Ngalatiya 4 - Livulu lya Shukulu Kalunga

¹ Oloni ngwange simbu shwana a cili mukwenje napu mumo na ndungo, nameme ikeye vyuma vyoshe vinapu vyendi.

² Omo acili mukwenje, kuvali vanu vaka-kumulela nakumukengelako vyendi noo simbu ije yemika ishe.

³ Mu ngila ije vene, netu lalo twapwile tu vindungo va vushwana vwa minzinzime ya kaye simbu te kanda tucikole mu munzinzime.

⁴ Oloni omo simbu yaivwa yetele, Njambi watumine Munendi, wakusemuka ku munakazi, wakusemuka ku majwi a Lishiko,

⁵ mukukula vaje vali mwisi ya Mashiko, ngeci tupwe tu vana va Njambi.

⁶ Mukumwesa ngeci yeni munapu vana vendi, Njambi watumine Munzinzime wa Munendi mu vimbunge vyetu, Munzinzime uje muka-kutambeka ngwendi, “Tate, Tate.”

⁷ Ngecivene, yove kesi u ndungo lalo oloni unapu u mwana. Co nga unapu u munendi, Njambi akwana vyoshe vije alinavyo vya vana vendi.

Kulishoshomwena kwa Paulu ali vaka-Ngalatiya

⁸ Mu myaka ya kunima kumwazivukile Njambi, ngecivene, mwapwile mu vindungo nakukundama kuli minzinzime ije kuyapwile vinjambi.

⁹ Oloni ololo munazivuka Njambi, nambe njendeke ngwange, ololo Njambi namizivuka, vatijo lalo mushaka kwiluka kunima kuli minzinzime yangoco yakuzeya? Omwo vikajo mushaka kupwa vindungo vavo lalo simbu yoshe?

¹⁰ Yeni mukanyunga-nyunga matangwa amo na vingonde na visimbu na myaka.

¹¹ Njilinakulishoshomwena ali yeni! Kuma vipangi vyange vyoshe vinapu vyangoco ali yeni ndi?

¹² Njamilombo, vakwetu, pweni ngwe yange. Omwo yange njinapu ngwe yeni. Yeni kumwalingile cuma cimo cacivi kuli yange cai.

¹³ Anukeni omwo vikajo njambulwile muzimbu kuli yeni a simbu yakulivanga, capwile ngeci omwo yange njakele nakuvinja.

¹⁴ Oloni nameme kwinduka kwange kwa muvila kwapwile ceseko cakama manene kuli yeni, yeni kumwanjiyengwile nambe kunjivyana. Oloni mwanjitambwile ngwe kangelo wakutunda mwilu, mwanjitambwile ngwe Kilistu Yesu.

¹⁵ Mwavwaelelele manene! Vikajo vinalingiwa? Yange njasa kwendeka ngwange nga mwasele, nga mwacakuvwile mesho eni, nakunjanawo.

¹⁶ Kuma yange ololo njinemuka citozi ceni akumileka vushunga ndi?

¹⁷ Ovo vanu veka vamwesa sholovya yakama muli yeni, oloni viyongola vyavo kesi vyavivwa embwe. Eci vashaka lika cinapu kumyangununa vamitundise kuli yange, ngeci yeni mukakale na sholovya imolika muli vakevo ngwe vakevo valinayo muli yeni.

¹⁸ Co ololo, mwamuvwa kukala na sholovya yakama ya cifwa cangacije nga vutumbe vunapu vwavuvwa, simbu yoshe eci cinapu ca vushunga, co kesi mukemwo lika omo yange njili amo neni.

¹⁹ Vana vange va cizemo! Njiilukilamo lalo, ngwe munakazi ali na mushongo wakukita mwana, njilinakuziva cifwa cimo ca mushongo omwo yeni noo cisemwa ca Kilistu vanacipanga muli yeni.

²⁰ Njiliveya manene ngwe njikale amo neni ololo, ngeci njilumbunune lijwi lyange, omwo njalishoshomwenene ali yeni.

Cimweso ca Hangale na Sala

²¹ Imaneni njihule vaje vashaka kwononoka ku Majwi ngwange, kuma kumwazivile vije Majwi a Lishiko endekele ndi?

²² Alinakwendeka ngwawo Avilahama wakele na vana vavali va vanalume, umo kuli munakazi wa ndungo, mukwavo kuli munakazi uje kesi ndungo.

²³ Munendi wa kuli munakazi wa ndungo vamukitile ngwe vanu voshe, oloni munendi wa kuli munakazi uje kesi ndungo vamukitile ku cizango ca cikulaeso ca Njambi.

²⁴ Vyuma evi twasa kuvizivuka ngwe cisimo, vanakazi vavali vanemanena mazivasano avali. Uje wakele na mwana ivakitilile mu vundungo ikeye Hangale, co nemanena lizivasano lije livalingile ku Munkinda wa Sinai.

²⁵ Hangale, nemanena Munkinda wa Sinai mu Alambiya, nemanena lizivasano lyakwinika nganda ya Yelusalema, ije ili mu vundungo na vanu vamwo voshe.

²⁶ Oloni Yelusalema ya mwilu inapu yakupatuka, co ikeyo inapu cisemi cetu.

²⁷ Omwo visoneka vyendeka ngwavyo, “Vwaelela, yove munakazi wakujeneka vana! Tambeka nakujolela, yove kuwazivile mushongo wakukita mwana! Omwo uje munakazi ivasezele akakala na vana vavangi kutuvakana munakazi uje nashomboka simbu yakama.”

²⁸ Co ololo, yeni, vakwetu, munapu vana va Njambi ngwe ku cikulaeso cendi, ngwe mwafwile Isake.

²⁹ A simbu ije uje mwana ivakitile ku cisemwa ca vanu wapakesele uje ivakitile omwo Munzinzime wa Njambi, co cinapu cuma cimolika ololo.

³⁰ Oloni visoneka vyendeka vatijo? Vyendeka ngwavyo, “Sheka munakazi wa ndungo na munendi amo, omwo mwana wa munakazi wa ndungo kakakala na mutambela wa vufuko vwa ishe amolika na mwana wa munakazi wakupatuka.”

³¹ Ngecivene, vakwetu, yetu kesi tu vana va munakazi wa ndungo embwe, oloni tu vana va munakazi wakupatuka.