaka-matoto, na vaka-kulyaka ku vukama. Co vakalyangunuka mu vimbunga na mu vimunga,

²¹ vakevo vaka-mafuwa, vaka-kupenda nakukina nakulinga vyuma vyeka ngwe evi. Njilinakuminangula ngwe munjaminangwile laja ngwange, vaje voshe valinakulinga vyuma evi kuvakakovela mu Vumwene vwa Njambi.

²² Oloni vushuka vwa Munzinzime vunapu cizemo, kujolela, kwoloka, lukakateya, ngozi, vuvwa, kulongwa,

²³ kulikeesa nakulinyunga. Kukwesi lishiko livindika vyuma vya cifwa eci.

²⁴ Co voshe vaje vanakundama kuli Kilistu Yesu vanatsii cisemwa cavo ca vunu na mashungu aco oshe.

²⁵ Munzinzime natwana mwonyo, co napande lalo kunyunga myonyo yetu.

²⁶ Kutwapandele kupwa vaka-kulyalesa nambe kulishangumuna umo na mukwavo nambe kukala na cipululu kuli umo na mukwavo.