Nehemiya 9 - Livulu lya Shukulu Kalunga

Vanu valitavela vivi vyavo

¹ A litangwa lyamumakumi avali na matangwa awana, mu ngonde ije vene vanu va Isalele valikungulwile nakuzila kulya mukumwesa vusiwa omwo vivi vyavo.

² Vakevo valyangunukile laja na vaka-kwija voshe. Vazalele vikeleya nakulishuwila livu ku mitwe yavo kupwa cimweso cakuviilila. Asinoni vemanene nakulitavela vivi vije vivalingile vakevo na vakukulwila vavo.

³ Co a visimbu vitatu vavalavelele Mashiko a Shukulu Kalunga Njambi yavo, lalo kwetile visimbu vitatu vyakulitavela vivi vyavo, co valemesele Shukulu Kalunga Njambi yavo.

⁴ Kwakele vutenda vwa vaLevi, co aje a vutenda emanene Njeshuwa, na Mbani, na Kandimyele, na Shembaniya, na mbuni, na Sheleviya, na Mbani, na Kenani. Co valombelele nakutambekela kuli Shukulu Kalunga Njambi yavo.

⁵ VaLevi ava, Njeshuwa, na Kandimyele, na Mbani, na Hashambeneya, na Sheleviya, na Hondiya, na Shembaniya, na Petahiya, vendekele ngwavo, “Imaneni mushangazale Shukulu Kalunga Njambi yeni, mushangazaleni ku myaka yoshe. Munu woshe ashangazale lizina lyendi lya vumpau. Naumo wai asa kushangazala vukama vwendi.”

Lilombelo lyakulitavela

⁶ Asinoni vanu va Isalele valombelele lilombelo eli, “Yove Shukulu Kalunga, yove lika u Shukulu Kalunga, yove watangele melu na vingongonosi vya mwilu. Yove watangele nunda na mema a kalunga na vyuma vyoshe vilimo. Yove waanene mwonyo ku vyoshe. Vyoshe vili mwilu vikutsikamena nakukulemesa.

⁷ Yove Shukulu Kalunga Njambi, waangwile Avilama, nakumutundisa mu Ule mu Mbambilone, watengulwile lizina lyendi kulipwisa Avilahama.

⁸ Yove wamwene ngeci ikeye wapwile wa kulongwa kuli yove, co walikumiiye cikumiiyo nendi. Wamukulaesele kumwana lifuti lya vaKanana, na vaHiti, na vaAmoli, na vaPelezi, na vaNjevushi, na vaNgilengashi, kupwa lifuti muje muvakakala vatekulwila vendi. Wanyungile cikulaeso cove, omwo yove wapwa wa kulongwa.

⁹ “Yove wamwene vakukulwila vetu muvayandele mu Ingito, wazivile mutambi wavo wakuvakwasa ku Mema a Kalunga Akuvenga.

¹⁰ Walingile vikomokeso ali mwene, na ali vamyata vendi, na ali vanu voshe va mu lifuti lyendi, omwo wazivukile muje muvayandesele vanu vove. Watsimanesele lizina lyove, ngwe mulinatsimana na lelo lino.

¹¹ Mukati ka mema a kalunga walingilemo ngila ya vanu vove, co wavatwamenenene mukati oku valinakwenda a livu lyakuma. Vaje vavakavele vakupukile mu mema akulova, ngwe muje mulikakupuka limanya na mankimba a mu mema a kalunga.

¹² Ku mutanya wavatwamenenene na lishelwa, co ku vutsiki watwisile ceke ca tuhya mu ngila yavo.

¹³ Ku munkinda wa Sinai washulukile kutunda mwilu, wendekele kuli vanu vove, nakuvana mashiko amavwa, na vilongesa vyavivwa.

¹⁴ Wavalongesele kunyunga Litangwa Lyakuhwima kupwa litangwa lyakujela, co muli ngamba yove Mosesa, wavanene mashiko, na vilongesa.

¹⁵ “Omo vakele na njala, wavanene makende akutunda mwilu, na mema akutunda mu limanya omo vakele na lihwila. Wavalekele kutambula lifuti, lije wavakulaesele kuvanalyo.

¹⁶ Oloni vakukulwila vetu valyalesele, nakukaluwisa vimbunge vyavo, co vavyanene kwononoka mashiko ove.

¹⁷ Vavyanene kukwononoka, co vevalele vyoshe vije viwalingile. Vevalele vikomokeso vije viwalingile. Mu kulyalesa kwavo, vaangwile ntwama ngeci avelwisile lalo ku vunzinda ku Ingito. Oloni yove wapwa Njambi muka-kusambesa, muka-ngozi na cizemo, kuwesi kuluvala vwasi. Kutetela kwove kwapwa kwakama, co kuwavasezele.

¹⁸ Valingile kamponya mu cifwa ca muna ngombe, co vendekele ngwavo uje ikeye Njambi wavatundisile ku Ingito! Kashaundu aka kapwile kakama kuli yove Shukulu Kalunga!

¹⁹ Oloni kuwavasezele muje mu mambo, omwo ngozi yove yapwa yakama. Kuwatundisile lije lishelwa nambe tuhya, vije vyavamwesele ngila ku mutanya na ku vutsiki.

²⁰ Mu vuvwa vwove wavalongesele vije vapande kulinga, wavalisile maana, co wavanene mema akunwa.

²¹ A myaka makumi awana mu mambo, wavanene vyoshe vije vivashakele, vuzalo vwavo kuvwakuluvalele, na mendi avo kuwazimbile.

²² “Yove wavatavele kufungulula miyati na vumwene, na mafuti aje alitwile nginga navo. Vafungulwile lifuti lya Heshevone, lije lyashwanene Mwene Sihone, na mwene Onge wa lifuti lya Mbashane.

²³ Wavanene vana vavangi manene ngwe vingongonosi vya mwilu, co wavatavele kuvafungulula nakukala mu lifuti, lije liwakulaesele vakukulwila vavo kuvanalyo.

²⁴ Co vafungulwile lifuti lya Kanana, wafungulwile vanu vaje vakele muje. Waanene vanu vove moko yakulinga vyoshe vije vivashakele kuli vanu na vimyene va Kanana.

²⁵ Vanu vove vafungulwile vinganda vya vimpaka, na lifuti lya vwilo, na vinjuvo vyakushula na vufuko, na masima aje vendilile cimweja, na miti ya olive, na miti ya vushuka, na vitungu vya mikolovozi ya vushuka vwa vinyu. Valile vyoshe vije vivashakele, co vanunile, vavwaelelele mu vyuma vyoshe vyavivwa vije viwavanene.

²⁶ “Oloni vanu vove vakutengulukilile, nakujeneka kukwononoka, vakengesele nima ku Mashiko ove. Vatsiile vaka-kwimanena vaje vavanangwile nakuvaleka vukaleo vwakuvatengulwila kuli yove. Co vakushawile ku simbu na simbu,

²⁷ ngecivene, wavakundikile mu mavoko a vitozi vavo ngeci vavafungulule nakuvashwana. Mu tuyando twavo vatambekele kuli yove ngeci uvakwase, co wavakumbulwile oku uli mwilu. Mukutetela kwove kwakama wavatuminine vantwama, vaje vavaamenene kuli vitozi vavo.

²⁸ Oloni omo kwakele kwoloka, valingile vuvi lalo, co watavele lalo vitozi vavo kuvafungulula. Omo vatengulukile, valombelele kuli yove ngeci uvamene, wavazivile oku uli mwilu, a simbu na simbu wavamenene co mu ngozi yove wavamenene.

²⁹ Wavanangwile ngeci vononoke vilongesa vyove, oloni mu kulyalesa kwavo vavyanene mashiko ove, nameme kunyunga Mashiko ove ikeyo ngila ya ku mwonyo. Mukuzikwa kwavo, na mukukaluwa kwa vimbunge vyavo, vavyanene kwononoka.

³⁰ A mwaka na mwaka wavanangwile nakusimpa, nakuvambulwila vukaleo ali Munzinzime wove, muli vaka-kwimanena vove, oloni vanu vove vapwile tusinda-matwi, ngecivene, wavakundikile mu mavoko a miyati yeka ngeci vavafungulule.

³¹ Omwo ngozi yove yakama, kuwavasezele nambe kuvanyongesa. Yove Njambi muka-ngozi na mema ku mbunge!

³² “Yove Njambi, Njambi yetu, yove wakama, muka-nzili! Muka-kukomokesa, muka-kunyunga cikumiiyo na cizemo cove cije kucesi kutenguluka. Kutunda a simbu ije omo vimyene va vaAsilya vatuyandesele, nakweta ku simbu ino, tuyando twoshe tuje tuli ali yetu, na vimyene vetu, na vantwama vetu, na vaka-kukombelela vetu, na vaka-kwimanena vetu, na vakukulwila vetu, na vanu vetu voshe, kesi twatundondo ku mesho ove.

³³ Yove walingile mwamuvwa kutuhisa, yove wapwa wa kulongwa, nameme twalingile vuvi.

³⁴ Vakukulwila vetu, na vimyene vetu, na vantwama vetu, na vaka-kukombelela vetu kuvanyungile Mashiko ove. Kuvatolililile kukushika kwove na kukunangula kwove.

³⁵ Vimyene vashwanene vanu a vivezikiso vyove, omo vayoyele mu lifuti lyakama, lifuti lya vwilo lije liwavanene, oloni kuvatengulukile ku vuvi ngeci vakupangele.

³⁶ Co ololo tu vinzinda mu lifuti lije liwatwanene, lifuti lya vwilo muje tulinakuwana kulya.

³⁷ Vije vilinakutunda mu lifuti, vili na kuya ku vimyene, vaje vatushwanene, omwo yetu twalingile vuvi. Valinakulinga mwoshe muvashakela ali yetu na a vimuna vetu, co tuli mu vukalu vwakama manene!”

Vanu valinga lizivasano

³⁸ Omwo a evi vyoshe vije vinalingiwa, yetu vanu va Isalele, tulinakulinga lizivasano lyakukola lyakusoneka, co vantwama vetu, na vaLevi vetu, na vaka-kukombelela vetu vasateleo visateso vyavo.