Ngalatiya 2 - Livulu lya Shukulu Kalunga

Paulu na vakwavo miluwa

¹ Asinoni omo kwetile myaka likumi na iwana, co njelukile ku Yelusalema amo na Mbanambase, njaile amolika na Tito.

² Njaile omwo Njambi washolwele kuli yange ngeci njapande kuya. Omo twalikungulwile mu vushweke na vantwama, njanungulwile muzimbu uje njambulwile kuli vaje kesi vaYunda. Kunjashakele vipangi vyange vya kunima nambe vya ololo vyonwe embwe.

³ Nameme mukwetu Tito, ikeye wapwa kaNgiliki, kuvamusindiiye ngeci atuuke embwe,

⁴ nambe vamo vashakele ngeci cilingiwe. Akulikwisa kupwa ngwe vaka-kukulaela, vanu ava vamwengelele mu mbunga yetu ngwe tunenga, ngeci vawane kupatuka kutulinakwo muli Yesu Kilistu. Vashakele kutupwisa vindungo,

⁵ oloni mukunyunga mwamuvwa vushunga vwa muzimbu omwo yeni, kutwavatavele nambe kasimbu kakandondo.

⁶ Oloni vaje vasholokele ngwe vantwama, njendeka evi omwo kuli yange kuvyalitepesele, Njambi kesi kusompa ku munu cifwa ca anja, vaje vantwama, njendeka ngwange, kuli yange kuvanjanene viyongola vyeka vyaviha vyai.

⁷ Oloni mu ngila ikwavo, vamwene ngeci Njambi nanjana vipangi vyakwambulula muzimbu kuli vaje kesi vaYunda, ngwe mwanene Petulu vipangi vyakwambulula muzimbu kuli vaYunda.

⁸ Omwo a nzili ya Njambi vanjipwisile muluwa kuli vaje kesi vaYunda, ngwe muvapwisile Petulu muluwa kuli vaYunda.

⁹ Yakomba, Petulu na Yowano, vaje vapwile vantwama, vamwene ngeci Njambi nanjana vipangi evi vyavivwa, co vatukwatele mu mavoko yange na Mbanambasa, kupwa cimweso ngeci yetu voshe twapwile vaka-kupangela amo. Twalizivasanene ngeci Mbanambasa nange tuye kuli vaje kesi vaYunda, co vakevo vaye kuli vaYunda.

¹⁰ Vatulombele ngeci twanuke vaka-kujeneka mu mbunga yavo, eci cikeco cuma cakama cinjinashaka kulinga.

Paulu apopolola Petulu ku Antyoke

¹¹ Oloni omo Petulu wezile ku Antyoke, njamupopolwele ku mesho a mbunga, omwo waviisile.

¹² Omwo simbu kanda vete vanu vaje vaatumine Yakomba, Petulu wakele nakulya na vaka-kukulaela vaje kesi vaYunda. Oloni omo vetele vaje vanu, co washondolokele, co kalile na vaje kesi vaYunda, omwo wakele na lyova lya vaje vatuukile.

¹³ Co vaYunda vamo vaka-kukulaela valingile civembulu ngwe Petulu, nameme Mbanambasa nendi watangukile na civembulu cavo.

¹⁴ Oloni omo njamwene ngeci kuvakele nakwenda mu ngila yaivwa ya vushunga vwa muzimbu, co njendekele kuli Petulu ku mesho avo voshe ngwange, “Yove unapu u kaYunda, oloni unakala nakuyoya ngwe uje kesi kaYunda, kesi ngwe kaYunda. Ngecivene, vati wasa kusindiiya vaje kesi vaYunda ngeci vayoye ngwe vaYunda?”

VaYunda na vaje kesi vaYunda vanovoka akukulaela

¹⁵ Mwa vushunga, yetu tunapu tu vaYunda ku cisemwa kesi yetu “vaje kesi vaYunda vaka-vuvi,” ngwe muvali nakuvatumbula.

¹⁶ Oloni twazivuka ngeci munu apwa muka-vushunga ku mesho a Njambi akukulaela lika kuli Yesu Kilistu, kesi ngwe mukulinga vije vishakiwa ku Majwi a Lishiko embwe. Netu lalo tunakulaela kuli Kilistu vatupwise vaka-vushunga ku mesho a Njambi akukulaela kuli Kilistu, kesi ngwe mukulinga vije vishakiwa ku Majwi a Lishiko embwe. Omwo ku vilinga vya mashiko munu naumo wai akovoka.

¹⁷ Oloni omo tushaka ngeci vatupwise vaka-vushunga ku mesho a Njambi muli Kilistu, co vanatuwana tunapu vaka-vuvi, ngwe vaje kesi vaYunda, kuma eci cinunguluka ngeci Kilistu alinakupangela nsina ya vuvi ndi? Embwe!

¹⁸ Oloni nga njishangumuka kutungulula Majwi a Lishiko aje anjasiwile, co njilimwesa ngwe njilinakupokola Mashiko.

¹⁹ Omwo njatsile ku Majwi a Lishiko ngeci njiyoye muli Njambi.

²⁰ Vananjishukika amo na Kilistu, ngecivene, kesi yange lalo njiyoya embwe, oloni Kilistu ikeye ayoya muli yange. Co mwonyo ou njilinakuyoya nawo ololo, njilinakuyoya akukulaela kuli Muna Njambi, uje wanjizemene, co walyanene ikeye vavenya omwo yange.

²¹ Kunjombwanesa kutetela kwa Njambi. Oloni nga munu vamupwisa muka-vushunga ku mesho a Njambi akunyunga Majwi a Lishiko, co cinalumbunuka ngeci Kilistu nevi vyatsililile vyai!