Nehemiya 8 - Livulu lya Shukulu Kalunga

Ezela alavela vanu Lishiko

¹ Ku ngonde yamucitanu na vivali, vanu va Isalele voshe vakele mu vinganda vyavo. Co a litangwa lyakulivanga ku ngonde ije vene voshe vakungulukilile mu Yelusalema, mushandangala ku Cikolo ca Mema. Co valombele Ezela, muka-kukombelela na muka-kulilongesa Mashiko aje Shukulu Kalunga waanene kuli vaIsalele ali Mosesa, ngeci anene livulu lya Mashiko.

² Ngecivene, Ezela walinenele ku mutambela kuje kuvakungulukilile vanalume, na vanakazi, na vanike vaje vakoleleo mukuziva vyuma.

³ Co muje vene mushandangala yangoco ku cikolo, walavele Lishiko kuli vakevo kushangumuka kukutuuka kwa litangwa noo mutanya, co voshe vatolililile mwamuvwa.

⁴ Ezela wemanene a vutenda vwa viti vuje vuvatungilile cipangi eci. Co vanalume vemanene ku livoko lyendi lya cilyo vapwile, Matitiya, na Shema, na Anaya, na Uliya, na Hilikiya, na Maseya, co vaje lalo vemanene ku livoko lyendi lya cimoshwe vapwile, Pendaya, na Mishaele, na Malekiya, na Hashume, na Hashevandana, na Zekaliya, na Meshulame.

⁵ Co Ezela wemanene aje a vutenda vwa vulaja kuhyana vanu voshe, co voshe vakengele mesho avo ali ikeye ntoma. Omo Ezela wafukwile livulu, co vanu voshe vemanene.

⁶ Co Ezela wendekele ngwendi, “Shangazaleni Shukulu Kalunga, Njambi wakama!” Co vanu voshe vajundwile mavoko avo mwilu vakumbulwile ngwavo, “Ewa! Ewa!” Co vatsikamene nakulemesa, na vihanga vyavo asi.

⁷ Asinoni vakatukile nakwimana mu myela yavo, co vaLevi vaje vanungulwilile vanu Mashiko, vapwile, Njeshuwa, na Mbani, na Sheleviya, na Njamine, na Akumbe, na Shavetai, na Hondiya, na Maseya, na Kelita, na Azaliya, na Yozavande, na Hanane, na Pelaya.

⁸ Co vanungulwile Mashiko a Njambi ngeci vanu vase kuwazivisisa mwamuvwa.

⁹ Omo vanu vazivile vije vyakele mu Mashiko, vimbunge vyavo vyavetwele, co vashangumukile kulila. Ngecivene, Nehemiya, uje wapwile nguvulu, na Ezela muka-kukombelela na muka-kulilongesa Mashiko, na vaLevi vaje vanungulwile Mashiko valekele vanu voshe ngwavo, “Litangwa lino linapu lyakujela kuli Shukulu Kalunga Njambi yeni, ngecivene, kumwapandele kukala na vusiwa nambe kulila.

¹⁰ Yeni ku vinjuvo vyeni mukalinge ciwano. Lipangeleni vyakulya vyeni na vinyu na vaje vanajeneka. Litangwa lya lelo linapu lyakujela kuli Shukulu Kalunga ketu, ngecivene, kesi mukale na vusiwa. Kujolela kwa Shukulu Kalunga kukamitakamesa.”

¹¹ VaLevi vaile nakwolwesa vanu, nakuvaleka ngeci kesi vakale na vusiwa a litangwa lya ngacije lyakujela.

¹² Ngecivene, vanu voshe vaile ku vinjuvo vyavo, co vakalile nakunwa nakujolela nakulipangela na vakwavo vije vakele navyo, omwo vazivisisile mwamuvwa vyuma vije vivavalavelele.

Ciwano ca Mapapela

¹³ Alikaki vakulunu va vikota, amo na vaka-kukombelela na vaLevi, vaile kuli Ezela mukulilongesa vilongesa vya Mashiko.

¹⁴ Co vawanene ngeci Mashiko, aje aanene Shukulu Kalunga ali Mosesa, ashikile vanu va Isalele, kukala kasimbu lika mu mapapela a simbu ya Ciwano ca Mapapela.

¹⁵ Ngecivene, vatambwile vilongesa evi nakuvituma mu Yelusalema mwoshe na mu vinganda na mu vindandanga vikwavo ngwavo, “Yeni ku malundu mukashake minango ya miti ya olive, na miti ya olive ya mu shwata, na cinyota, na mashakavale, na miti ikwavo yakutungisa mapapela kwesekesa na vilongesa vivasoneka mu Mashiko.”

¹⁶ Ngecivene, vanu vakashakele minango nakutunga mapapela akamwa ya vinjuvo vyavo, na mu mitambela yavo, na mu cipango ca Njuvo ya Shukulu Kalunga, na mushandangala yangoco kuyehi na Cikolo ca Mema, na ku Cikolo ca Efalime.

¹⁷ Vanu voshe vaje velukile kutunda ku vunzinda vatungile mapapela nakukalamo. Eci capwile cakulivanga kulingiwa tunde a matangwa a Yoshwa muna Nune, co vanu voshe vajolelele manene.

¹⁸ Kutunda a litangwa lyakulivanga lya Ciwano, kutwala naakumanesa, valavele Mashiko a Njambi a litangwa na litangwa. Valisambele matangwa atanu na avali, co a litangwa lyamucitanu na atatu vamanesele Ciwano, ngwe ku Mashiko.