Ngalatiya 1 - Livulu lya Shukulu Kalunga

¹ Mukanda wakutunda kuli Paulu, muluwa kesi wakusana ku cizango ca vanu nambe kwitilila muli munu umo, oloni ali Yesu Kilistu na Njambi Tate, uje wamusangwile ku vatsi.

² Vakwetu voshe njilinavo kuno tulinakutuma viindu ku vikungulukilo vya mu Ngalatiya ngwetu,

³ Njambi Tatetu na Mwene yetu Yesu Kilistu vamyane kutetela na kwoloka.

⁴ Uje walyecele ikeye vavenya omwo vuvi vwetu, ngeci atwamene ku simbu ino yaivi, ngwe ku cizango ca Njambi Tatetu,

⁵ vumpau vukale kuli Njambi ku myaka yoshe! Ewa.

Muzimbu umo

⁶ Njakomoka kuli yeni! Mu simbu yaindondo yeni voshe munatundu kuli uje wamisanene na kutetela kwa Kilistu, co munatava ku muzimbu weka lalo.

⁷ Mwa vushunga, kukwesi “muzimbu weka,” oloni njilinakwendeka ngeci omwo kuli vamo vanu valinakumitanganesa vashaka kutengulula muzimbu wa Kilistu.

⁸ Oloni nameme yetu nambe kangelo wakutunda mwilu nga ambulula kuli yeni muzimbu weka kesi uje utwamyambulwilile, co ikeye apwe wakusingiwa!

⁹ Ngwe tunendeka laja, co na ololo njicili nakwendekamo lalo ngwange, nga munu umo akambulula kuli yeni muzimbu weka kesi uje utwamyambulwilile, co ikeye apwe wakusingiwa!

¹⁰ Kuma eci cimwesa ngwe njilinakushaka vanu ngeci vanjishangale ndi Njambi? Indi njishaka kuvwaelelesa vanu ku vimbunge? Nga yange njilinakushaka kuvwaelelesa vanu, kunjapandele kupwa ngamba ya Kilistu.

Paulu mwapwile muluwa

¹¹ Njilinakumileka, vakwetu ngwange, muzimbu njilinakwambulula kuwapwile wakutunda kuli vanu embwe.

¹² Kunjautambwile kuli munu umo, nambe munu naumo wai wanjilongeselewo. Oloni vavenya Yesu Kilistu ikeye wanjishololwelewo.

¹³ Vamileka laja munjafwile omo njakundamene ku futisi ya vuYunda, muje munjayandesele cikungulukilo ca Njambi kujeneka mema ku mbunge, co njesekele na nzili yange yoshe ngeci njicinyongese.

¹⁴ Njahyanene vakwetu vamo va vaYunda vaje twakolelele amo omwo njanyanyamene manene ku futisi ya vuYunda, co njalikundikile manene ku vilika vya vakukulwila vetu.

¹⁵ Oloni Njambi mu kutetela kwendi wanjangwile omo kanda njisemuke, co wanjisanene mukumupangela. Co omo wayongwele

¹⁶ kusholola Munendi kuli yange, ngeci njambulule Vin̄anda Vyavivwa kuli vaje kesi vaYunda, kunjaile kuli munu umo mukunjinangula embwe,

¹⁷ nambe kunjaile ku Yelusalema mukumona vaje vapwile miluwa simbu kanda yange. Oloni njaile ku Alambiya, co njelukile ku Ndamasiku.

¹⁸ Kwetile myaka itatu, co njaile ku Yelusalema kukaziva muzimbu kuli Petulu, co njatumbamane nendi visimano vivali.

¹⁹ Oloni kunjamwene miluwa veka kuvanga Yakomba, ndolome ya Mwene.

²⁰ Evi vinjinasoneka vinapu vya vushunga. Njambi azivuka ngeci kunjendeka makuli!

²¹ Asinoni njaile ku mafuti a ku Silya na Silisha.

²² Co a simbu ije vanu va mu vikungulukilo vya mu Yunda kuvazivukile cihanga cange.

²³ Vazivile lika ngwavo, “Uje wakele nakutuyandesa ololo alinakwambulula kukulaela kuje kwashakele kunyongesa!”

²⁴ Co vashangazalele Njambi omwo yange.