Ngalatiya 3 - Livulu lya Shukulu Kalunga

Lishiko nambe kukulaela

¹ Eni vilema vaka-Ngalatiya! Iya namikasumuna? Mwalimwenenene mwamuvwa na mesho eni mukwalumbunukilile kutsa kwa Yesu Kilistu a cilindakano!

² Njishaka njimihule cuma cimo ngwange, kuma mwatambwile Munzinzime wa Njambi akulinga vije vishakiwa ku Majwi a Lishiko nambe akuziva muzimbu nakuukulaela ndi?

³ Vulema vweni vwakufwa vatijo! Mwashangumuka na Munzinzime wa Njambi, kuma ololo mushaka kumanesa mu nzili yeni vavenya ndi?

⁴ Kuma vyuma vije mwamwene vyapwile vyangoco ndi? Mwa vushunga kuvyapwile vyangoco!

⁵ Kuma Njambi namyana Munzinzime nakulinga vizivukiso akati keni omwo mulinga vije Majwi a Lishiko avishaka nambe omwo muziva muzimbu nakuukulaela ndi?

⁶ Yongoleni vije vyamwene Avilahama, ngwe muvyendeka visoneka ngwavyo, “Avilahama wakulaelele Njambi, co omwo akukulaela kwendi Njambi wamulaveleleco kupwa muka-vushunga.”

⁷ Ngecivene, mwapandele kunanguka ngeci, naanga ya Avilahama vushunga inapu vanu vaka-kukulaela.

⁸ Co visoneka vyenikile ngeci Njambi akaka vaje kesi vaYunda kupwa vaka-vushunga ku mesho endi akukulaela. Ngecivene, visoneka vyambulwile Vin̄anda Vyavivwa kuli Avilahama ngwavyo, “Muli yove Njambi akavezikisa miyati yoshe ya vanu.”

⁹ Avilahama wakulaelele, co wapwile muka-kuvezika, ngecivene, voshe vaje vakulaela vanapu vaka-kuvezika ngwe ikeye.

¹⁰ Omwo voshe vaje vanajendamena a Majwi Lishiko vali mwisi ya cisingo. Omwo visoneka vyendeka ngwavyo, “Woshe uje avyana kwononoka vyuma vyoshe vije vivanasoneka mu livulu lya Majwi a Lishiko ali mwisi ya cisingo ca Njambi!”

¹¹ Ololo casholoka vushunga ngeci naumo wai ivanapwisa muka-vushunga ku mesho a Njambi akunyunga Majwi a Lishiko, omwo visoneka vyendeka ngwavyo, “Kuvanga lika munu uje ivanapwisa muka-vushunga ku mesho a Njambi akayoya akukulaela.”

¹² Oloni Majwi a Lishiko kuwasa kulinga cimo akukulaela. Oloni ngwe muvyendeka visoneka ngwavyo, “Woshe alinga vyuma vyoshe vije vishakiwa ku Majwi a Lishiko akayoya.”

¹³ Oloni omwo Kilistu vamupwisile cisingo omwo watupatwile ku cisingo cije majwi a Lishiko acinenele, omwo visoneka vyendeka ngwavyo, “Munu woshe uje vashukika a muti ali mwisi ya cisingo ca Njambi.”

¹⁴ Kilistu walingile eci ngeci vivezikiso vya Njambi vyakulaesele kuli Avilahama vavyane kuli vaje kesi vaYunda ali Kilistu Yesu, ngeci akukulaela tutambule Munzinzime uje watukulaesele Njambi.

Mashiko na cikulaeso

¹⁵ Vavusamba vange, njipangesa cimweso ca vanu ngwange, omo vanu vavali valizivasana a n̄anda, co vasoneka lije lizivasano, naumo wai asa kulipokola nambe kuwezelelako cuma cimo.

¹⁶ Ololo, Njambi nalingi cikulaeso cendi kuli Avilahama na ku naanga yendi. Visoneka kuvyendekele ngwavyo “Vinaanga,” kulumbununa vanu vavangi, oloni ngwavyo “naanga,” kulumbununa munu umolika, ikeye Kilistu.

¹⁷ Evi vikevyo njinayongola, Njambi walingile lizivasano na Avilahama nakumukulaesa kulinyunga. Mashiko, aje avanene omo kwetile myaka 430, kuwasa kupokola lije lizivasano nakuzimangana cikulaeso ca Njambi.

¹⁸ Omwo nga vwana vwa Njambi vujendamena a Mashiko, co kuvukakala lalo a cikulaeso cendi embwe. Nameme ngoco, omwo a cikulaeso cendi ngeci Njambi wanene vuje vwana kuli Avilahama.

¹⁹ Ngecivene, Majwi a Lishiko apwile avikajo? Vawawezeleleleko omwo ya vuvi, noo akwija kwa mutekulwila wa Avilahama, muli ikeye muvalingilile cikulaeso. Majiw a Lishiko atundile kuli tungelo, munu wakele ngwe muka-kunungulula mukati kavo.

²⁰ Oloni muka kunungulula kesi endi lika, omo kuli munu umolika nakundamako, co Njambi napu umolika.

Vutumbe vwa Majwi a Lishiko

²¹ Kuma eci cinalumbunuka ngeci Majwi a Lishiko alinakulwisa cikulaeso ca Njambi ndi? Embwe, kesi ngoco! Omwo nga vanu vatambwile majwi a lishiko aje asa kunena kuyoya, co munu woshe asa kupwa muka-vushunga ku mesho a Njambi akuwononoka.

²² Oloni visoneka vyendeka ngwavyo kaye koshe kali mwisi ya nzili ya vuvi, co vwana vwa cikulaeso vwa kukulaela muli Yesu Kilistu vanavwana kuli vaje vakulaela.

²³ Oloni omo simbu yakukulaela kanda icete, Mashiko atukutile tuvavoshe kupwa vinzinda noo kukulaela kwasholokele.

²⁴ Ngecivene, Mashiko apwile muka-kushika kuli yetu noo Kilistu wezile, ngeci vatupwise vaka-vushunga ku mesho a Njambi akukulaela.

²⁵ Oloni ololo simbu yakukulaela inete, co Mashiko kuwapu lalo muka-kutushika embwe.

²⁶ Akukulaela ngeci yeni voshe munapu vana va Njambi muli Kilistu Yesu.

²⁷ Vamimbwitikile amo muli Kilistu, co ololo vanamizika na mwonyo wa Kilistu vavenya.

²⁸ Ngecivene, kukwesi kulyangunuka akati ka vaYunda na vaje kesi vaYunda, akati ka vindungo na vanu vakupatuka, akati ka vanalume na vanakazi, yeni voshe munapu mumo muli Kilistu Yesu.

²⁹ Co nga munakundama kuli Kilistu, ngecivene, yeni munapu vatekulwila va Avilahama, co mukatambula vije vyakulaesele Njambi.